លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ។ រូបភាពពីគណនីហ្វេសប៊ុកលោក រ៉ុង ឈុន។
សមាគមគ្រូបង្រៀនកម្ពុជាឯករាជ្យ ថា ខ្លួនរងពិន័យពីនិយ័តករគណនេយ្យ និងសវនកម្ម ដែលបង្ខំឱ្យបង់ប្រាក់ពិន័យជាង ១៨លានរៀល ដោយសារល្មើសនឹងច្បាប់ស្ដីពីគណនេយ្យ និងសវនកម្ម ប៉ុន្តែនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថ ថា សមាគមគ្រូបង្រៀនមិនទាន់ចុះបញ្ជីជាមួយស្ថាប័នខ្លួន និងមិនមានការបង្គាប់ឱ្យបង់ពន្ធជាង ១៨លានរៀលនេះឡើយ។ កញ្ញា ជា សុខនី រាយការណ៍
តាមលិខិតបំភ្លឺមួយច្បាប់របស់ អគ្គនាយកដ្ឋានពន្ធដារ បានសរសេរដកស្រង់ការលើកឡើងរបស់លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ក្នុងបទសម្ភាសជាមួយវិទ្យុបារាំងអន្តរជាតិ RFI តាមរយៈគេហទំព័រហ្វេសប៊ុក នៅថ្ងៃទី២៩ ខែតុលា ឆ្នាំ២០២៤ ដែលមានខ្លឹមសារថា «សមាគមគ្រូបង្រៀនកម្ពុជាឯករាជ្យកំពុងប្រឈមនឹងការបិទទ្វារ ខណៈដែលឱសានវាទនៃការបង់ពន្ធចូលរដ្ឋនឹងផុតកំណត់នៅសប្តាហ៍ក្រោយ។ ខ្លឹមសារបទសម្ភាសដដែល បានលើកឡើងទៀតថា ក្រសួងសេដ្ឋកិច្ច បានបង្គាប់ឱ្យសមាគមគ្រូបង្រៀនកម្ពុជាឯករាជ្យបង់ពន្ធជាង ១៨លានរៀល ឬស្មើជិត ៥ពាន់ដុល្លារ»។
លោក ប៊ូ ថារិន អគ្គនាយកនិយ័តករគណនេយ្យ និងសវនកម្ម។
អគ្គនាយកដ្ឋានពន្ធដារ បានឆ្លើយតបនឹងការលើកឡើងនេះថា៖ «សូមធ្វើការច្រានចោលទាំងស្រុងនូវការលើកឡើងនេះ ដែលជាការអះអាង ពុំបានឆ្លុះបញ្ចាំងពីភាពត្រឹមត្រូវលើអគ្គនាយកដ្ឋានពន្ធដារ។ អគ្គនាយកដ្ឋានពន្ធដារ សូមធ្វើការបញ្ជាក់ជូនសាធារណជនជ្រាបថា សមាគមគ្រូបង្រៀនកម្ពុជាឯករាជ្យ ពុំទាន់បានចុះបញ្ជីពន្ធដារនៅឡើយ ហើយអគ្គនាយកដ្ឋានពន្ធដារ ពុំបានបង្គាប់ឱ្យសមាគមគ្រូបង្រៀនកម្ពុជាឯករាជ្យ បង់ពន្ធជាង ១៨ លានរៀលនោះទេ»។
ការឆ្លើយតបនេះ បានធ្វើឱ្យមានចម្ងល់ពីប្រិយមិត្ត ដែលបានស្នើឱ្យក្រុមការងារផ្ទៀងផ្ទាត់ព័ត៌មានវិទ្យុស្ត្រី ផ្ទៀងផ្ទាត់ករណីនេះ ដ្បិតថា លោកស្រី អ៊ុក ឆាយ៉ាវី ថា ក្រសួងសេដ្ឋកិច្ចបង្គាប់ឱ្យសមាគមគ្រូបង្រៀនបង់ពន្ធជាង១៨លានរៀល តែ អគ្គនាយកដ្ឋានពន្ធដាបំភ្លឺថា គេមិនបានបង្គាប់ឱ្យសមគមគ្រូបង្រៀនបង់ពន្ធ ជាង១៨លានរៀលនោះទេ។ បើអញ្ចឹងមែនតើ សមាគមគ្រូបង្រៀន មិនជាប់កាតព្វកិច្ចបង់ពន្ធនេះទេ មែនទេ?
