ទីក្រុងប៉េកាំង៖ លោកស្រី អ៊ុងសាន ស៊ូជី ម្ចាស់ពានរង្វាន់ណូបែលសន្តិភាពពិភពលោករំពឹងថា ប្រទេសចិននឹងគាំទ្រដល់កិច្ចចរចាសន្តិភាពជាប្រវត្តិសាស្ត្រមួយ ជាមួយក្រុមប្រដាប់អាវុធនៅជិតព្រំដែនរួមដែលប្រទេសទាំងពីរតែងតែមានបញ្ហាជារឿយៗកន្លងមកនោះ។ ការថ្លែងរបស់លោក ស៊ូជី គឺធ្វើឡើងនៅកំឡុងដំណើរទស្សនកិច្ចកាលពីថ្ងៃទី១៩ ខែសីហាម្សិលមិញ ដែលដំណើរទស្សន កិច្ចនេះបានផ្តោតលើគម្រោងទំនប់វារីអគ្គិសនីដែលបានជាប់គាំងជាយូរមកហើយនោះ។
លោកស្រីស៊ូជីបានថ្លែងនាទីក្រុងប៉េកាំងខណៈជួបលោកប្រធានាធិបតីចិន លោក Xi Jinping យ៉ាងដូច្នេះថា៖ «យើងជឿជាក់ថា ក្នុងនាមជាប្រទេសជិតខាងល្អមួយ ចិននឹងធ្វើអ្វីគ្រប់យ៉ាងដែលអាចធ្វើបានដើម្បីលើកកម្ពស់ដំណើរការសន្តិភាពរបស់យើង » ។
លោកស្រីបានបន្ថែមទៀតថា៖ «ប្រទេសចិនជាប្រទេសជិតខាងដែលមានព្រំដែនសំខាន់ខ្លាំងណាស់នៅតាមបណ្តោយដែលមានក្រុមប្រដាប់អាវុធជនជាតិភាគតិចជាច្រើនកំពុងរស់នៅ ហើយចិនក៏ជាតួអង្គមួយមានសារៈសំខាន់ក្នុងការសម្រេចបាននូវសន្តិភាពមួយនេះ»។
ប្រទេសមីយ៉ាន់ម៉ានឹងធ្វើសន្និសីទមួយដូចដែលបានគ្រោងទុកជាយូរមកហើយ ជាមួយក្រុមប្រដាប់អាវុធជនជាតិភាគតិចនៅចុងខែនេះ។ លោក ស្រី ស៊ូជី ត្រូវបានគេមើលឃើញថា កំពុងតែធ្វើសកម្មភាពមួយចំនួន ដូចជាការផ្តោតសំខាន់លើសន្តិភាព និងសេដ្ឋកិច្ចជាចម្បងបន្ទាប់ពីគណ បក្សលោកស្រីបានឈ្នះការបោះឆ្នោតភ្លូកទឹកភ្លូកដីកាលពីពេលមុននោះ។ លោកស្រីស៊ូជីបានថ្លែងថា៖«ប្រសិនបើអ្នកសួរខ្ញុំ ថាតើគោល បំណងសំខាន់បំផុតរបស់ខ្ញុំសម្រាប់ប្រទេសរបស់ខ្ញុំគឺអ្វី? គឺថាអ្វីៗដើម្បីសម្រេចបាននូវសន្តិភាព និងសាមគ្គីភាពក្នុងចំណោមប្រជាជនផ្សេងគ្នានៃសហគមន៍របស់យើង »។ «បើគ្មានសន្ដិភាពនោះមិនអាចមានការអភិវឌ្ឍប្រកបដោយនិរន្តរភាពនោះទេ»។
ជម្លោះរវាងជនជាតិភាគតិច ជាមួយក្រុមប្រឆាំងនឹងរដ្ឋាភិបាលបានអូសបន្លាយអស់រយៈពេលជាច្រើនទសវត្សមកហើយ។ ប្រជាជនក្រីក្រនៅទូទាំងប្រទេស និងវត្តមានយោធារបស់ប្រទេសមីយ៉ាន់ម៉ាបានបង្កជាការរាំងស្ទះដល់កិច្ចខិតខំប្រឹងប្រែងក្នុងការកសាងសេដ្ឋកិច្ចរបស់ប្រទេសនេះ បន្ទាប់ពីការបញ្ចប់ការគ្រប់គ្រងរបស់របបយោធា។
មួយចំនួននៃក្រុមជនជាតិភាគតិចនៃប្រទេសមីយ៉ាន់ម៉ា មានតំណភ្ជាប់ទៅនឹងវប្បធម៌ជាមួយនឹងខេត្តយូណានប្រទេសចិន។ ហើយព្រំដែនប្រទេសទាំងពីរក៏ល្បីល្បាញថាមានចរាចរគ្រឿងញៀន, អាវុធ និងត្បូងពេជ្រផងដែរ។
នេះជាដំណើរទស្សនកិច្ចនៅក្រៅប្រទេសទ្រង់ទ្រាយធំលើកដំបូងហើយរបស់លោកស្រី ស៊ូជី ចាប់តាំងពីរដ្ឋបាលរបស់លោកស្រីបានឡើងកាន់អំណាច កាលពីខែមីនាកន្លងទៅ ហើយដំណើរទស្សនកិច្ចនេះត្រូវបានគ្របដណ្តប់ដោយរបៀបវារៈសំខាន់ គឺទំនប់វារីអគ្គិសនី Myitsone គាំទ្រដោយរដ្ឋាភិបាលក្រុងប៉េកាំង ដែលមានទឹកប្រាក់ប្រមាណ ៣,៦ ពាន់លានដុល្លារ។
លោកស្រីស៊ូជីបានអះអាងថា ប្រទេសមីយ៉ាន់ម៉ាបានបង្កើតគណៈកម្មាធិការមួយដើម្បីពិនិត្យគម្រោងការនេះ ដោយមិនប្រាកដថាតើវានឹងត្រូវបានបន្តយ៉ាងណានោះទេ៕
ប្រភពៈCNA
