loader

លោក សម រង្ស៊ី ថាត្រៀមនឹងធ្វើរឿង ៤ យ៉ាងនៅខែកក្កដានេះ

ភ្នំពេញ៖ លោក សម រង្ស៊ី បានប្រកាសថា ក្នុងខែកក្កដា ឆ្នាំ ២០១៩នេះ លោក និងអ្នកគាំទ្រអតីតគណបក្សសង្គ្រោះជាតិទូទាំងពិភពលោកត្រៀមនឹងធ្វើរឿងចំនួន ៤ យ៉ាង ។

រាយការណ៍ដោយ សោម លាភ

លោក សម រង្ស៊ី ប្រធានស្ដីទីអតីតគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស បានសរសេរលើទំព័រហ្វេសបុករបស់ខ្លួននៅថ្ងៃទី ១១ ខែកក្កដានេះ ដោយរំលេចឡើងនូវបួនព្រឹត្តិការណ៍ ដែលអ្នកគាំទ្រគណបក្សសង្គ្រោះជាតិនឹងត្រូវធ្វើនៅក្នុងខែកក្កដានេះ  ។

សម្រាប់កិច្ចការទីមួយដែលលោក សម រង្ស៊ី ថានឹងត្រូវធ្វើ គឺនៅថ្ងៃទី ១៧ ខែកក្កដា ឆ្នាំ ២០១៩ លោកនឹងទៅរដ្ឋធានីវ៉ាស៊ីនតោន នៃសហរដ្ឋអាមេរិក ដើម្បីបំពេញទស្សនកិច្ចរយៈពេល ២ ថ្ងៃ ។ ដំណើរទស្សនៈកិច្ចនេះ ក៏មានគោលបំណង ជួបពិភាក្សាជាមួយតំណាងរាស្ត្រ និងសមាជិកព្រឹទ្ធសភាអាមេរិក ដែលបានបង្ហាញឆន្ទៈ អមដំណើរថ្នាក់ដឹកនាំគណបក្សសង្គ្រោះជាតិ នៅពេលធ្វើមាតុភូមិនិវត្តន៍ មកកម្ពុជាវិញ ។

ជាងនេះទៅទៀត នៅថ្ងៃទី ១៧ កក្កដាដដែល លោក សម រង្ស៊ី ក៏បានបញ្ជាក់ថា អ្នកគាំទ្រអតីតគណបក្សសង្គ្រោះជាតិ ទូទាំងពិភពលោក ត្រៀមរៀបចំពិធីរំលឹកខួបទី ០៧ នៃការបង្កើតគណបក្សសង្គ្រោះជាតិ នៅទីក្រុងម៉ានីល ប្រទេសហ្វីលីពីន កាលពីថ្ងៃ ១៧ កក្កដា ២០១២ ។

ពីរថ្ងៃបន្ទាប់ ពោលគឺនៅថ្ងៃទី ១៩ ខែកក្កដា  អ្នកគាំទ្រអតីតគណបក្សសង្គ្រោះជាតិ ទូទាំងពិភពលោក ត្រៀមរៀបចំពិធីរំលឹកខួបទី ០៦ នៃការធ្វើមាតុភូមិនិវត្តន៍ របស់លោក សម រង្ស៊ី កាលពីថ្ងៃ ១៩ កក្កដា ២០១៣ ។

កាលពីថ្ងៃទី ១៩ ខែកក្កដា ឆ្នាំ ២០១៣ លោក សម រង្ស៊ី បានវិលត្រឡប់ចូលកម្ពុជាវិញ បន្ទាប់ពីព្រះមហាក្សត្រចេញព្រះរាជក្រិត្យលើកលែងទោសឱ្យលោក ។

