សម្ដេច ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បាន អរគុណ ដល់វេជ្ជបណ្ឌិត Beat Richner ដែលលោកបានចូលរួមយ៉ាងសកម្មជួយដល់កុមារ និងស្ដ្រី រាប់ម៉ឺននាក់នៅកម្ពុជា។ ការថ្លែងសរសើរនិងអរគុណដល់លោកវេជ្ជបណ្ឌិត Beat Richner ដូចនេះ បន្ទាប់ពី សម្ដេច ហ៊ុន សែន បានជួបជាមួយប្រធានាធិបតីប្រទេសស្វីស លោកស្រី Doris Leuthard ក្នុងជំនួបទ្វេភាគីមួយនៅប្រទេសស្វីស។នេះបើតាមហ្វេសប៊ុករបស់ នាយករដ្ឋមន្ដ្រី។
លោកវេជ្ជបណ្ឌិត ប៊េត រីច្ឆនឺរ (Beat Richner) ជាស្ថាបនិកនៃមន្ទីរពេទ្យគន្ធបុប្ផា។ មន្ទីរពេទ្យគន្ធបុប្ផា បានដំណើរការតាំងពីឆ្នាំ១៩៩២ មក។
រៀងរាល់ឆ្នាំរដ្ឋាភិបាលកម្ពុជា បានផ្ដល់ជំនួយទឹកប្រាក់ចំនួន ២លានដុល្លារ និងរដ្ឋាភិបាលប្រទេសស្វីស (Switzerland) ចំនួន ៣លានដុល្លារក្រៅពីនោះប្រធានមន្ទីរពេទ្យ គឺលោក ប៊េត រីច្ឆនឺរ ជនជាតិស្វីស ជាអ្នកស្វែងរកថវិកាពីសប្បុរសជន តាមរយៈការប្រគំតន្ត្រីសប្បុរសធម៌ផ្ទាល់ខ្លួនរបស់លោកដើម្បីទ្រទ្រង់នូវការចំណាយសម្រាប់មន្ទីរពេទ្យនេះ។
មន្ទីរពេទ្យគន្ធបុប្ផា ត្រូវបានប្រជាពលរដ្ឋខ្មែរទទួលស្គាល់ថា ជាមន្ទីរពេទ្យដែលយកចិត្តទុកដាក់លើជីវិតកុមារជាធំ និងព្យាបាលជំងឺមានប្រសិទ្ធភាពដោយមិនយកថ្លៃសេវាព្យាបាល។ មន្ទីរពេទ្យគន្ធបុប្ផាមានពីរកន្លែង នៅរាជធានីភ្នំពេញនិង នៅខេត្តសៀមរាប៕
