ភ្នំពេញ ៖ សាលាដំបូងរាជធានីភ្នំពេញបានកោះហៅមន្ត្រីស៊ើបអង្កេតជាន់ខ្ពស់របស់អង្គការការពារសិទ្ធិមនុស្សចំនួនមួយរូប និងតំណាងសហ គមន៍ដីធ្លីមួយរូបឲ្យចូលបំភ្លឺនៅថ្ងៃពុធស្អែកនេះ។ ការកោះហៅក្រោយពីមានបណ្តឹងពីក្រុមសន្តិសុខខណ្ឌ័ដូនពេញពីបទពាក់ពន្ធ័នឹងអំពើហឹង្សាកាលពីឆ្នាំមុន។
លោក អំ សំអាត ជាប្រធានផ្នែកឃ្លាំមើលនិងការពារសិទ្ធិមនុស្សរបស់អង្គការលីកាដូនិងលោកច័ន្ទ ពុទ្ធិសាក់ តំណាងប្រជាសហគមបឹងកក់បានទទួលរងបណ្តឹងពីក្រុមសន្តិសុខរបស់ខណ្ឌ័ដូនពេញពាក់ពន្ធ័នឹងអំពើហឹង្សាកាលពីថ្ងៃទី ១០ ខែតុលាឆ្នាំ ២០១៦ កន្លងទៅ។ នៅក្នុងសេចក្តីថ្លែង ការណ៍របស់ខ្លួន លើកឡើងថា លោក អំ សំអាត បានទៅឃ្លាំមើលការដង្ហែក្បួនដោយអហិង្សា ក្នុងទិវាសិទ្ធិលំនៅដ្ឋានពិភពលោកនោះ។ លោកអំ សំអាត មន្រ្តីជាន់ខ្ពស់នៃអង្គការលីកដូ បានប្រាប់វិទ្យុនៅថ្ងៃទី០៧ កុម្ភៈនេះថា លោក នឹងទៅបំភ្លឺនៅសាលាដំបូងស្អែកនេះតាមកោះហៅរបស់ តុលាការ។ បែបនេះក្តីលោក បង្ហាញអារម្មណ៍ហួសចិត្ត ខណៈដែលលោក នឹងលោកច័ន្ទ ពុទ្ធិសាក់ ជាជនរងគ្រោះពីអំពើហឹង្សា ប៉ុន្តែបែរជាត្រូវ ក្រុមសន្តិសុខខណ្ឌដូនពេញប្តឹងចោទប្រកាន់ទៅកាន់ទៅវិញ។ លោកសង្ឃឹមថា ព្រះរាជអាជ្ញានឹងផ្តល់យុត្តិធម៌ដល់រូបលោក និងស្វែងរកអ្នកប្រ ព្រឹត្តិហឹង្សាពិតប្រាកដមកផ្តន្ទាទោស។ លោក អំ សំអាត៖«ចំពោះដីកា ដែលព្រះរាជអាជ្ញាដែលកោះហ្នឹង ខ្ញុំជឿថាលោកកោះទៅតាមសំណុំរឿង ដែលប៉ូលីសនិងសន្តិសុខបានប្តឹងឬបញ្ជូនទៅហ្នឹង អញ្ចឹងលោកត្រូវតែកោះហើយ អញ្ចឹងខ្ញុំអត់មានត្រូវបារម្ភពីព្រោះយើងជាជនរងគ្រោះ ហើយ យើងមានសាក្សី មានភស្តុតាងច្រើនណាស់ដែលបានបញ្ជាក់ អញ្ចឹងបានខ្ញុំគិតថាគួរឱ្យខ្មាស់គេមែនដែលរឿងខ្មៅ ក្លាយជាសជាខ្មៅរបស់ អាជ្ញាធរ ឬសន្តិសុខខណ្ឌ និងអាជ្ញាធរមួយចំនួនតូចដែលកសាងសំណុំរឿងអញ្ចឹង»។
