ភ្នំពេញ៖ ប្រធានស្តីទីគណៈកម្មការនីតិកម្ម និងយុត្តិធម៌នៃរដ្ឋសភាស្នើសមាជិករដ្ឋសភាសាធារណរដ្ឋកូរ៉េ កៀរគរអ្នកវិនិយោគមកកម្ពុជាឲ្យបានច្រើន តែមិន មានការឆ្លើយតបនៅឡើយនោះទេ ។ នេះបើតាមការចុះផ្សាយលើទំព័រហ្វេសបុករបស់រដ្ឋសភាជាតិកម្ពុជា នៅថ្ងៃទី ២៦ ខែធ្នូ ម្សិលមិញ ។
តាមការចុះផ្សាយនេះបញ្ជាក់ថា សំណើរនេះ ធ្វើឡើងនៅក្នុងជំនួបពិភាក្សាការងារ រវាង លោកស្រី គ្រួច សំអាន ប្រធានស្តីទីគណៈកម្មការនីតិកម្ម និងយុត្តិធម៌នៃរដ្ឋសភាកម្ពុជា និង លោក ជូ វ៉ាងឌឿក សមាជិករដ្ឋសភានៃសាធារណៈរដ្ឋកូរ៉េ។
លោកស្រី គ្រួច សំអាន បានស្នើលោក ជូ វ៉ាងឌឿក ជួយកៀរគរអ្នកវិនិយោគទុនសាធារណរដ្ឋកូរ៉េ មកបណ្តាក់ទុនរកស៊ីនៅកម្ពុជាឲ្យបានច្រើន។
នាឱកាសនោះ ប្រធានស្តីទីគណៈកម្មការនីតិកម្ម និងយុត្តិធម៌នៃរដ្ឋសភាកម្ពុជា សម្ដែងការដឹងគុណចំពោះរដ្ឋាភិបាល សភា និងប្រជាជនសាធារណរដ្ឋកូរ៉េ ដែលបានគាំទ្រដល់ការអភិវឌ្ឍនៅកម្ពុជា និងបានផ្តល់ជំនួយមនុស្សធម៌ និងការវិនិយោគជាបន្តបន្ទាប់មកដល់កម្ពុជា ។
លោកជំទាវបានថ្លែងអំណរគុណចំពោះរដ្ឋាភិបាល សភា និងប្រជាជនសាធារណរដ្ឋកូរ៉េ ដែលបានគាំទ្រដល់ការអភិវឌ្ឍនៅកម្ពុជា និងបានផ្តល់ជំនួយមនុស្សធម៌ និងការវិនិយោគជាបន្តបន្ទាប់មកដល់កម្ពុជា។
តាមការចុះផ្សាយនេះមិនបានចុះផ្សាយថាភាគីខាងកូរ៉េ ឆ្លើយតបយ៉ាងណានោះទេ។
លោក ជូ វ៉ាងឌឿក បានដឹកនាំគណៈប្រតិភូមកបំពេញទស្សនកិច្ចរយៈពេល ៣ ថ្ងៃ ចាប់ពី ពីថ្ងៃទី២៣ ដល់ថ្ងៃទី២៥ ខែធ្នូ ឆ្នាំ២០១៨ នៅកម្ពុជា៕
អត្ថបទ៖ លោក សោម លាភ