នាយករដ្ឋមន្ត្រីកម្ពុជា និងវៀតណាម គ្រោងនឹងសម្ពោធបង្គោលព្រំដែនចំនួន ២ បង្គោល ដោយក្នុងនោះបង្គោលមួយស្ថិតក្នុងស្រុកអូរយ៉ាដាវ ខេត្តរតនគិរី និងបង្គោលព្រំដែនមួយទៀតស្ថិត តំបន់ភ្នំដិន នៅខេត្តតាកែវ។ការសម្ពោធបង្គោលព្រំដែនទាំងពីរនេះនឹងធ្វើនៅថ្ងៃទី២៦ ខែធ្នូ ឆ្នាំ២០១៥ ស្អែកនេះ។
យោងតាមការផ្សាយរបស់សារព័ត៌មានអេឡិចត្រូនិច CEN នៅថ្ងៃទី២៥ ធ្នូ ឆ្នាំ ២០១៥ ឱ្យដឹងថា សម្តេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោក ង្វៀន តឹងយ៉ុង នាយករដ្ឋមន្ត្រី នៃសាធារណរដ្ឋសង្គមនិយមវៀតណាម នឹងសម្ពោធបង្គោលព្រំដែនលេខ៣០ ស្ថិតនៅស្រុកអូរយ៉ាដាវ ខេត្តរតនគិរី និងបង្គោលព្រំដែនលេខ ២៧៥ នៅតំបន់ភ្នំដិន ខេត្តតាកែវ នៅថ្ងៃសៅរ៍ស្អែកនេះ។
ជុំវិញការបោះបង្គោលព្រំដែនត្រង់តំបន់ភ្នំដិននេះ តំណាងរាស្ត្រគណបក្សប្រឆាំងលោក
អ៊ុំ សំអាន ធ្លាប់បានសសេរលិខិតមួយច្បាប់តាមរយៈប្រធានរដ្ឋសភាកាលពី ថ្ងៃទី២ ខែមិថុនា ឆ្នាំ២០១៥ ស្នើសុំឱ្យសម្តេច ហ៊ុន សែន ពិនិត្យមើលព្រំដែន ច្រកភ្នំដិន ស្ថិតនៅក្នុងស្រុកគិរីវង់ ខេត្តតាកែវ។
លោក សំអាន បានបញ្ជាក់ថា វៀតណាមបានរំកិលព្រំដែនចូលទឹកដីកម្ពុជាប្រមាណ ១២៧០ ម៉ែត្រ ដោយគិតពីព្រំដែនចាស់ត្រង់ព្រែកវិញតេ ហៅថាព្រែកក្របៅ រហូតមក ត្រង់ព្រំដែនសព្វថ្ងៃនៅត្រឹមប្រឡាយ ៧៩ ដែលប្រឡាយនេះភាគីវៀតណាមបានជីក កាលពីឆ្នាំ ១៩៧៩។
ការស្នើសុំនេះ ធ្វើឡើងក៏ស្របតាមរបាយការណ៍របស់នាយឧត្តមសេនីយ៍ កែ គឹមយ៉ាន «វៀតណាមបានជីកព្រែកតាមបន្ទាត់ព្រំដែនពីកើតទៅលិច ហើយជីកចូលទឹកដីខ្មែរប្រមាណ ១២៧០ ម៉ែត្រ ដោយគិតពីព្រែកវិញតេ» ចុះកាលពីថ្ងៃទី១២ ខែសីហា ឆ្នាំ១៩៩៩ ដែលកាលនោះ លោកជាអគ្គមេបញ្ជាការនៃកងយោធពលខេមរភូមិន្ទ។
សម្ដេច ហ៊ុន សែន ធ្លាប់បានអះអាងថា ការបោះបង្គោលព្រំដែនកម្ពុជា-វៀតណាម បានចំនួន ៨៣% មកហើយ មកដល់ពេលនេះ៕