ចំណែកលោក ច័ន្ទ ពុទ្ធិស័ក្ដ តំណាង សហគមន៍បឹងកក់ បានទៅថតសកម្មភាពនៃព្រឹត្តិការណ៍នោះដែរ។ លោក អំ សំអាត និងលោក ច័ន្ទ ពុទ្ធិស័ក្ដ ត្រូវបានទទួលរងរបូសយ៉ាងធ្ងន់ធ្ងរដោយការប្រព្រឹត្តអំពើហិង្សា ពីសំណាក់ក្រុមសន្ដិសុខខណ្ឌដូនពេញ ប៉ុន្តែត្រូវបានតុលាការចេញដីកាកោះ ហៅក្នុងនាមជាជនសង្ស័យ ពាក់ព័ន្ធនឹងអំពើហិង្សា ដែលបានកើតឡើងនោះទៅវិញ។
សេចក្តីថ្លែងការនេះបន្តថា អំឡុងពេលក្បួនដង្ហែអហិង្សាធ្វើដំណើរឆ្លងកាត់តាមផ្លូវនានាក្នុងរាជធានីភ្នំពេញឆ្ពោះទៅទីលានប្រជាធិបតេយ្យ ក្រុមសន្តិសុខ ដឹកនាំដោយ លោក គឹម វុត្ថា ប្រធានសន្ដិសុខខណ្ឌដូនពេញ បានបិទផ្លូវរារាំងក្បួនដង្ហែ និងបានឆក់យកស្គរឆៃយ៉ាំ និងបដាពីអ្នកដើរហែក្បួន។ នៅពេលនោះ ក្រុមសន្ដិសុខបានចាប់ផ្ដើមប្រើអំពើហិង្សាដោយគ្មានហេតុផលទៅលើ លោក ច័ន្ទ ពុទ្ធិស័ក្ដ ខណៈដែលលោកកំពុងថតសក ម្មភាពរបស់ក្រុមសន្ដិសុខ។
រីឯលោក អំ សំអាត បានខំប្រឹងព្យាយាមដោយសន្ដិវិធី ដើម្បីបញ្ឈប់ស្ថានការណ៍តានតឹងនិង អំពើហិង្សា ក្នុងនាមលោកជាអ្នកឃ្លាំមើលសិទ្ធិមនុ ស្ស។ ប៉ុន្តែភ្លាមៗនោះ ក្រុមសន្ដិសុខបានចាប់ផ្ដើមវាយដំទៅលើរូបលោក ដោយបានហ៊ុមព័ទ្ធ ដាល់មុខ និងកញ្ចឹងករបស់លោកជាច្រើនដៃ ដោយគ្មានហេតុផលទាល់តែសោះ។ អ្នកទាំងពីរត្រូវបានរងរបួស និងត្រូវការសម្រាកព្យាបាល។
នៅព្រឹកថ្ងៃដដែល លោក អំ សំអាត និងលោក ច័ន្ទ ពុទ្ធិស័ក្ដ បានដាក់ពាក្យបណ្ដឹងនៅប៉ុស្តិ៍រដ្ឋបាលនគរបាលជ័យជំនះ បន្ទាប់ពីអ្នកទាំងពីរទទួលរងអំពើហិង្សា។ អង្គការលីកាដូ និងសារព័ត៌មានជាតិជាច្រើនទៀត មានទាំងរូបថត វីដេអូ និងសាក្សី ដែលបញ្ជាក់ពីការវាយដំយ៉ាងអាក្រក់នោះ ប៉ុន្តែបណ្ដឹងរបស់អ្នកទាំងពីរមិនត្រូវបានយកមកចាត់ការទេ។
អ្នកនាង ណាលី ពីឡូក នាយករងផ្នែកតស៊ូមតិនៃអង្គការលីកាដូ បានមានប្រសាសន៍ថា លោក អំ សំអាត និងលោក ច័ន្ទ ពុទ្ធិស័ក្ដ គឺជាជនរងគ្រោះនៃការវាយដំដោយគ្មានហេតុផលនោះ។ អ្នកនាងបន្តថា៖ «ករណីនេះគួរឲ្យហួសចិត្ត ដោយហេតុថា បណ្ដឹងលើអ្នកទាំងពីរមិនគួរត្រូវបានយកមកពិចារណា ដើម្បីធ្វើការស៊ើបអង្កេតនោះទេ»៕
