loader

សម្ដេច ហ៊ុន សែន អំពាវនាវអ្នកសារព័ត៌មានតំបន់អាស៊ីចៀសវាងផ្សាយព័ត៌មានក្លែងបន្លំ

ភ្នំពេញ៖ សម្ដេច ហ៊ុន សែន ប្រមុខរាជរដ្ឋាភិបាលកម្ពុជាបានអំពាវនាវឱ្យអ្នកសារព័ត៌មាននៅក្នុងតំបន់អាស៊ី ចៀសវាងឱ្យបាននូវការផ្សាយព័ត៌មានក្លែងបន្លំ ដោយសាររឿងគំនុំគុំកួនឱ្យបាន ។ ការថ្លែងបែបនេះរបស់សម្ដេចនាយករដ្ឋមន្ត្រីធ្វើឡើងក្នុងពិធីបើកសន្និសីទកំពូល «សារព័ត៌មានអាស៊ី» លើកទី១៦ ធ្វើឡើងនៅថ្ងៃទី១២ ខែមិថុនា ឆ្នាំ២០១៩ នៅសណ្ឋាគារសុខាខេត្តសៀមរាប ។

រាយការណ៍ដោយ លោក សោម លាភ

 

សន្និសីទកំពូល «សារព័ត៌មានអាស៊ី» លើកទី១៦នេះ កម្ពុជាធ្វើជាម្ចាស់ផ្ទះនេះ ក្រោមប្រធានបទ «ប្រព័ន្ធផ្សព្វផ្សាយឌីជីថល-អភិវឌ្ឍន៍ទីផ្សារ» ដែលមានអ្នកចូលរួមជាថ្នាក់ដឹកនាំ និងតំណាងស្ថាប័នរដ្ឋាភិបាល ស្ថាប័នសារព័ត៌មាន ព្រមទាំងអ្នកសារព័ត៌មានជាតិ និងអន្តរជាតិប្រមាណ៦០០នាក់ មកពីបណ្ដា ប្រទេសជាង៤២ នៅក្នុងតំបន់ និងលើពិភពលោក។

ក្នុងឱកាសនោះសម្ដេច ហ៊ុន សែន បានថ្លែងបើកសនិ្នសីទ ដោយបញ្ជាក់ថា សន្និសីទកំពូលសារព័ត៌មានអាស៊ី គឺជាព្រឹត្តិការណ៍អន្តរជាតិនាំមុខមួយក្នុងវិស័យសោតទស្សន៍ ដែលផ្តល់កាលានុវត្តភាពដល់រដ្ឋមន្ត្រីទទួលបន្ទុកព័ត៌មាន ប្រតិបត្តិករសោតទស្សន៍ និងបុគ្គលិកបម្រើការងារឲ្យប្រព័ន្ធផ្សព្វផ្សាយជាដើម ។​

ជាងនេះ ព្រឹត្តិការណ៍នេះ ក៏ជាឱកាសសម្រាប់ថ្នាក់ដឹកនាំវិស័យឧស្សាហកម្ម សកលវិទ្យាល័យ អ្នកស្រាវជ្រាវ អ្នកជំនាញ និងអ្នកតាក់តែងគោលនយោបាយ នៅជុំវិញពិភពលោក ដើម្បីជួបជុំ និងពិភាក្សាអំពីការអភិវឌ្ឍគុណភាពនៃប្រព័ន្ធផ្សព្វផ្សាយ និងដោះស្រាយបញ្ហាប្រឈមក្នុងអំឡុងពេលនៃបដិវត្តន៍បច្ចេកវិទ្យាទំនើប ។

