ខណៈដែលគណបក្សប្រជានកម្ពុជា កំពុងប្រារព្ធ ថ្ងៃជ័យជម្នះ៧មករា ប្រធានគណបក្សប្រឆាំងលោកសម រង្ស៊ីបានសរសេរនៅលើទំព័រហ្វេសប៊ុករបស់លោកថា ថ្ងៃ ៧ មករា ១៩៧៩ គឺជាឆាកល្ខោនដែលយួនបានរៀបចំទាំងអស់។
ប្រធានគណបក្សប្រឆាំងដែលរដ្ឋាភិបាលកម្ពុជាឃាឃាំងមិនឱ្យចូលស្រុក បានសរសេរថា៖ «បើគ្មានយួនកម្មុយនីស្ដពីដើមទី ក៏អត់មានខ្មែរក្រហមដែរ។ ឥឡូវនេះគេថា បើគ្មានថ្ងៃ ៧ មករា ១៩៧៩ ក៏គ្មានអ្វីៗដែលយើងមានសព្វថ្ងៃដែរ។ តែបើគ្មានថ្ងៃ ១៧ មេសា ១៩៧៥ ក៏គ្មានថ្ងៃ ៧ មករា ១៩៧៩ ដែរ»។
លោកសរសេរបន្តថា មួយផ្នែកធំនៃរឿងរ៉ាវទាំងអស់ ក្នុងរយៈពេលជិត ៥០ ឆ្នាំកន្លងមកនេះ គឺមានការរៀបចំយ៉ាងសកម្មដោយយួនកម្មុយនីស្ដ ដើម្បីលេបត្របាក់ទឹកដី និងបំភ័ន្ដភ្នែកប្រជារាស្ត្រខ្មែរ។
សាររបស់លោកបញ្ជាក់ដូចនេះថា៖«យើងត្រូវចងចាំជានិច្ចថា យួនបង្កប់បានញុះញង់ ឲ្យខ្មែរកាប់សម្លាប់ខ្មែរគ្នាឯង ក្រោមរបបខ្មែរក្រហម (១៩៧៥-១៩៧៩)។ មកដល់ពេលនេះទៀត (ឆ្នាំ ២០១៧) ពួកអ្នកបម្រើផលប្រយោជន៍បរទេសឈ្លានពាន ក៏នៅតែរករឿងខ្មែរគ្នាឯង ឥតឈប់ឈរ រហូតដល់លួចសម្លាប់ និងចាប់ដាក់គុក ដើម្បីធ្វើឲ្យប្រទេសជាតិយើង បែកបាក់គ្នា ហើយកាន់តែទន់ខ្សោយ»។
៧ មករា ឆ្នាំ១៩៧៩ ជាថ្ងៃជ័យជម្នះ ប្រវត្តិសាស្ត្រ ដែលបានវាយផ្តួលរំលំរបបប្រល័យពូជសាសន៍ ប៉ុល ពត ។ ប៉ុន្តែជ័យជម្នះនេះ ក៏ជាការរួមចំណែកដ៏ធំធេងមួយផងដែរដោយកងទ័ពវៀតណាម៕
