ពលរដ្ឋទាំង ៤នាក់ បានចូលរួមសវនាការនៅតុលាការកំពូល នៅព្រឹកថ្ងៃទី៧ ខែតុលា ឆ្នាំ២០២៤។ រូបភាពពីCCFC។

តុលាការកំពូលនៅព្រឹកថ្ងៃទី៧ ខែតុលានេះ បានបើកសវនាការជំនុំជម្រះករណីវិវាទដីធ្លីរវាងសហគមន៍​ស្រែប្រាំង ស្ថិតនៅខេត្តត្បូងឃ្មុំ ជាមួយក្រុមហ៊ុនចិន Harmony Win Investment ដោយប្រជាសហគមន៍ចំនួន ៤នាក់ ​ដែលរងបណ្ដឹងពីក្រុមហ៊ុនចិន ស្នើឱ្យតុលាការពិចារណាទម្លាក់បទចោទមកលើពួកគេ។ លោក គីម ចាន់ចាវ រាយការណ៍

ជនជាប់ចោទទាំង ៤នាក់នោះរួមមាន៖ អ្នកស្រី ឃឹម សុខជាង លោក វឿន វឿ  លោក ចក់ ជ័យ និងលោក ពុំ ពេជ្រ។ ប្រជាសហគមន៍ទាំងបួននាក់ខាងលើនេះត្រូវសាលាដំបូងបានចោទពីបទ«ធ្វើឱ្យខូចខាតដោយចេតនា មានស្ថានទម្ងន់ទោស​ដោយសា​រការប្រព្រឹត្ត មានបុគ្គលច្រើនរូប ដែលធ្វើសកម្មភាពក្នុងឋានៈ​ជា​សហចារី» ដែល​ប្រព្រឹត្តនៅចំណុចទួលពពែល ស្ថិតក្នុងភូមិសែប្រាំង ឃុំត្រពាំងព្រីង ស្រុកដំបែរ ខេត្តត្បូងឃ្មុំ កាលពីថ្ងៃទី១១ ខែមិថុនា ឆ្នាំ២០២០។

អ្នកស្រី ឃឹម សុខជាង ពលរដ្ឋរងគ្រោះម្នាក់ក្នុងករណីវិវាទដីធ្លីជាមួយក្រុមហ៊ុនចិន ប្រាប់វិទ្យុស្ដ្រីនៅថ្ងៃទី៧ ខែតុលានេះថា ការចូលរួមសវនាការព្រឹកនេះ គឺអនុវត្តទៅតាមដីកាកោះហៅរបស់តុលាការ ពាក់ព័ន្ធនឹងបទចោទខាងលើតាំងពីឆ្នាំ២០២០ នៅចំណុចទួលពពែល ស្ថិតក្នុងភូមិសែប្រាំង ។ ចំពោះលទ្ធផលនៃសវនាការនេះយ៉ាងណា អ្នកស្រីមិនទាន់ដឹងនៅឡើយនោះទេ ប៉ុន្តែចំពោះបទចោទកន្លងមកនេះ គឺអ្នកស្រីបដិសេធថាប្រជាសហគមន៍ពុំបានប្រព្រឹត្តបទល្មើសដូចការចោទប្រកាន់របស់សាលាដំបូងឡើយ។ ជាងនេះអ្នកស្រីអះអាងថា ទំនាស់ដីធ្លីនេះ ធាតុពិតកើតឡើងដោយសារភាគីក្រុមហ៊ុនចិន​ បានរំលោកភយកដីរបស់អ្នកស្រីដែលអាស្រ័យផលតាំងពីដូនតាមក ប៉ុន្តែបែរជាក្រុមហ៊ុនមកប្ដឹងឱ្យអ្នកស្រីមានទោសទៅវិញ។

