តាកែវ ៖ ផ្សារណាត់សហគមន៍កសិផលធម្មជាតិរបស់អង្គការសេដាក ដែលជាគម្រោងមួយរបស់អង្គការនេះ អាចជួយឲ្យកសិករដែលផលិតកសិផលកសិកម្មហើយអាចកំណត់តំលៃលក់លើទីផ្សារដោយខ្លួនឯង។ ទន្ទឹមគ្នានេះ បន្លែ ផ្លែឈើ គ្រប់មុខសព្វសារពើរ ដែលអាចលក់ក្រោមស្លាកផ្សារណាត់សហគមន៍កសិផលធម្មជាតិ របស់អង្គការសេដាកបាន ទាល់តែមានការត្រួតពិនិត្យយ៉ាងល្អិតល្អន់ពីអ្នកបច្ចេកទេសខាងដំណាំសរីរាង្គ។
ដើម្បីជ្រាប់ច្បាស់ថាតើ ការលក់ផលិតផលកសិកម្ម «ផ្សារណាត់សហគមន៍» របស់អង្គការសេដាក មានអត្ថប្រយោជន៍យ៉ាងណានោះ សូមនាងកញ្ញា លោក លោកស្រីអញ្ជើញស្តាប់បទយកការណ៍ ដែលចងក្រងដោយ កញ្ញា ប៉ូ សាគុន ដូចតទៅ៖
បើគ្រាន់តែឃើញស្តង់លក់ផលិតផលកសិកម្មដែលមានឈ្មោះថា ផ្សារណាត់សហគមន៍កសិផលធម្មជាតិ របស់អង្គការសេដាក នោះលោកអ្នកប្រហែលជាគិតថា ឲ្យតែដំណាំដែលមិនប្រើថ្នាំគីមី នឹងអាចដាក់លក់ក្រោមស្តង់នេះបានហើយ។ ត្រឹមតែប៉ុណ្ណោះ អ្វីដែលសំខាន់គឺ ផ្សារណាត់សហគមន៍កសិផលធម្មជាតិ យល់ព្រមទទួលផលិតផលកសិកម្មមកដាក់តាំងលក់ទាល់តែម្ចាស់ផលិតផលចូលជាសមាជិករបស់អង្គការនេះ។
ម្យ៉ាងវិញទៀតទាល់តែផលិតផលយកមកលក់នោះ ទទួលបានការតាមដានយ៉ាងល្អិតល្អន់ថាគ្មានសារធាតុគីមី ទើបអាចលក់ក្រោមស្លាកសេដាក «ផ្សារណាត់សហគមន៍» បាន។
បន្ទាប់ពីចូលជាសមាជិកហើយ កសិករត្រូវអនុវត្តបច្ចេកទេសកសិកម្មសរីរាង្គ តាមក្បួនខ្នាតរបស់អង្គការ ហើយអ្វីដែលសំខាន់ទៀតនោះ ដីដែលធ្លាប់តែប្រើជីគីមី ឬ ថ្នាំគីមីនោះ ត្រូវតែសំអាតឲ្យទៅជាដីគ្មានគីមីវិញ ដោយត្រូវប្រើរយៈពេលប្រហែលជាពីរទៅបីឆ្នាំ ។
អ្នកសម្របសម្រួលមូលដ្ឋាននៃគម្រោង «ការកសាងសហគមន៍ជាលក្ខណៈគ្រួសា អាស្រ័យខ្លួនឯងក្នុងប្រទេសកម្ពុជា» លោក អ៊ឹង វុទ្ធី និយាយថា អង្គការសេដាក រៀបចំផ្សារណាត់នៅតំបន់ដែលសេដាកកំពុងសិក្សា តំបន់ណាដែលមានសក្តានុពលក្នុងការផលិតបន្លែសរីរាង្គ។
«យើងរៀបផ្សារណាត់នេះ គឺសម្រាប់តំបន់ដែលសេដាក់កំពុងតែអន្តរាគមន៍ ពិសេសគឺតំបន់ដែលមានសក្តានុពលនៅក្នុងការផលិតបន្លែធម្មជាតិ ឬក៏បន្លែសរីរាង្គ ជាទូទៅការរៀបចំនេះ គឺយើងរៀបចំជាលក្ខណៈជាក្រុម មានន័យថាយើងប្រមូលផ្តុំកសិករដែលគាត់មានការចាប់អារម្មណ៍ដាំបន្លែធម្មជាតិ…»។
លោក អ៊ឹង វុទ្ធី បានបន្ថែមថា បន្លែ ផ្លែឈើ ដែលកសិករដាំទាំងនោះ ត្រូវមានការត្រួតពិនិត្យគុណភាពពីបុគ្គលិករបស់អង្គការសេដាក និងពីក្រុមកសិករខ្លួនឯងផ្ទាល់។
