ហាណូយ ៖ រដ្ឋាភិបាល វៀតណាម បាននិយាយកាលពីថ្ងៃអាទិត្យ ទី១៦ ខែតុលា ម្សិលមិញថា យ៉ាងតិចណាស់មនុស្ស ២១ នាក់បានស្លាប់ ក្នុងគ្រោះធម្មជាតិ ទឹកជំនន់ នៅភាគកណ្តាល ខេត្តចំនួនបួនរបស់វៀតណាមក្នុងសប្តាហ៍នេះ ហើយមនុស្ស ៨ នាក់ ក៏នៅបាត់ខ្លួននៅឡើយ។ គ្រោះទឹកជំនន់ ដែលបណ្តាលឱ្យមានមនុស្សស្លាប់ និងបាត់ខ្លួននេះ គឺចំពេល ព្យុះត្រូពិច មួយបានបក់បោក វាយប្រហារ មកលើប្រទេសវៀតណាម។
មន្ត្រីរដ្ឋាភិបាល វៀតណាម និយាយថា ជនរងគ្រោះ ១៥ នាក់ ជាពលរដ្ឋរស់នៅក្នុងខេត្ត វ៉ាង ប៊ិន (Quảng Bình) ហើយតំបន់នេះ ត្រូវបានគេព្យាករណ៍ថា នឹងរងការវាយប្រហារដោយព្យុះទីហ្វុង សារិកា(Sarika) នៅថ្ងៃពុធសប្តាហ៍នេះទៀត។
លោក ឧបនាយករដ្ឋមន្ត្រី ធិន ឌេនយ៉ូង(Trịnh Đình Dũng) និយាយនៅក្នុងកិច្ចប្រជុំស្តីពី ការរៀបចំសណ្តាប់ធ្នាប់ក្រោយព្យុះទីហ្វុងថា ៖ «យើងត្រូវផ្តោតលើការស្វែងរកអ្នកបាត់ខ្លួននោះ» ។ នេះបើយោងតាមការផ្សាយទូរទស្សន៍វៀតណាម (VTV)»។
លោកនាយករដ្ឋមន្ត្រី ងៀង តានយ៉ូង (Nguyễn Tấn Dũng) បានជំរុញឱ្យអាជ្ញាធរ នៅក្នុងខេត្តជាប់ឆ្នេរសមុទ្រចំនួន ២២ ខេត្ត ត្រូវពង្រឹងគម្រោងហេដ្ឋារចនាសម្ព័ន្ធសំខាន់ៗ និងរៀបចំផែនការជម្លៀសប្រជាជន ហើយរដ្ឋាភិបាល ត្រូវធានាការផ្តល់ជំនួយ ស្បៀងអាហារ នៅក្នុងតំបន់លិចទឹក។
ទូរទស្សន៍រដ្ឋ VTV បានប្រកាសព្រមាន ទស្សនិកជនថា អាងស្តុកទឹកជាច្រើនបានផ្ទុកពេញដោយទឹក ដែលអាចបង្កជាគ្រោះថ្នាក់នៅពេលណាមួយ។ អាជ្ញាធររដ្ឋ បានបង្ហាញរូបភាពនៃមនុស្សដែលជាប់នៅលើដំបូលផ្ទះរបស់ពួកគេ។
មនុស្សប្រមាណ ៥ សែននាក់ត្រូវបានជម្លៀស និងផ្ទះប្រមាណ ១ សែនខ្នងបានលិចទឹក និងខូចខាតដោយទឹកជំនន់។ នេះបើយោងតាមរបាយការណ៍ របស់រដ្ឋាភិបាល៕ ប្រភព៖CNA
