ភ្នំពេញ៖ ប្រមុខដឹកនាំរដ្ឋាភិបាលកម្ពុជា សម្តេច ហ៊ុន សែន បានលើកទ្បើងថា រដ្ឋមន្ត្រីប្រហែលជា ០៨ រូប នឹងត្រូវធ្វើការផ្លាស់ប្តូរចេញពីមុខតំណែង ហើយការផ្លាស់ប្តូរនោះក្នុងគោលបំណងដើម្បីពង្រឹងប្រសិទ្ធភាពការងារ។ ការថ្លែងបែបនេះធ្វើទ្បើងក្នុងពិធីចែកសញ្ញាបត្រដល់និស្សិតសាកលវិទ្យាល័យន័រតុន នៅមជ្ឈមណ្ឌលពិព័រណ៍ និងសន្និបាតកោះពេជ្រ នាព្រឹកថ្ងៃទី ១៧ ខែមីនា ឆ្នាំ ២០១៦ នេះ ។ ចំណែកមន្ត្រីបក្សប្រឆាំងនិងអ្នកសង្កេតការណ៍សាទរចំពោះចំណាត់ការនេះ។
សម្តេច ហ៊ុន សែន បានថ្លែងថា រដ្ឋមន្ត្រីប្រហែលជា ០៨ រូប នឹងត្រូវធ្វើការផ្លាស់ប្តូរចេញពីមុខតំណែងហើយការផ្លាស់ប្តូរនោះទៀតសោតមិនមែនជាការកម្ចាត់រដ្ឋមន្ត្រីចោលនោះទេ។
សម្តេច ហ៊ុន សែន បញ្ជាក់ថា ទោះជាមានការការផ្លាស់ប្តូរមុខតំណែងរដ្ឋមន្ត្រីនេះក្ដី តែមិនឱ្យពួកគាត់បាត់បង់មុខងាររបស់គាត់នៅតាមស្ថាប័នរបស់រាជរដ្ខាភិបាលឡើយ។
«ខ្ញុំសូមយកឱកាសនេះ ដើម្បីនិយាយទៅកាន់រដ្ឋមន្ត្រី បើសិនជាបានដឹងថា ខ្លួនត្រូវដូរពីក្រសួងនេះទៅកាន់ក្រសួងនេះ ឬចាកចេញមិនបន្តនិយាយរួមអ្នកដែលទទួលរងការផ្លាស់ប្តូរ សូមបន្តការងាររហូតដល់មានព្រះរាជក្រឹត្យស្តីពីការតែងតាំងហើយរង់ចាំការផ្ទេរភារកិច្ចជូនរដ្ឋមន្ត្រីថ្មី ពេលហ្នឹងខ្ញុំចាត់តាំងថាឧបនាយករដ្ឋមន្ត្រីមួយណាទៅប្រគល់ដូរការងារនៅក្រសួងណាវាប៉ះពាល់ប្រហែលជា ០៨ ក្រសួងនេះជាការពង្រឹងនៅប្រសិទ្ធការងារ» ។
យ៉ាងនេះក្ដី សម្ដេច ហ៊ុន សែន មិនបានប្រាប់ឈ្មោះរដ្ឋមន្ត្រីណាមួយ ត្រូវបានរុះរើនោះ ដែរ។ ប៉ុន្តែថ្មីៗ សម្ដេចនាយករដ្ឋមន្ត្រី បានរិះគន់រដ្ឋមន្ត្រី ០២ រូប ខណៈសម្ដេចនិយាយពីរថយន្តដឹកទំនិញលើសចំនុះធ្វើឱ្យខូចផ្លួវ ហើយករណីរថយន្តដឹកនាំអង្ករមួយគ្រឿងបានធ្វើខូចជ័រកៅស៊ូស្ពានអ្នកលឿង ។ រដ្ឋមន្ត្រីដែលសម្ដេច លើកឈ្មោះមកនិយាយ គឺរដ្ឋមន្ត្រីក្រសួងសាធារណៈការ និងដឹកជញ្ជូន លោក ត្រាំ អ៊ីវតឹក និងរដ្ឋមន្ត្រីក្រសួងកសិកម្ម ដែលទើបតែចូលកាន់អំណាចនៅអាណត្តិទី៥នេះ គឺលោក អ៊ុក រ៉ាប៊ុន ។
