ភ្នំពេញ៖ អគ្គនាយកដ្ឋានកសិកម្មនៃក្រសួងកសិកម្ម រុក្ខា ប្រមាញ់ និងនេសាទ បានបង្ហាញបញ្ជីឈ្មោះរោងម៉ាស៊ីនកិនស្រូវ រោងម៉ាស៊ីនកែឆ្នៃអង្ករចំនួន ២៦ ដែលបានវាយតម្លៃដោយអគ្គរដ្ឋបាលត្រួតពិនិត្យគុណភាព អនាម័យ និង ភូតគាមអនាម័យនៃប្រទេសចិនថា អាចនឹងនាំចេញអង្ករទៅប្រទេសចិន។ អគ្គនាយកដ្ឋានកសិកម្មនៃក្រសួងកសិកម្ម រុក្ខា ប្រមាញ់ និងនេសាទ បានបង្ហាញបញ្ជីឈ្មោះធ្វើឡើង បន្ទាប់ពីប្រទេសចិនសន្យាទិញអង្ករកម្ពុជាចំនួន ២០ ម៉ឺនតោន។
កាលពី ឆ្នាំ ២០១៦ អង្ករកម្ពុជាបានជាប់លេខ ២ ជាអង្ករល្អជាងគេបំផុតរបស់ពិភពលោក ខណៈអង្ករថៃដែលជាម្ចាស់ផ្ទះទទួលបានជ័យលាភីលេខ ១ ។ ការប្រកួតជ្រើសអង្ករល្អបំផុតរបស់ពិភពលោកនេះធ្វើឡើង ក្នុងសន្និសីទស្រូវអង្ករពិភពលោក ដែលរៀបចំឡើងនៅខេត្ត ឈៀងម៉ៃ ប្រទេសថៃ ចាប់ពីថ្ងៃទី ១៧ ដល់ថ្ងៃទី ១៨ ខែវិច្ឆិកា ឆ្នាំ២០១៦។
អង្ករកម្ពុជាធ្លាប់ទទួលបានជ័យលាភី ជាអង្ករល្អបំផុតលើពិភពលោក ៣ ឆ្នាំជាប់ៗគ្នា គឺឆ្នាំ ២០១២ ២០១៣ និង ២០១៤។ នៅឆ្នាំ ២០១៧ កម្ពុជានឹងធ្វើជាម្ចាស់ផ្ទះក្នុងការរៀបចំសន្និសីទស្រូវអង្ករអន្តរជាតិនេះវិញម្តង៕