ដោយឡែក នៅថ្ងៃ ២៩ ខែកក្កដា ប្រធានស្ដីទីអតីតគណបក្សសង្គ្រោះជាតិសរសេរបន្ថែមទៀតថា អ្នកគាំទ្រគណបក្សសង្គ្រោះជាតិ និងអ្នកស្រលាញ់លទ្ធិប្រជាធិបតេយ្យ ទូទាំងពិភពលោក ត្រៀមធ្វើសកម្មភាព ដើម្បីរំលឹកខួបលើកទី ០១ ដែលលោកថា ជាការរំលឹកខួបនៃការបោះឆ្នោតក្លែងក្លាយ នៅកម្ពុជា កាលពីថ្ងៃ ២៩ កក្កដា ២០១៨ ។

កាលពីការបោះឆ្នោតសភានីតិកាលទី ៦ មានតែគណបក្សប្រជាជនកម្ពុជាតែមួយបក្សតែប៉ុណ្ណោះដែលឈ្នះឆ្នោត មានសម្លេងក្នុងរដ្ឋសភា ។ យ៉ាងណាព្រឹត្តិការណ៍នៃការបោះឆ្នោតនោះ ធ្វើឡើងមានគណបក្សចូលរួមប្រកួតប្រជែងចំនួន ២០ គណបក្ស ប៉ុន្តែមិនមានវត្តមានគណបក្សសង្គ្រោះជាតិ ដែលជាគណបក្សប្រឆាំងធំជាងគេនោះទេ ។

គណបក្សសង្គ្រោះជាតិ ត្រូវបានតុលាការកំពូលរំលាយការពីថ្ងៃទី ១៦ ខែវិច្ឆិកា ឆ្នាំ ២០១៧ ក្រោមហេតុផលនៃការចោទប្រកាន់ថាមេដឹកនាំគណបក្សនេះគឺលោក កឹម សុខា ពីទោសក្បត់ជាតិ ។ តែយ៉ាងណា ការរំលាយគណបក្សសង្គ្រោះជាតិ, ការដកហូតអាសន្នៈសភារបស់មន្ត្រីគណបក្សនេះ, ការរំលាយអាសន្នៈឃុំសង្កាត់របស់មន្ត្រីគណបក្សនេះ និងការហាមឃាត់ដល់មន្ត្រីគណបក្សនេះចំនួន ១១៨ រូបមិនឱ្យធ្វើនយោបាយ គឺធ្វើឡើងទាំងដែលលោក កឹម សុខា មិនទាន់មានសេចក្ដីសម្រេចផ្ដន្ទាទោសជាស្ថាពរនៅឡើយនោះទេ ។

បន្ទាប់ពីការបោះឆ្នោត គ.ជ.ប បានបង្ហាញលទ្ធផលថា មានប្រជាពលរដ្ឋចូលរួមទៅបោះឆ្នោតរហូតដល់ទៅ ៨២,៣ % ។

លទ្ធផលនៃការបោះឆ្នោត អតីតគណបក្សសង្គ្រោះជាតិ សហគមន៍អន្តរជាតិ និងអង្គការអន្តរជាតិមួយចំនួន បានបង្ហាញជំហមិនទទួលស្គាល់លទ្ធផលនេះទេ ។ ពួកគេ តែងតែទទួចឱ្យរាជរដ្ឋាភិបាលកម្ពុជា ស្ដារលទ្ធិប្រជាធិបតេយ្យ សេរីពហុបក្ស ការគោរពសិទ្ធិមនុស្ស និងនីតិរដ្ឋ ។ ជាងនេះ ពួកគេក៏ទាមទារឱ្យមានការដោះលែងលោក កឹម​ សុខា, បើកឱ្យមន្ត្រីអតីតប្រឆាំងអាចធ្វើនយោបាយឡើងវិញ និងឱ្យគណបក្សសង្គ្រោះជាតិរស់ឡើងវិញ ។

យ៉ាងណា លោក សម រង្ស៊ីថា ខ្លួន និងអ្នកគាំទ្រ នឹងជម្រុញសហគមន៍អន្តរជាតិ ឲ្យបន្តការមិនទទួលស្គាល់ការបោះឆ្នោតនៅកម្ពុជា ដែលមិនមានការចូលរួមពីគណបក្សសង្គ្រោះជាតិ ។ លោកថា ការបោះឆ្នោតនេះទៀតសោត គឺផ្ទុយពីកិច្ចព្រមព្រៀងទីក្រុងប៉ារីស ថ្ងៃ ២៣ តុលា ១៩៩១ ។