អ្នកស្រីបន្តរៀបរាប់ទៀតថា ដីដែលក្រុមហ៊ុនចិនរំលោភយក មានទំហំប្រមាណ ៣ហិកតា ដែលស្ថិតនៅក្នុងភូមិស្រែប្រាំង ខណៈដីនេះកន្លងមកអ្នកស្រី និងគ្រួសារ អាស្រ័យផលដាំដំណាំដំឡូងមី។ ប៉ុន្តែចាប់តាំងពីឆ្នាំ២០២០ ដែលក្រុមហ៊ុនរំលោភយកមក អ្នកស្រីថា ក្រុមហ៊ុនមិនបានផ្ដល់សំណងជូនឡើយ ដូច្នេះហើយធ្វើឱ្យគ្រួសារអ្នកស្រីប្រឈមនឹងជីវភាពខ្វះខាតធ្ងន់ធ្ងរ និងត្រូវប្រឈមបណ្ដឹងនៅតុលាការថែមទៀត។

អ្នកស្រី ឃឹម សុខជាង៖ «ពិបាក ណាមួយយើងអត់មានលុយធ្វើដំណើរ ណាមួយខ្លួនយើងឈឺ។ ចុងក្រោយខ្ញុំមានតែស្នើសុំគាត់ឱ្យខាងតុលាការទម្លាក់បទចោទ ព្រោះអីយើងវាក្រខ្សត់អត់មានលុយធ្វើដំណើរចុះឡើងៗ»។

បទចោទប្រកាន់មកលើពលរដ្ឋទាំង ៤នាក់នេះ ត្រូវបានផ្ដន្ទាទោសឱ្យជាប់ពន្ធនាគារក្នុងម្នាក់ៗចំនួន ២ឆ្នាំ ប៉ុន្តែការអនុវត្តទោសនេះ ត្រូវបានព្យួរ។

ចំណែកលោក វឿន វឿ ជនជាប់ចោទម្នាក់ទៀតដែលបានចូលបំភ្លឺតាមដីការបស់តុលាការ ប្រាប់ថា ការចូលរួមសវនាការនេះ គឺតាមដីកាកោះរបស់តុលាការ តាមរយៈការប្ដឹងទាស់របស់លោក និងសមាជិកផ្សេងទៀត ចំពោះការសម្រេចរបស់សាសាឧទ្ធរណ៍ត្បូងឃ្មុំ ដែលឱ្យលោក និងសមាជិក ៣នាក់ផ្សេងទៀតជាប់ពន្ធនាគារចំនួន ២ឆ្នាំ។ ចំពោះបទចោទនេះ លោកអះអាងថា រាល់សកម្មភាពដែលលោក និងសមាជិកផ្សេងទៀតបានធ្វើ គឺគ្រាន់តែទាមទារដីរបស់ខ្លួនត្រឡប់មកវិញប៉ុណ្ណោះ តែបែរជាត្រូវរងការចោទប្រកាន់ថាបានបំផ្លិចបំផ្លាញទ្រព្យរបស់ភាគីក្រុមហ៊ុនទៅវិញ។

យ៉ាងណាការប្ដឹងជំទាស់របស់លោក និងសមាជិក ៣នាក់ទៀត គឺភាគីក្រុមហ៊ុនតែងតែអវត្តមាន ក្នុងការចូលរួមជំនុំជម្រះ ជាក់ស្ដែងបច្ចុប្បន្ននេះមកដល់តុលាការកំពូលហើយ នៅតែក្រុមហ៊ុនចិន មិនមកចូលរួមដដែល។

លោក វឿន វឿ ៖ «ខ្ញុំមានប៉ះពាល់ព្រោះអីខ្ញុំធ្វើក្នុងចំនួនដីហ្នឹងវា ៣ហិកកន្លះដែរ ដល់ពេលឥលូវក្រុមហ៊ុនចិនវាយកអស់ហើយអត់មានអីត្រូវធ្វើទៀត មានតែស៊ីឈ្នួលធ្វើការសំណង់ឱ្យគេ។ ណាមួយកូនខ្ញុំ ក៏មិនបានរៀនតទៅដែរ រៀនបានត្រឹមថ្នាក់ទី៥ ដើរខ្ញុំគេដូចជាខ្ញុំដែរ»។

