ភ្នំពេញ ៖ តំណាងអចិន្ដ្រៃយ៍កម្ពុជាប្រចាំមន្ទីរអង្គការសហប្រជាជាតិ ប្រចាំនៅទីក្រុងហ្សឺណែវ ប្រទេសស្វីស លោក ណី សំអុល បានចេញសេចក្ដីថ្លែងការណ៍ ដោយបង្ហាញការសោកស្ដាយ ដែលឧត្ដមស្នងការជាន់ខ្ពស់របស់អង្គការសហប្រជាជាតិទទួលបន្ទុកសិទ្ធិមនុស្ស មិនទទួលស្គាល់នូវលទ្ធផលសម្រេចបានមួយចំនួន ដែលកម្ពុជាបានធ្វើក្នុងការលើកកម្ពស់ និងការពារសិទ្ធិមនុស្ស។
បន្ថែមពីនេះ តំណាងអចិន្ដ្រៃយ៍កម្ពុជាប្រចាំមន្ទីរអង្គការសហប្រជាជាតិ បញ្ជាក់ទៀតថា លោកពិតជាមានការសោកស្ដាយ ដែលឧត្ដមស្នងការជាន់ខ្ពស់របស់អង្គការសហប្រជាជាតិ បានចោទប្រកាន់កម្ពុជា ដោយពុំមានភស្ដុតាងគ្រប់គ្រាន់ ដែលថា វិធានការច្បាប់មួយចំនួនដែលរាជរដ្ឋាភិបាលកម្ពុជាធ្វើឡើង គឺក្នុងគោលបំណងរឹតត្បិតសេរីភាព នៃការបញ្ចេញមតិ និងជាការបង្រួមនូវលំហរផ្នែកនយោបាយ ដោយគ្រាន់តែផ្អែកទៅលើប្រភពព័ត៌មាន ដែលគ្មានការបញ្ជាក់ច្បាស់លាស់ មិនអាចជឿទុកចិត្ដបាន និងមានចរិតនយោបាយ។
សេចក្ដីថ្លែងការណ៍ដដែលបានបន្ដទៀតថា រាជរដ្ឋាភិបាលកម្ពុជា បានធ្វើសកម្មភាពការងារ ដែលគ្មានអ្វីខុសប្លែកពីបណ្ដាប្រទេសកាន់លទ្ធិប្រជាធិបតេយ្យផ្សេងៗទៀតនោះទេ។ រាជរដ្ឋាភិបាលកម្ពុជា មានកាតព្វកិច្ចពង្រឹងការអនុវត្ដច្បាប់ និងសណ្ដាប់ធ្នាប់ ដោយពុំមានការរើសអើងចំពោះតួនាទីឋានៈបុគ្គលណាមួយឡើយ។ បុគ្គលដែលប្រព្រឹត្ដល្មើសច្បាប់ មិនថា ជាអ្នកការពារសិទ្ធិមនុស្ស អ្នកនយោបាយ អ្នកសារព័ត៌មាន ឬជាសមាជិកនៃអ្នកគាំទ្រ របស់គណបក្សនយោបាយនោះទេ ពួកគេគឺត្រូវតែទទួលទោសចំពោះការប្រព្រឹត្ដល្មើសច្បាប់របស់ពួកគេ។
តែយ៉ាងណា បើទោះបីជាតំណាងអចិន្ដ្រៃយ៍កម្ពុជាប្រចាំមន្ទីរអង្គការសហប្រជាជាតិ មានការសោកស្ដាយ ការដែលឧត្ដមស្នងការជាន់ខ្ពស់របស់អង្គការសហប្រជាជាតិ ចោទប្រកាន់កម្ពុជា ថា កំពុងរំលោភសិទ្ធិមនុស្ស រឹតត្បិតសេរីភាពបញ្ចេញមតិ និងបង្រួមលំហរផ្នែកនយោបាយយ៉ាងណាក្ដី ក៏កម្ពុជានៅតែប្ដេជ្ញាចិត្ដខ្ពស់ក្នុងការចូលរួម និងសហការជាមួយ នូវគ្រប់យន្ដការណ៍សិទ្ធិមនុស្សរបស់អង្គការសហប្រជាជាតិ៕