សម្តេចនាយករដ្ឋមន្ត្រី មានប្រសាសន៍ថា ចរន្តនៃការរកីចម្រើនផ្នែកវិទ្យាសាស្ត្រ និងបច្ចេក វិទ្យាទំនើប បានប្រែក្លាយ ឌីជីថលឆ្ពោះទៅកាន់បដិវដ្តឧស្សាហកម្មទី៤ ដែលជាកត្តាគន្លឹះក្នុងការអភិវឌ្ឍបច្ចេកវិទ្យា ប្រព័ន្ធផ្សព្វផ្សាយព័ត៌មាន និងវិស័យផ្សេងៗមួយចំនួនទៀត ។ សម្ដេចបន្តថា ការណ៍នេះ បង្កើតឱ្យមានឡើង នូវកាលានុវត្តភាព និងអត្ថប្រយោជន៍ជាច្រើន ។ ជាក់ស្ដែង សម្ដេចថា បច្ចេកវិទ្យា ឌីជីថល អាចបង្កើនគុណភាព ប្រសិទ្ធភាព ទៅលើសំឡេង រូបភាព ល្បឿននៃការបញ្ជូនទិន្នន័យ ការរក្សាទុកទិន្នន័យ ការសន្សំសំចៃនៃការប្រើប្រាស់រលកឤកាសវិទ្យុជាដើម ។ ជាងនេះ ក៏អាចកាត់បន្ថយចំណាយផលិតកម្ម ការបង្កើនផលិតភាពសំបូរបែប ក្នុងវិស័យឧស្សាហកម្ម ប្រព័ន្ធផ្សព្វផ្សាយ ការកម្សាន្ត ការចែករំលែក និងការទទួលព័ត៌មានតាមមធ្យោបាយដ៏សំបូរបែប ។

បច្ចេកវិទ្យាឌីជីថល អាចតភ្ជាប់បណ្តាញទំនាក់ទំនងរវាងមនុស្ស និងមនុស្ស សម្រួលដល់ការធ្វើញណិជ្ជកម្ម កាត់បន្ថយរបាំងទីផ្សារ បង្កើតឱកាសឱ្យ វិស័យឯកជន និងសហគ្រិនដើម្បីមានលទ្ធភាពច្នៃប្រឌិតនូវធុរកិច្ចថ្មីៗផងដែរ ។

​នាយករដ្ឋមន្ត្រីកម្ពុជា ក៏បានបង្ហាញផងដែរ អំពីគុណវិបត្តិនៃបច្ចេកវិទ្យាឌីជីថល ដែកធ្វើឱ្យមានការប្រឈមទៅនឹងព័ត៌មានក្លែងបន្លំ និងឧក្រិដ្ឋកម្មព័ត៌មានវិទ្យាជាដើម ។

យ៉ាងណា សម្ដេចនាយករដ្ឋមន្ត្រីបានផ្ដល់អនុសាសន៍មួយចំនួន សម្រាប់អ្នកសារព័ត៌មានអាស៊ីទាំងអស់ ដើម្បីជាការកែលម្អ និងពង្រឹងគុណភាពរបស់ខ្លួនបន្ថែមទៀត ដើម្បីជាការឆ្លើយតបទៅនឹងការវិវត្តរបស់ពិភពលោក ជាពិសេសបដិវត្តឧស្សាហកម្មទី៤ ។ ជាក់ស្ដែង សម្ដេចមានប្រសាសន៍ឱ្យមានការរួមគ្នាជំរុញកិច្ចសហប្រតិបត្តិការក្នុងតំបន់ និង សកលលោក ដើម្បីផ្លាស់ប្តូរព័ត៌មាន បទពិសោធន៍ការអភិវឌ្ឍបច្ចេកវិទ្យា និងការកសាងហេដ្ឋារចនាសម្ព័ន្ធរូបវន្ត ។