ក្រុមការងារផ្ទៀងផ្ទាត់ព័ត៌មានវិទ្យុស្ត្រី បានទាក់ទងសម្ភាសន៍អ្នកស្រី អ៊ុក ឆាយ៉ាវី ដោយលោកស្រី បញ្ជាក់នៅថ្ងៃទី៣១ ខែតុលានេះថា អ្វីដែលអគ្គនាយកដ្ឋានពន្ធដារបានច្រានចោលការបង់ពិន័យនេះ លោកស្រីមិនទាន់ដឹងទេ ប៉ុន្តែសមាគមគ្រូបង្រៀន គឺពិតជាទទួលបានពីក្រសួងសេដ្ឋកិច្ច ឱ្យបង់ពិន័យជាទឹកប្រាក់ជាង ១៨លានរៀល ឬគិតជាដុល្លារជិត ៥ពាន់ដុល្លារ។ យ៉ាងណាចំនួនទឹកប្រាក់ពិនិយនេះ លោកស្រីថា សមាគមគ្រូបង្រៀន មិនមានលទ្ធភាពបង់បានឡើយ ពីព្រោះសមាគមគ្រូបង្រៀន មិនបានទទួលជំនួយពីស្ថាប័នណា និងមិនមានបុគ្គលិកបំពេញការងារដែរ ដូច្នេះក្រសួងសេដ្ឋកិច្ច និងហិរញ្ញវត្ថុ គួរតែលើកលែងឱ្យសមាគម។
លោកស្រី អ៊ុក ឆាយ៉ាវី៖ «មានការផាកពិន័យ ហើយចេញទៅដោយនិយ័តករមែន ក្នុងហ្នឹងគេចង្អុលបង្ហាញសុទ្ធតែឧបនាយកអ៊ីចឹងទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុអ៊ីចឹងទៅបានច្រានចោលសំណើសុំលើកលែងករណីហ្នឹង។ ខ្ញុំនៅតែឆ្ងល់ដែរថាមានក្រសួងអីច្រើនម៉េះ ហើយប្រសិនជាមានក្រសួងហ្នឹងហើយនៅរក្សាពិន័យ ប៉ុន្តែមានក្រសួងហិរញ្ញវត្ថុខាងពន្ធដារនេះ បានច្រានចោលទៀត ហើយក្រសួងហ្នឹងបង្កើតប៉ុន្មានក្រសួង ហើយក្រសួងហ្នឹងមានភារកិច្ចស្អីខ្លះ ហើយខ្ញុំមិនមែនអ្នកធំរៀនចេះដឹងខ្ពង់ខ្ពស់ ប៉ុន្តែខ្ញុំអត់យល់អ្វីទាំងអស់នេះទេ»។
ក្នុងលិខិតមួយច្បាប់ចុះថ្ងៃទី ១៣ ខែកញ្ញា ឆ្នាំ ២០២៤ ដែលវិទ្យុស្ដ្រីទទួលបានពីលោកស្រី អ៊ុក ឆាយ៉ាវី ប្រធានសមាគមគ្រូមបង្រៀនកម្ពុជាឯករាជ្យ ដែលជាលិខិតមានចុះហត្ថលេខាដោយលោក ប៊ូ ថារិន អគ្គនាយកនិយ័តករគណនេយ្យ និងសវនកម្ម ដែលជាសេនាធិការឱ្យអាជ្ញាធរសេវាហិរញ្ញវត្ថុមិនមែនធនាគារ ដែលស្ថិតក្រោមក្រសួងសេដ្ឋកិច្ច និងហិរញ្ញវត្ថុ បានជូនដំណឹងដល់សមាគមគ្រូបង្រៀនទាក់ទងនឹងក្រសួងសេដ្ឋកិច្ច និងហិរញ្ញវត្ថុ សម្រេចរក្សាពិន័យលើសមាគមឱ្យបង់ប្រាក់ចំនួន ១៨,៨០០,០០០រៀល។ ការពិន័យទឹកប្រាក់នេះ ដោយសារសមាគមគ្រូបង្រៀនកម្ពុជាឯករាជ្យ ពុំបានបំពេញកាតព្វកិច្ចរៀបចំរបាយការណ៍ហិរញ្ញវត្ថុស្របតាមស្ដង់ដាគណនេយ្យ និងមិនបានដាក់បញ្ជូនរបាយការណ៍គណនេយ្យរបស់ខ្លួនមកនិយ័តករជាដើម។
នៅថ្ងៃទី៣០ ខែតុលា សមាគមគ្រូបង្រៀនកម្ពុជាឯករាជ្យ ចេញសេចក្ដីថ្លែងការណ៍មួយ ដោយចាត់ទុកការផាកពិន័យជាទឹកប្រាក់ជាង ១៨លានរៀលនេះ ជាការចាប់បង្ខំសមាគម ក្នុងបំណងបំបិទសំឡេងអង្គការវិជ្ជាជីវៈ។ សេចក្ដីថ្លែងការណ៍ដដែលបន្ថែមទៀតថា សមាគមជាអង្គភាពមិនស្វែងរកប្រាក់ចំណេញ ដែលធ្វើការងារលើកកម្ពស់លក្ខខណ្ឌការងារគ្រូបង្រៀន និងការអប់រំតែប៉ុណ្ណោះ គួរត្រូវបានក្រសួងសេដ្ឋកិច្ច និងហិរញ្ញវត្ថុ លើកលែងការបង់ពិន័យនេះ។
ក្រុមការងារផ្ទៀងផ្ទាត់បានព្យាយាមទាក់ទងទៅអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន ប៉ុន្តែលោកបដិសេធក្នុងការធ្វើសេចក្ដីអត្ថាធិប្បាយ។ យ៉ាងណាលោកបានផ្ញើលិខិតបំភ្លឺរបស់អគ្គនាយកនិយ័តករគណនេយ្យ និងសវនកម្ម ថា និយ័តករ រកឃើញសមាគមគ្រូបង្រៀនកម្ពុជាឯករាជ្យ មិនបានបំពេញកាតព្វកិច្ច ដោយល្មើសនឹងច្បាប់ស្ដីពីគណនេយ្យ និងសវនកម្ម។ ដូច្នេះសមាគម នឹងទទួលរងការពិន័យអន្តរការណ៍ចំពោះបទល្មើសនឹងច្បាប់ស្តីពីគណនេយ្យ និងសវនកម្ម៕
