loader

ធនាគារពិភពលោក៖ សេដ្ឋកិច្ចកម្ពុជាមានកំណើនស្វាហាប់គឺ៧,៥%ក្នុងឆ្នាំ២០១៨

ភ្នំពេញ៖ កម្ពុជានៅតែបន្តរក្សាបានកំណើនសេដ្ឋកិច្ច ៧,៥ភាគរយនៅក្នុងឆ្នាំ២០១៨ ជាអត្រាកំណើនមួយមានភាពស្វាហាប់និងល្អប្រសើរជាងការរំពឹងទុក។ មូលហេតុនៃភាពលូតលាស់នៃសេដ្ឋកិច្ចនេះ ក៏ដោយសារការជំរុញមួយផ្នែកធំពីការកើនយ៉ាងរហ័សនៃការនាំចេញ និងការបន្តលូតលាស់នៃវិស័យ សំណង់។ តែកំណើនសេដ្ឋកិច្ចនេះនឹងអាចធ្លាក់ចុះបើសិនជា EBA ត្រូវបាត់បង់មែននោះ។ នេះបើយោងតាមរបាយការណ៍របស់ធនគារពិភពលោក (worldbank) ចេញផ្សាយនៅថ្ងៃទី០៦ ឧសភា នេះ។

(លោក កែវ សុខា រាយការណ៍ពីព័ត៌មាននេះ)

 

មិនខុសពីប៉ុន្មានឆ្នាំមុននោះទេ កំណើនសេដ្ឋកិច្ចរបស់ប្រទេសកម្ពុជានៅតែរក្សាបានកំណើនចន្លោះ ៧,៥%រាល់ឆ្នាំ ជាកំណើនសេដ្ឋកិច្ចដែលធនាគារពិភពលោកព្យាករណ៍ថា មានភាពស្វាហាប់។

នៅក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជារប​ស់ធនាគារពិភពលោក(worldbank)  ដែលចេញផ្សាយថ្ងៃនេះ ឱ្យដឹងថា ប្រទេសកម្ពុជាសម្រេចបានកំណើនសេដ្ឋកិច្ច ៧,៥ភាគរយនៅក្នុងឆ្នាំ២០១៨។ បើតាម(worldbank) កំណើននេះជាអត្រាកំណើនល្អជាងការរំពឹងទុកទៅទៀត ដោយមានការជំរុញមួយផ្នែកធំពីការកើនយ៉ាងរហ័សនៃការនាំចេញ និងការបន្តលូតលាស់នៃវិស័យសំណង់។ 

                       ទំនិញនៅកំពុងផែក្រុងព្រះស៊ីហនុ។

 

Worldbank ឱ្យដឹងថា ការនាំចេញរបស់ផលិតផលសម្លៀកបំពាក់ ស្បែកជើង និងមុខទំនិញធ្វើដំណើរ ដែលទាំងអស់នេះមានជាងពីរភាគបីនៃមុខទំនិញនាំចេញសរុប។ នេះជាកំណត់ត្រាកំណើនខ្ពស់រយៈពេលប្រាំឆ្នាំជាប់គ្នា ដោយវិស័យវានភ័ណ្ឌកើនបាន ១៧,៦ភាគរយក្នុងឆ្នាំ២០១៨ ប្រៀបធៀបទៅក្នុងឆ្នាំ២០១៧ មានតែ ៨,៣ភាគរយ។  

ចំណែកវិស័យសំណង់ អចលនទ្រព្យ និងទេសចរណ៍ បានរួមចំណែក ៦០ភាគរយ នៃចំនួនគម្រោងវិនិយោគទាំងអស់ដែលត្រូវបានអនុម័តរួចក្នុងឆ្នាំ ២០១៨នេះ។ ការផលិតសម្ភារផ្គត់ផ្គង់ការសាងសង់ ដែកគ្រឿងសង្ហារឹម និងផលិតផលប្ល៉ាស្ទ៊ីកក៏មានការកើនឡើងយ៉ាងលឿនដែរ ដើម្បីគាំទ្រដល់ការលូតលាស់របស់វិស័យសំណង់។

តែយ៉ាងណា Worldbank ​ទស្សនទាយថា សេដ្ឋកិច្ចកម្ពុជានឹងជួបភាពមិនប្រាកដប្រជាដែលបង្កហានិភ័យខ្លាំងឡើងពីការបាត់បង់EBA។

បច្ចុប្បន្ននេះ ទីផ្សារសហភាពអឺរ៉ុប រួមទាំងចក្រភពអង់គ្លេសផង ស្រូបយកជាងមួយភាគបីនៃទំហំនៃការនាំចេញសរុបរបស់កម្ពុជា ជាពិសេសផលិតផលសម្លៀកបំពាក់ ស្បែកជើង និងទោចក្រយាន។ បើសិនលទ្ធភាពដែលកម្ពុជានឹងអាចបាត់បង់ភាពអនុគ្រោះនាំទំនិញចូលទីផ្សារអឺរ៉ុប ពោលគឺបាត់ប្រព័ន្ធអនុគ្រោះ «គ្រប់មុខទំនិញទាំងអស់លើកលែងគ្រឿងសព្វាវុធ» ឬ(EBA) នោះទំនងជានឹងអាចបន្ថយល្បឿននៃការនាំចេញពីកម្ពុជា។