ជាងនេះ ក៏ត្រូវរួមគ្នាបង្កើនកិច្ចសហប្រតិបត្តិការទប់ស្កាត់ព័ត៌មាន ក្លែងបន្លំ និងឧក្រិដ្ឋកម្មព័ត៌មានវិទ្យា តាមប្រព័ន្ធផ្សព្វផ្សាយព័ត៌មាន តាមរយៈការផ្សព្វផ្សាយព័ត៌មានពិត ដើម្បីបន្សាបព័ត៌មានក្លែងបន្លំ ។  ពង្រឹងការអនុវត្តច្បាប់ក្រមសីលធម៌វិជ្ជាជីវៈ ជៀសវាងការផ្សាយព័ត៌មានក្លែងបន្លំគំនុំគុំកួន ការជេរប្រមាថ ការញុះញង់បញ្ឆេះកំហឹងដោយការស្អប់ខ្ពើមរើសអើងបង្កជម្លោះ រវាងជាតិសាសន៍ សាសនា ឬបំផ្លើសព័ត៌មានខុសពីការពិតដែលបង្កើតឱ្យមានអសន្តិសុខសង្គម ។ ពង្រឹងកិច្ចសហប្រតិបត្តិការឱ្យបានជិតស្និទ្ធ ដើម្បីដោះស្រាយទំនាស់នៃការផ្សាយព័ត៌មានដែលបង្កឱ្យកើតមានភាពវឹកវរ និងប៉ះញល់ដល់ការប្រើប្រាស់បច្ចេកវិទ្យា ឌីជីថល ។ បង្កើនការយកចិត្តទុកដាក់ទៅលើការពង្រីក និងពង្រឹងសមត្ថភាពយល់ដឹង ទាំងផ្នែកបច្ចេកទេស និងវិជ្ជាជីវៈ ដើម្បីដើរឱ្យទាន់តម្រូវការទីផ្សារ ការវិវត្តនៃបច្ចេកវិទ្យាប្រព័ន្ធផ្សព្វផ្សាយ និងការវិវត្តសភាពការណ៍សកលលោក ។

សម្ដេច ក៏ថ្លែងឱ្យមានការប្រែក្លាយប្រព័ន្ធផ្សព្វផ្សាយប្រពៃណី ក្លាយជាប្រព័ន្ធដែលមានភាពវ័យឆ្លាត និងឤចបត់បែន ទៅតាមស្ថានភាពជាក់ស្តែង និងការវិវត្តន៍នៃបច្ចេកវិទ្យាទំនើប ដើម្បីប្រឈមនឹងការប្រកួតប្រជែងទីផ្សារក្នុងយុគសម័យឌីជីថល ។ សម្ដេច ក៏អំពាវនាវឱ្យមានការរួមគ្នាកសាងគោលនយោបាយក្របខណ្ឌយុទ្ធសា្រស្ត បទប្បញ្ញត្តិច្បាប់សម្រាប់ប្រព័ន្ធផ្សព្វផ្សាយព័ត៌មាន និងបទប្បញ្ញត្តិស្តង់ដាសុវត្ថិភាពឌីជីថល សម្រាប់ការគ្រប់គ្រងសុវត្ថិភាពទិន្នន័យក្នុងការធ្វើពាណិជ្ជកម្ម ការទូទាត់តាមប្រព័ន្ធអេឡិកត្រូនិក និងសន្តិសុខតាមប្រព័ន្ធអ៊ីនធឺណិត ដើម្បីប្រឆាំងនឹងពត៌មានក្លែងបន្លំ និងឧក្រិដ្ឋកម្មព័ត៌មានវិទ្យា ។

កម្ពុជា កន្លងទៅតាមរយៈប្រព័ន្ធឌីជីថលនេះ មានការចូលលួចទិន្នន័យពីអ្នកនយោបាយ ការលួចថតសម្លេង រួចបង្ហោះជាសាធារណៈជាដើម ។