«ជាទូទៅយើងមានក្រុមរបស់យើង គឺយើងរៀបចំក្រុមកសិករដែលជាអ្នកផលិត ហើយយើងជ្រើរើសមានប្រធានក្រុម ដើម្បីឲ្យពួកគាត់ត្រួតពិនិត្យដោយខ្លួនឯង មួយទៀតមានបុគ្គលិកគាត់ចុះទៅតាមផ្ទះកសិករ ហើយក៏មានអ្នកត្រួតពិនិត្យពីអ្នកជំនាញមកពីភ្នំពេញដែរ…»។
កសិករមួយរូបអ្នកស្រី ញែម សុវណ្ណារី ដែលមានបន្លែជាច្រើនមុខ យកមកលក់នៅក្នុងផ្សារណាត់បាននិយាយថា បន្លែដែលអ្នកស្រីយកមកលក់គឺសុទ្ធសឹងជាបន្លែសរីរាង្គ ដែលប្រើថ្នាំសម្លាប់សត្វល្អិតតាមបែបធម្មជាតិទាំងស្រុង។
«បន្លែទាំងអស់នេះសរីរាង្គសុទ្ធព្រោះអីខ្ញុំអត់ប្រើជាតិគីមីទេ ប្រើជីធម្មជាតិជីលាមកមាន់ គោ ហើយកាកសំណល់ឡ។ ចំពោះម្រះអីឲ្យតែចេញក្តឹបផ្លែគឺខ្ញុំយកក៏ដាស់រុំតាំងពីក្តឹបរហូតដល់បេះ ហើយសណ្តែកគូយើងប្រើថ្នាំធម្មជាតិ គឺយើងផ្សំពីរុក្ខជាតិដែលមានជាតិហាង ជាតិល្វី ជាតិហឹល យើងដាក់ត្រាំក្នុងពាង…»។
ផ្សារណាត់សហគមន៍កសិផលធម្មជាតិរបស់អង្គការសេដាក ទទួលបានការគាំទ្រជាច្រើនពីសំណាក់អតិថិជនដែលមកទិញបន្លែនៅទីនោះ។ ពួកគេសុទ្ធតែបាននិយាយថា បន្លែ ផ្លែឈើ ដែលនាំយកមកលក់នៅផ្សារណាត់នេះមិនមានជាតិគីមី ហើយនិងផ្តល់ឲ្យពួកគេនូវសុខភាពល្អ។
អតិថិជនមួយរូបដែលមកទិញបន្លែនៅក្នុងផ្សារណាត់គឺអ្នកស្រី អ៊ុំ ចាន់ធី បាននិយាយថា អ្នកស្រីពេញចិត្តនិងការលក់បន្លែផ្លែឈើដែលមិនមានជាតិគីមី ព្រោះវានិងផ្តល់សុខភាពល្អឲ្យដល់អ្នកបរិភោគ ម្យ៉ាងវិញទៀតជីវភាពអ្នកដាំក៏បានធូរធារបន្ទិចដែរ។
«តាមការពិនិត្យរបស់ខ្ញុំឃើញថា បន្លែនេះវាមិនមានការប្រើជាតិគីមីទេ គិតទៅថាសម្រាប់សុខភាពប្រជាពលរដ្ឋខ្មែរយើងវាបានសុខភាពល្អ ហើយវាបន្ថែមថាមពល…»។
អតិថិជនមួយរូបទៀតអ្នកស្រី អ៊ូ សុខាន់ ក៏បានសម្តែងក្តីរីករាយផងដែរ នៅពេលដែលអ្នកស្រីមកទិញបន្លែ ផ្លែឈើ ធម្មជាតិដែលមិនមានជាតិគីមី។ អ្នកស្រីបានបន្ថែមថា អ្នកស្រីគាំទ្រកសិករដែលដាំបន្លែសរីរាង្គ ហើយអ្នកស្រីនឹងលើកទឹកចិត្តកសិករដោយការជួយទិញផលិផលសរីរាង្គ។
អ្នកស្រី អ៊ូ សុខាន់ បាននិយាយថា ៖ «មកទិញបន្លែធម្មជាតិដោយគឹតថា វាជាផលិតខ្មែរយើងវាគ្មានជាតិគីមី ហូបទៅវាអត់ប៉ះពាល់សុខភាព ប្រៀបធៀបបន្លែនាំចូលជាមួយបន្លែកសិករយើង បានន័យថារបស់កសិករយើងហូបទៅវាអត់ប៉ះពាល់ដល់សុខភាព។ យើងលើកទឹកចិត្តតាមវិធីជួយទិញគាត់ ឲ្យគាត់មានទីផ្សារទើបគាត់មានទឹកចិត្តដាំទៀត…»។
