រយៈពេលជាង ៤ ទសវត្សរ៍មកហើយ ចាប់តាំងពីរូបថតរបស់ក្មេងស្រីអាក្រាតកាយម្នាក់ ដែលកំពុងរត់ក្នុងភាពភ័យខ្លាចពីការទម្លាក់គ្រាប់បែកក្នុងភូមិនៅវៀតណាមខាងត្បូង ដែលបានធ្វើឱ្យមានរញ្ជួយពេញពិភពលោក។ សព្វថ្ងៃ វីរនារីក្នុងរូបថតនេះដែលមានឈ្មោះថា គីម ហ្វ៊ុក (Kim Phuc) មានវ័យ ៥២ ឆ្នាំហើយ ដែលទីបំផុត អាចមានឱកាសព្យាបាលនូវស្នាមសន្លាកបានហើយ។
លោកស្រី ហ្វ៊ុក បានចាប់ផ្ដើមការព្យាបាលដោយប្រើឡាស៊ែរ តាំងពីចុងខែមុន នៅឯវិទ្យាស្ថានរោគសើស្បែកនិងឡាស៊ែរម៉ាយអាមីនៃសហរដ្ឋអាមេរិច នេះបើយោងតាមសារព័ត៌មាន AP (Associated Press)។ វេជ្ជបណ្ឌិត ជីល វ៉ាយប៊ែល (Jill Waibel) ដែលបានផ្ដល់សេវាព្យាបាលដោយឥតគិតថ្លៃ បាននិយាយថា ពួកគេអាចចំណាយពេលពីប្រាំបីទៅប្រាំបួនខែ ហើយរំពឹងថាស្បែករបស់លោកស្រី ហ្វ៊ុកដែលជាជាលិកាសន្លាកស្លេកនោះនឹងមានភាពទន់រលោង។ ឯស្រទាប់ស្បែកដែលត្រូវបានវះកាត់ នឹងក្រាស់ដូចស្បែកធម្មតាវិញចំនួន ៤ ដង ដែលគ្របដណ្ដប់លើខ្លួននាងមួយភាគបី រួមទាំងដៃខាងឆ្វេង ខ្នង និងករបស់លោកស្រី។
នៅពេលដែលរូបថតត្រូវបានថតក្នុងថ្ងៃទី៨ ខែមិថុនា ឆ្នាំ១៩៧២នោះ ហ្វ៊ុក ទើបតែអាយុ ៩ ឆ្នាំប៉ុណ្ណោះ។ កងទ័ពវៀតណាមខាងត្បូង បានទម្លាក់គ្រាប់បែកណាប៉ាល (Napalm) ដោយចៃដន្យចំលើជនស៊ីវិលនៅក្នុងភូមិត្រាងបាងរបស់នាង ដែលបានបណ្ដាលឱ្យឆេះយ៉ាងខ្លាំងទៅលើក្មេងស្រីតូច ដែលកំពុងជ្រកក្នុងវត្តជាមួយគ្រួសាររបស់នាង នេះបើយោងតាមសារព័ត៌មាន CNN។ ក្នុងភាពឈឺចាប់ដ៏ខ្លាំងនេះ ហ្វ៊ុក បានដោះខោអាវដែលកំពុងឆេះនោះចេញពីខ្លួន ហើយរត់ ដោយបានស្រែកជាភាសាវៀតណាមថា៖ «ក្ដៅខ្លាំងណាស់ ទ្រាំមិនបានទេ»។
ព្រឹត្តិការណ៍នោះត្រូវបានថតដោយអ្នកកាសែតវ័យ ២១ ឆ្នាំមួយរូប ដែលមានឈ្មោះថា និក អ៊ុត (Nick Ut) ដែលបានប្រើដោយឡានរបស់គាត់ ដឹកបញ្ជូន ហ្វ៊ុក និងក្មេងៗដែលរងគ្រោះដទៃទៀតទៅមន្ទីរពេទ្យនៅទីនោះ។ រូបថតនោះបានឈ្នះនូវ ពានរង្វាន់ Ut the Pulitzer ក្នុងឆ្នាំ ១៩៧៣។
ក្នុងរយៈពេលប៉ុន្មានឆ្នាំនេះ Ut បានរក្សាទំនាក់ទំនងជាមួយ Phuc យ៉ាងទៀតទាត់ និងបាន ថតរូបនាងក្នុងកំលុងពេលដែលនាងកំពុងទទួលការព្យាបាល។
លោកស្រី ហ្វ៊ុក បានស្វែងរកសិទ្ធិជ្រកកោននយោបាយនៅក្នុងប្រទេសកាណដា នាឆ្នាំ១៩៩២ ជាមួយប្ដីរបស់នាង ហើយនាងត្រូវបានទទួលងារជា អគ្គរដ្ឋទូតសុឆន្ទៈរបស់អង្គការយូណេស្កូសម្រាប់សន្តិភាព ក្នុងឆ្នាំ១៩៩៧។ ជាច្រើនឆ្នាំមកហើយ ដែលនាងបានឈ្មុសឈ្មុលក្នុងការផ្សព្វផ្សាយនិងលើកកម្ពស់នូវការយល់ដឹងអំពីភាពសាហាវឃោរឃៅនៃសង្គ្រាមពិភពលោក។
លោកស្រី ហ្វ៊ុក បានប្រាប់សារព័ត៌មាន AP ថាការព្យាបាលកន្លងមក បានធ្វើឱ្យស្នាមសន្លាករបស់នាងមានពណ៌ក្រហម និងរមាស់ តែនាងនៅតែចង់បន្តនូវការព្យបាលទៀត។
លោកស្រី ហ្វ៊ុក បាននិយាយដែរថា៖ «វាប្រហែលជាត្រូវការពេល ១ ឆ្នាំ ប៉ុន្តែខ្ញុំមានការរំភើប និងអរគុណ ជាខ្លាំង»។
ប្រែសម្រួលដោយ៖ សេង វិបុល / ប្រភព៖ CCTV News
