ភ្នំពេញ ៖ ក្រសួងធនធានទឹក បានបញ្ជាក់ថា ក្នុងចន្លោះថ្ងៃទី០៨ ដល់ថ្ងៃទី១៥ ខែមិថុនា នេះ ខេត្ដព្រះសីហនុ និងខេត្ដកោះកុង នឹងមានភ្លៀងធ្លាក់ច្រើនជាបន្ដបន្ទាប់ ហើយពិសេសគឺកម្លាំងខ្យល់ នឹងបង្កឲ្យកើតមានរលកខ្ពស់ៗ គួរជាទីត្រូវប្រុងប្រយ័ត្នសម្រាប់ប្រជានេសាទ និងអ្នកធ្វើដំណើរតាមសមុទ្រ។ នេះបើយោងតាមការព្យាករណ៍អាកាសធាតុ របស់ក្រសួងធនធានទឹក ផ្សព្វផ្សាយកាលពីថ្ងៃទី០៧ ខែមិថុនា។
តាមការព្យាករណ៍នេះ បានបញ្ជាកថា ប្រទេសកម្ពុជាកំពុងរងឥទ្ធិពល ពីទីព្យុះទី០៥ ដែលវាបានកកើតឡើងដោយ វិសម្ពាធមួយ កើតឡើងនៅភាគអាគ្នេយ៍ នៃដែនសមុទ្រ របស់ប្រទេសហ្វីលីពិន ។ ឥទ្ធិពលរបស់ព្យុះនេះ នឹងបង្កឲ្យខេត្ដព្រះសីហនុ និងខេត្ដកោះកុង នឹងមានភ្លៀងច្រើន មានខ្យល់ ខ្លាំងនាំឲ្យរលកសមុទ្របោកខ្ពស់ៗ ចន្លោះពីថ្ងៃទី០៨ ដល់ថ្ងៃទី១៥ ខែមិថុនានេះ។
ដោយឡែកនៅបណ្ដារាជធានីខេត្ដមួយចំនួនទៀត ដែលមានដូចជា រាជធានីភ្នំពេញ ខេត្ដកំពត តាកែវ កំពង់ស្ពឺ និងខេត្ដកណ្ដាល អាចនឹងមានភ្លៀងធ្លាក់ក្នុងកម្រិតតិចតូច ពីព្រោះតែរបាយទឹកភ្លៀងបានថយចុះ។
យ៉ាងណាក្រសួងធនធានទឹក ក៏សូមក្រើនរំឮកដល់ប្រជាពលរដ្ឋ ពិសេសប្រជានេសាទ និងអ្នកធ្វើដំណើរតាមសមុទ្រទាំងអស់ ត្រូវបង្កើនការប្រុងប្រយ័ត្នឲ្យបានខ្ពស់ ដើម្បីបញ្ចៀសនូវគ្រោះថ្នាក់ផ្សេងៗ ដែលអាចកើតមាន ជាយថាហេតុ៕