មន្ត្រីរាជរដ្ឋាភិបាលកម្ពុជា មន្ត្រីគណបក្សប្រជាជនកម្ពុជា តែងតែអះអាងថា ការឆ្នោតកន្លងទៅ ជាការបោះឆ្នោតត្រឹមត្រូវទៅតាមច្បាប់ដែលមានជាធរមាននៅកម្ពុជា ។ ជាងនេះ មន្ត្រីទាំងនោះថា លទ្ធផលនៃការបោះឆ្នោត គឺជាជ័យជម្នះដ៏មហិមា មិនអាចកាត់ថ្លៃបាន ។ ប្រទេសក្នុងតំបន់មួយចំនួន ជាពិសេសប្រទេសកុម្មុយនីស្ត បានស្វាគមន៍ចំពោះលទ្ធផលនោះ ។

យ៉ាងណាមិញ នាយករដ្ឋមន្ត្រីកម្ពុជា សម្ដេច ហ៊ុន សែន តែងតែអះអាងថា កម្ពុជាគោរពរដ្ឋធម្មនុញ្ញយ៉ាងខ្ជាប់ខ្ជួន ដែលរដ្ឋធម្មនុញ្ញតម្រូវឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌ ។

បើទោះបីជារដ្ឋធម្មនុញ្ញ ដែលជាច្បាប់កំពូលចែងអំពីការបោះឆ្នោតបែបនេះក្ដី ក៏សម្ដេច ហ៊ុន សែន តែងតែប្រកាសថា ខ្លួននឹងកាន់អំណាចជានាយករដ្ឋមន្ត្រីមិនតិចជាងពីអាណត្តិទៀតនោះទេ ។

ពាក់ព័ន្ធនឹងការប្រកាសថា នឹងមានការធ្វើមាតុភូមិនិវត្តន៍ពីលោក សម រង្ស៊ី និងមានអន្តរជាតិអមផងនោះ ក្រសួងការបរទេសកម្ពុជាថា នឹងដកទិដ្ឋការរបស់អន្តរជាតិ ដែលអមមកនោះ ។

យ៉ាងណា អ្នកវិភាគថា អន្តរជាតិទាំងនោះ មិនងាយស្រួលក្នុងការចូលកម្ពុជានោះទេ បើមានការដកទិដ្ឋាការមែននោះ ។ ប៉ុន្តែអ្នកវិភាគបន្តថា ពួកគាត់អាចមកតាមច្រកព្រំដែនបាន ដោយមកមុនលោក សម រង្ស៊ី ។

ដោយឡែក ចំពោះវត្តមានរបស់លោក សម រង្ស៊ី និងបក្សពួកមួយចំនួនទៀត សម្ដេច ហ៊ុន សែន ថានឹងកំទេចឱ្យខ្ទេច ៕

បញ្ចេញមតិ

avatar

ព័ត៌មានទាក់ទង

លោកសមរង្ស៊ីធ្វើដំណើរ​ រុលដល់ម៉ាឡេស៊ីខណៈការចូលកម្ពុជាវិញរបស់គាត់កាន់តែខិតជិតមកដល់

Read this article in English ក្រុងភ្នំពេញ៖ បណ[...]

Sam Rainsy traveled to Malaysia as his return to Cambodia drew ever closer

Sam Rainsy traveled to Malaysia as his return to Cambodia drew ever closer

ថ្ងៃសុក្រ ទី១៦ ខែសីហា ឆ្នាំ២០១៩

(Phnom Penh) : Social media has reported on t[...]

ចិនថាកម្ពុជាមានកម្លាំងខាងក្រៅជ្រៀតជ្រែកកិច្ចការផ្ទៃក្នុងរឿងមូលដ្ឋានទ័ព

ភ្នំពេញ៖ ឯកអង្គរដ្ឋទូតនៃសាធារណៈរដ្ឋប្រជាមានិត[...]

ព័ត៏មានថ្មី

វីដេអូថ្មីបំផុត