រូបភាពពីហ្វេសប៊ុកសមាគម​សម្ព័ន្ធ​សហគមន៍​កសិករ​កម្ពុជា (CCFC)។

សូមរំលឹកបន្តិចថា ចាប់តាំងពីឆ្នាំ២០២០ រហូតមកដល់ពេលនេះ ដីដែលក្រុមហ៊ុនចិនរំលោភយកមានទំហំប្រមាណ ៧៥៨ហិកតា ក្នុងនោះមានប្រជាសហគមន៍ចំនួន៣ភូមិ រួមមាន ភូមិកំប្រើស ភូមិត្រពាំងព្រីង និងភូមិស្រែប្រាំង ដែល​ស្ថិត​ក្នុងឃុំត្រពាំងព្រីង ស្រុកតំបែរ ខេត្តត្បូងឃ្មុំ ដោយគ្មានផ្ដល់សំណងអ្វីឡើយ។

ជុំវិញសវនាការនេះ លោកស្រី ម៉ៅ ធីតា អ្នកនាំពាក្យតុលាការកំពូល បដិសេធចំពោះលទ្ធផលនៃសវនាការរបស់ពលរដ្ឋដែលរងគ្រោះដីធ្លីនៅស្រុកតំបែរ ខេត្តត្បូងឃ្មុំ ដោយហេតុផលលោកស្រី ជាប់រវល់ប្រជុំ មិនបានចូលរួមក្នុងសវនាការនេះឡើយ។

លោកស្រី ម៉ៅ ធីតា៖ «ដោយសារព្រឹកនេះខ្ញុំមានកិច្ចការប្រជុំ ហើយនិងការងារសវនាការថ្ងៃនេះ អ៊‌ីចឹងខ្ញុំឆែកជាមួយក្រឡាបញ្ជី»។

យោងតាមឯកសារ​មួយ​ចងក្រង​ដោយសមាគម​សម្ព័ន្ធ​សហគមន៍​កសិករ​កម្ពុជា បាន​បង្ហាញ​ថា ប្រជាពលរដ្ឋ​ក្នុង​សហគមន៍​ស្រែប្រាំង បាន​ចូល​មកកាន់​កាប់ដី​នៅ​តំបន់​នេះ​នៅ​ឆ្នាំ២០០២​។ សហគមន៍​នេះមាន ២៥០គ្រួសារ និង​កាន់កាប់​ដី​ទំហំ ៧៨០ហិ​កតា។

សូមបញ្ជាក់ថា ដី​ព្រៃលិចទឹក​របស់​សហគមន៍​ស្រែប្រាំង និង​សហគមន៍​បុស្ស​ស្នោ ​ទំហំ៥៨០ហិ​កតា ផ្តើម​មាន​ជម្លោះ​ជាមួយ​ក្រុមហ៊ុន​ចិន Harmony Win Investment  ចាប់តាំងពី​ឆ្នាំ២០១៤មក និង​ដី​ទំហំ​ ២០០ហិ​កតា​ទៀតមាន​ជម្លោះ​ជាមួយ​​ឧកញ៉ា ម៉ែ​ន ចាន់​ធឿន។ ចាប់ពី​ពេលនោះ​មក ពលរដ្ឋ​នៅក្នុង​សហគមន៍តែង​ចូលរួម​តវ៉ា និង​ទប់ស្កាត់​ប្រឆាំង​និង​ការ​ឈូស​ឆាយដី​ពីសំណាក់​ក្រុមហ៊ុន និង​បាន​ឡើង​មក​ភ្នំពេញ​ញឹកញាប់ដើម្បី​ដាក់​ញត្តិ​ទៅ​ក្រសួង​ពាក់ព័ន្ធ​ឱ្យ​ជួយ​អន្តរាគមន៍​រក​ដំណោះស្រាយ រួមមាន៖ ​ក្រសួង​ដែនដី ក្រសួងមហាផ្ទៃ និង​ខុទ្ទកា​ល័យ​នាយក​រដ្ឋមន្ត្រី​ ជាដើម៕