ភ្នំពេញ៖ គណៈកម្មាធិការអចិន្ត្រៃយ៍នៃរដ្ឋសភា នៅព្រឹកថ្ងៃនេះ បានអនុម័តរបៀបវារៈសំខាន់ៗចំនួន ៣ ទាក់ទិននឹងសំណុំរឿង តំណាងរាស្ត្រគណបក្សសង្គ្រោះជាតិ ដែលកំពុងជាប់ឃុំ តំណាងរាស្ត្រប្រឈមមុខ នឹងការស្នើសុំដកអភ័យឯកសិទ្ធិ ព្រមទាំងករណី លោក កឹម សុខា និងលោក សម រង្ស៊ី។
តាមអ្នករាយការណ៍ព័ត៌មាន កិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភានាព្រឹកនេះ ធ្វើឡើង ដោយមានការចូលរួមផងដែរពីសមាជិកតំណាងរាស្ត្ររបស់គណបក្សសង្គ្រោះជាតិ ដែលជាសមាជិក គណៈកម្មាធិការអចិន្ត្រីយិ៍នៃរដ្ឋសភា។
កាលពីថ្ងៃម្សិលមិញ គណបក្សសង្គ្រោះជាតិអះអាងថា កាលដែលខ្លួនចូលកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភានាព្រឹកនេះគឺដើម្បីប្រាប់ថាធ្វើអ្វីក៏ដោយ ត្រូវគោរពរដ្ឋធម្មនុញ្ញ ជាពិសេសការដកអភ័យឯកសិទ្ធិសភា របស់អ្នកតំណាងរាស្ត្រ ត្រូវអនុលោមតាម មាត្រា៨០នៃរដ្ឋធម្មនុញ្ញ។
គេរំពឹងថារបៀបវារៈនេះ នឹងដាក់ឱ្យមានការជជែកគ្នា នៅក្នុងកិច្ចប្រជុំសភាពេញអង្គខាងមុខនេះ។
កន្លងមក ករណីលោក អ៊ុំ សំអាន ករណី លោក សម រង្ស៊ី និងករណី លោក កឹម សុខា ត្រូវបាន គណបក្សសង្គ្រោះជាតិ ចោទអាជ្ញាធរ និងសភាបក្សកាន់អំណាចថា បានបំពានរដ្ឋធម្មនុញ្ញ ត្រង់មាត្រា ៨០ ប៉ុន្តែសភាបក្សកាន់អំណាច បដិសេធ។
តែជាការកត់សម្គាល់កាលសប្ដាហ៍មុន ក្រសួងយុត្តិធម៌បានស្នើសុំ សភា ព្យួរអភ័យឯកសិទ្ធិសភា តំណាងរាស្ត្រ២រូប គឺលោក ងុប វ៉ាន់ចាន់ និងលោក ពិន រតនា ករណីទាក់ទិនសំណុំ រឿងរបស់លោក កឹម សុខា និងនាងខុម ចាន់តារាទី ហៅស្រីមុំ៕