ទាក់ទងនឹងការលើកទ្បើងខាងលើនេះដែរ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានផ្តល់បទសម្ភាសន៍ខ្លីមួយជាមួយវិទ្យុស្ត្រីនៅថ្ងៃនេះថា មានកិច្ចការជាច្រើនដែលគណបក្សប្រជាជនធ្វើមិនទាន់បាន។
បើទោះជាយ៉ាងណាលោក យឹម សុវណ្ណ បន្ថែមថា ការរុះរើគណៈរដ្ឋមន្ត្រីនេះអាចនឹងទទួលបានផលវិជ្ជមានជាងមុនគ្រាន់តែមិនដឹងថាវាទទួលផលវិជ្ជាមានកម្រិតណាតែប៉ុណ្ណោះ។ «ការដែលរុះរើគណៈរដ្ឋមន្ត្រីនេះអាហ្នឹងគឺបង្ហាញថាកិច្ចការមួយចំនួនទៀតត្រូវការកែលម្អរដូច្នេះវាជារឿងធម្មតារបស់គណបក្សប្រជាជនកម្ពុជានោះទេស ប៉ុន្តែសំខាន់ទៅទៀតគឺវាមិនត្រឹមតែគណៈរដ្ឋមន្ត្រីវាជាការកែទម្រង់របស់ប្រទេសជាតិដែលជាការកែទម្រង់នេះត្រូវធ្វើឱ្យមានភាពនឹងការទទួលខុសត្រូវរួមទាំងអភិបាលកិច្ចល្អ…»។
ជុំវិញបញ្ហានេះដែរ សាស្ត្រាចារ្យផ្នែកវិទ្យាសាស្ត្រនយោបាយ លោក សូ ចន្ថា មានប្រសាសន៍ថា លោកសាទរចំពោះការសម្រេចចិត្តរបស់រដ្ឋាភិបាល។ លោក សាស្ត្រាចារ្យផ្ដល់អនុសាសន៍ថា ការរុះរើរដ្ឋមន្ត្រីចាស់ចេញដាក់អ្នកថ្មីជំនួស គឺមិនត្រូវគិតបក្សពួក សែស្រឡាយ ហើយត្រូវធ្វើវិមជ្ឈការ។
«រដ្ឋាភិបាលត្រូវផ្តល់វិមជ្ឈការអំណាចឱ្យបានច្បាស់លាស់ មានន័យថា អំណាចមិនមែនស្ថិតនៅលើតែលោកនាយករដ្ឋមន្ត្រីម្នាក់ឯងនោះទេ មានន័យថាក្រសួងមួយៗត្រូវមានអំណាចគ្រប់គ្រាន់ក្នុងការសម្រេចចិត្តក្នុងដែនសមត្ថកិច្ចរបស់ខ្លួនទី០១ ទី០២ ត្រូវដាក់មនុស្សទៅតាមជំនាញ ទៅតាមឯកទេសរបស់លោករដ្ឋមន្ត្រីម្នាក់ មិនមែនដាក់មនុស្សទៅតាមសែស្រទ្បាយអ្នកជិតស្និតនោះទេ…»។
តាមការអង្កេតកន្លងមក កម្ពុជាក៏មានការរុះរើរដ្ឋមន្ត្រីដែរ តែមិនមានទ្រង់ទ្រាយធំដូចលើកនេះទេ ហើយរដ្ឋមន្ត្រី ឬ មន្ត្រីជាន់ខ្ពស់ដែលត្រូវបានរុះរើ ឬដកហូតតំណែង គឺច្រើនតែក្លាយជាទីប្រឹក្សារដ្ឋាភិបាល ៕