ពាក់ព័ន្ធនឹងសេរីភាពសារព័ត៌មាន កាល​ពីថ្ងៃទី​០៩ ខែ​មិថុនា លោក ហ្វីល រ៉ូបឺតសុន នាយក​រងអង្គការឃ្លាំមើលសិទ្ធិមនុស្ស (Human Rights Watch) ដែល​ទទួល​បន្ទុកលើ​កិច្ច​ការ​តំបន់​អាស៊ី​ បានលើកឡើងថា ការប្រារព្ធឡើងនូវសន្និសីទកំពូលស្ដីអំពី «សារព័ត៌មានអាស៊ី» លើកទី១៦ ដែលមានការគាំទ្រពីអង្គការសហប្រជាជាតិនេះ មិនសមបានកម្ពុជាក្លាយជាប្រទេសម្ចាស់ផ្ទះនោះទេ ។ លោកថា ការណ៍នេះដោយសារតែប្រទេសកម្ពុជា បានបិទកាសែតឯករាជ្យ និងកម្មវិធីផ្សាយវិទ្យុ ហើយរាជរដ្ឋាភិបាលកម្ពុជា បានគ្រប់គ្រងនូវប្រព័ន្ធផ្សព្វផ្សាយដែលមាននៅកម្ពុជាស្ទើតែទាំងអស់ ។ ជាងនេះលោកអំពាវនាវឱ្យអ្នក​ចូល​រួម​នៅ​ក្នុង​សន្និសីទ«សារព័ត៌មាន​អាស៊ី» ស្នើដល់​សាធារណៈ​ឲ្យ​រដ្ឋាភិបាល​កម្ពុជា​បញ្ឈប់​សកម្ម​ភាព​ធ្វើ​ទុក្ខបុក​ម្នេញ​លើ​អ្នក​សារព័ត៌មាន និង​អនុញ្ញាត​ឲ្យ​មាន​ដំណើរ​ការ​ប្រព័ន្ធ​ផ្សព្វផ្សាយ​ឯករាជ្យ​ឡើង​វិញ ​។

កន្លងមក រាជរដ្ឋាភិបាលកម្ពុជា បានបិទប្រព័ន្ធផ្សព្វផ្សាយឯករាជ្យមួយចំនួនដូចជា កាសែតដឹខេមបូឌាឌេលី ការិយាល័យវិទ្យុអាស៊ីសេរី វិទ្យុសម្លេងសហរដ្ឋអាមេរិកជាដើម ។ តែយ៉ាងណា វិទ្យុសម្លេងសហរដ្ឋអាមេរិក បានបើកការិយល័យរបស់ខ្លួនវិញស្របច្បាប់នៅកម្ពុជាវិញហើយ ។

បើទោះបីជាមានការបិទការិយាល័យរបស់ខ្លួនក៏ពិតមែន ប្រព័ន្ធផ្សព្វផ្សាយទាំងនោះ នៅតែធ្វើការផ្សព្វផ្សាយព័ត៌មានរបស់ខ្លួនដដែល ។ ជាក់ស្ដែងវិទ្យុអាស៊ីសេរី ដែលមានទីស្នាក់ការនៅរដ្ឋធានីវាស៊ីនតោន នៅតែអាចផ្សព្វផ្សាយព័ត៌មាន រិះគន់រាជរដ្ឋាភិបាលកម្ពុជា តែជារឿយៗ ត្រូវបានរាជរដ្ឋាភិបាកម្ពុជាចោទថា ព័ត៌មានមួយចំនួនជាព័ត៌មានមិនពិត ៕

ព័ត៌មានទាក់ទង

 ស្ត្រីម្ចាស់ហាងលក់ទូរស័ព្ទមួយទឹកបង្ហាញបទពិសោធន៍ការងារដោយមិនពឹងកម្លាំងស្វាមីទាំងស្រុង​

ស្ត្រីជាម្ចាស់ហាងលក់ទូរស័ព្ទមួយរូបក្នុងស្រុកម[...]

ស្ត្រីមេផ្ទះឆ្លៀតពេលទំនេរធ្វើការស្ម័គ្រចិត្តជួយសង្គមទោះមិនទទួលបានកម្រៃ

ទំនេរពីកិច្ចការផ្ទះស្ត្រីមេផ្ទះវ័យក្មេងមួយរូប[...]

Facebook សម្ដេច ហ៊ុន សែន៖នាយករដ្ឋមន្ត្រីហុង គ្រី គាំទ្រកម្ពុជាតស៊ូដើម្បីEBA

ទំព័រហ្វេសបុករបស់ សម្ដេចហ៊ុនសែនបានចុះផ្សាយថាល[...]

ព័ត៏មានថ្មី

វីដេអូថ្មីបំផុត