អ្នកសម្របសម្រួលគម្រោងកសិកម្មថ្នាក់ស្រុក អ្នកស្រី ពេញ ស៊ីថា បាននិយាយថា សេដាកបង្កើតផ្សារណាត់សហគមន៍កសិផលធម្មជាតិ មានគោលបំណងសំខាន់គឺចង់រកទីផ្សារឲ្យកសិករលក់កសិផលកសិកម្ម ដើម្បីឲ្យកសិករអាចកំណត់តម្លៃលក់ដោយខ្លួនឯង ហើយម្យ៉ាងគឺមានគោលបំណងលើកទឹកចិត្តដល់កសិករ ឲ្យបង្កើនការផលិតកសិផលរបស់ខ្លួនឱ្យមានគុណភាព។
«ទាក់ទងនឹងផ្សារណាត់គឺយើងបើកឡើងក្នុងគោលបំណងរកទីផ្សារឲ្យកសិករ ដែលគាត់ផលិតបាន ហើយមួយទៀតយើងលើកទឹកចិត្តដល់ពួកគាត់ មានន័យថាយើងជំរុញឲ្យគាត់ផលិត តែបើគាត់មិនមានទីផ្សារទេ គាត់ផលិតតែសម្រាប់ហូបគាត់អស់ទឹកចិត្តផលិត…»។
អ្នកស្រីបានបន្តថា ទំរាំតែអាចឈានដល់ការលក់បន្លែ នៅក្រោមស្លាកផ្សារណាត់នេះបាន សេដាក មានដំណាក់កាលជាច្រើនក្នុងការបង្រៀនកសិករពីរបៀបដាំបន្លែសរីរាង្គ។ ម្យ៉ាងវិញទៀត សេដាកត្រូវពន្យល់កសិករឲ្យយល់ពីគុណប្រយោជន៍នៃការដាំបន្លែសរីរាង្គថែមទៀតផង។
«ការបណ្តុះបណ្តាលមានច្រើនទាក់ទងនឹងការប្រើប្រាស់ជី ព្រមទាំងការប្រើប្រាស់ដី តាំងពីការទុកដាក់ពូជ តាំងពីគាត់អត់ចេះបច្ចេកទេសឲ្យគាត់ចេះបច្ចេកទេស ដល់ពេលជោគជ័យ យើងចាប់ផ្តើមសំឡឹងមើលទីផ្សារបន្ថែមទៀត ថាតើគេត្រូវការផលិតផលសរីរាង្គ ឬអត់…» ។
អ្នកស្រី ពេញ ស៊ីថា បានបន្ថែមថា ផ្សារណាត់សហគមន៍កសិផលធម្មជាតិ បានដំណើរការច្រើនខេត្តហើយ មានដូចជាខេត្តសៀមរាប ខេត្តកំពង់ធំ កំព់ងឆ្នាំ កំពង់ស្ពឺ ខេត្តតាកែវ និងព្រៃវែងផងដែរ ។ ចំពោះការគាំទ្រវិញ អ្នកស្រីសង្កេតឃើញមានអ្នកគាំទ្រច្រើន ជាពិសេសអ្នកដែលគេយល់ដឹងពីអត្ថប្រយោជន៍នៃបន្លែធម្មជាតិ។
ផ្សារណាត់សហគមន៍កសិផលធម្មជាតិ របស់អង្គការសេដាក មានចំនួន ០៦ ទីតាំងនៅតាមបណ្តាខេត្តនានា រួមមាន ខេត្តកំពង់ស្ពឺ ខេត្តកំពង់ធំ ខេត្តកំពង់ឆ្នាំង ខេត្តសៀមរាប ខេត្តត្បូងឃ្មុំ និងខេត្តកំពង់ចាម។
ចំណែកនៅរាជធានីភ្នំពេញមានផ្សាររបស់អង្គការសេដាកចំនួន ០៨ កន្លែង មានដូចជា នៅសាខាកម្ពុជាក្រោម ក្បែពេទ្យលោកសង្ឃ សាខាផ្សារចាស់ ជិតសាកលវិទ្យាល័យន័រតុន សាខាបុរីពិភពថ្មីបឹងឈូក ទល់មុខក្លោងទ្វាផ្សារឈូកមាស សាខាណត់ប្រ៊ីក (NORTH BRIDGE) សាខាអូបែកក្អម សាខាឥន្ទ្រទេវីទួលគោក និងសាខាបឹងសាឡាងជាដើម។
ក្រៅពីការលក់ផលិតផល បន្លែ ផ្លែឈើ សរីរាង្គស្រស់ៗ ផ្សារណាត់សហគមន៍ក៏មានលក់នូវផលិតផលកែច្នៃផងដែរ មានដូចជាត្រីងៀត ត្រីឆ្អើរ សាច់ជ្រូកផាត់ ទឹកត្រី ទឹកស៊ីអ៊ីវ ទឹកម្ទេស សៀងផ្អែម និងប្រហុកផ្អកជាដើម។ ចំណែកឯប្រភេទសាច់វិញមានដូចជាសាច់ជ្រូក សាច់មាន់ និងត្រីផងដែរ។ ផលិតផលកសិកម្មទាំងនេះ គឺសុទ្ធសឹងតែជាស្នាដៃកែច្នៃរបស់កសិករខ្មែរសុទ្ធសាធ៕