 

Worldbank បន្ថែមលើនេះ​ វិស័យសំណង់និងអចលនទ្រព្យកាន់តែងាយធ្លាក់ក្នុងវដ្តស្ថានភាពឆាប់ប៉ោងហើយឆាប់ផ្ទុះបែកទៅវិញ ហើយកំណើនការផ្តល់ហិរញ្ញប្បទានក្នុងស្រុកនៅក្នុងវិស័យសំណង់នឹងកាន់តែបង្កើនហានិភ័យថែមទៀតដល់វិស័យហិរញ្ញវត្ថុដែរ។

លោកស្រី អ៊ិនហ្គូណា ដូប្រាចា នាយកគ្រប់គ្រងធនាគារពិភពលោកសម្រាប់ប្រទេសកម្ពុជា មានប្រសាសន៍ថា៖ «ការធ្វើឱ្យប្រសើរឡើងដល់បរិយាកាសវិនិយោគ និងការកាត់បន្ថយថ្លៃចំណាយក្នុងការធ្វើធុរកិច្ច ព្រមទាំងការកសាងជំនាញសម្រាប់សេដ្ឋកិច្ចនាពេលអនាគត សុទ្ធតែជាអាទិភាពគន្លឹះសម្រាប់រក្សាកំណើនខ្លាំងក្នុងរយៈពេលមធ្យម។ ភ័ស្តុតាងនានាបានរំលេចឱ្យឃើញថា ការវិនិយោគទៅលើលើប្រជាជន មានសារៈសំខាន់ណាស់ដើម្បីជំរុញឱ្យមានវឌ្ឍនភាពសេដ្ឋកិច្ច និងការអភិវឌ្ឍប្រកបដោយចីរភាព។ ការវិនិយោគទៅលើប្រជាជន និងការកែលម្អគុណភាពនៃមូលធនមនុស្សរបស់កម្ពុជា គួរតែបន្តនៅជាស្នូលនៃសេចក្តីប្រាថ្នារបស់កម្ពុជាក្នុងការឈានទៅសម្រេចគោលដៅជាសេដ្ឋកិច្ចមានចំណូលមធ្យមខ្ពស់ត្រឹមឆ្នាំ២០៣០។»

របាយការណ៍នេះក៏បានអំពាវនាវផងដែរឱ្យមានការបំពេញភាពខ្វះខាតផ្នែកជំនាញ និងការវិនិយោគទៅលើមូលធនមនុស្ស ដើម្បីផ្តល់ជាគ្រឹះសម្រាប់កំណើនសេដ្ឋកិច្ចរបស់កម្ពុជាយូរអង្វែង។ ការបង្កើនទំហំ និងប្រសិទ្ធផលនៃការវិនិយោគទាំងនេះពីសំណាក់បុគ្គលផ្ទាល់ និងវិស័យសាធារណៈនិងឯកជន អាចជួយធានាឱ្យកុមារកម្ពុជាមានចំណុចចាប់ផ្តើមល្អមួយឆ្ពោះទៅអនាគត ដោយផ្តល់ដល់ពួកគេនូវមូលដ្ឋានគ្រឹះដែលពួកគេត្រូវការចាំបាច់ដើម្បីទាញយកផលអតិបរមាពីការអប់រំសិក្សា ហើយអភិវឌ្ឍជំនាញឱ្យបានច្រើនពេញមួយដំណើរជីវិតរបស់ខ្លួន៕

បញ្ចេញមតិ

avatar

ព័ត៌មានទាក់ទង

តើអ្វីជាភាពខុសគ្នារវាងពន្ធអនុគ្រោះ EBA និងកិច្ចព្រមព្រៀងពាណិជ្ជកម្ម FTA?

ក្រុងភ្នំពេញ៖ នារយៈពេលខ្លីនេះ សហភាពអឺរ៉ុបទើបត[...]

ខែឧសភា ឆ្នាំ២០១៩៖ ចាប់បានរថយន្តដឹកលើសទម្ងន់ ២២១គ្រឿង និងពិន័យជាង ៥០០ លានរៀល

ភ្នំពេញ៖ ក្នុងរយៈពេលមួយខែឧសភា ឆ្នាំ២០១៩ សមត្ថ[...]

កម្ពុជាត្រៀមរៀបចំព្រឹត្តិការណ៍ប្រណាំងកង់លំដាប់ពិភពលោកនៅតំបន់ឆ្នេរដើមឆ្នាំ២០២០

ភ្នំពេញ៖ កម្ពុជាបង្ហាញជំហរគាំទ្រការរៀបចំព្រឹត[...]

ព័ត៏មានថ្មី

វីដេអូថ្មីបំផុត