ក្រុម Wagner ដែលជាក្រុមទាហានស៊ីឈ្នួលនៅតែជ្រើសរើសអ្នកប្រយុទ្ធនៅទូទាំងប្រទេសរុស្ស៊ីបន្ថែមទៀត បន្ទាប់ពីមានការបះបោរប៉ុន្មានថ្ងៃមកនេះ ដែលនាំឱ្យលោក Vladimir Putin បង្កើនការប្រុងប្រយ័ត្នក្នុងការផ្ទុះសង្គ្រាមស៊ីវិលក្នុងប្រទេសមហាអំណាចមួយនេះ។រាយការណ៍ដោយ…

នៅប្រទេសរុស្ស៊ីគ្មាននរណាម្នាក់ជឿថាក្រុម Wagner ត្រូវបានរំសាយទេ។នៅទីក្រុង Murmansk នៃតំបន់ Arctic ស្ត្រីម្នាក់នៅក្លឹបកីឡា Viking បានបញ្ជាក់ថានាងនៅតែចុះឈ្មោះអ្នកប្រយុទ្ធជាមួយប្រទេសអ៊ុយក្រែន។”នោះជាកន្លែងដែលយើងជ្រើសរើស។ ប្រសិនបើនរណាម្នាក់ចង់ទៅ ពួកគេគ្រាន់តែទូរស័ព្ទមកខ្ញុំ ហើយយើងនឹងកំណត់ថ្ងៃឱ្យគាត់ទៅធ្វើការ។”

បញ្ជីឈ្មោះសម្រាប់ទំនាក់ទំនងរបស់ក្រុម Wagner ភាគច្រើនមាននៅក្លឹប​កីឡា សាលាគុន ​និងក្លឹប​ប្រដាល់​​។មនុស្សមួយចំនួនដែលនិយាយតាមទូរស័ព្ទបានសង្កត់ធ្ងន់ថាជាសមាជិកថ្មីកំពុងចុះកិច្ចសន្យាជាមួយក្រុមទាហានស៊ីឈ្នួល Wagner មិនមែនជាមួយក្រសួងការពារជាតិរុស្ស៊ីទេ។

បុរស​ម្នាក់​នៅ​ក្លឹប​កីឡា Sparta ក្នុង​ទីក្រុង Volgograd បាន​និយាយ​ថា៖ «វា​មិន​ជាប់​ពាក់ព័ន្ធ​នឹង​ក្រសួង​ការពារ​ជាតិ​ទេ។ “គ្មានអ្វីបានឈប់ទេ យើងនៅតែជ្រើសរើសបុគ្គលិកបន្ថែម”។ការបះបោរប្រដាប់អាវុធរបស់ក្រុម Wagner កាលពីចុងសប្តាហ៍មុនកើតឡើងដោយសារតែមានការទាមទារឱ្យក្រុមទាហានស៊ីឈ្នួលទាំងនេះផ្ទេរទៅចូលរួមជាមួយក្រសួងការពារជាតិរុស្ស៊ី។

​សំណុំរឿង​ព្រហ្មទណ្ឌ​ប្រឆាំង​នឹង​ក្រុម​បះបោរនេះ​ត្រូវ​បាន​ទម្លាក់​ចោល​។មេដឹកនាំក្រុម Wagner ត្រូវបានគេអនុញ្ញាតឱ្យមានសេរីភាព ទៅរស់នៅប្រទេសបេឡារុស ហើយ​កងទ័ព​របស់​លោក​ដែល​បាន​ដើរ​ក្បួន​ទៅទីក្រុង​មូស្គូ និង​បាន​បាញ់​ឧទ្ធម្ភាគចក្រ និង​យន្តហោះ​រុស្ស៊ី នៅតែ​មិន​ត្រូវ​បាន​រំសាយ​ទេ។

ស្ត្រីជាអ្នកជ្រើសរើសទាហានស៊ីឈ្នួលនៅ Krasnodar ភាគខាងត្បូងនៃប្រទេសរុស្ស៊ីបាននិយាយយ៉ាងច្បាស់ថា “យើងកំពុងធ្វើការ។ ប្រសិនបើមានអ្វីមួយបានផ្លាស់ប្តូរ ពួកគេនឹងប្រាប់យើង។ ប៉ុន្តែគ្មានអ្វីទេ” ។

ប្រាក់ខែរបស់ទាហានស៊ីឈ្នួលWagnerគឺ £2,175 ប្រហែលស្មើនឹង $2,745 ដុល្លាសហរដ្ឋអាមេរិកក្នុងមួយខែ ហើយត្រូវធ្វើកិច្ចសន្យារយៈពេលប្រាំមួយខែ។

កាលពីថ្ងៃព្រហស្បតិ៍ទី២៩ ខែមិថុនា ប្រធានគណៈកម្មាធិការការពារជាតិនៃរដ្ឋសភារបស់រុស្ស៊ីបាននិយាយថាប្រធានក្រុម Wagner លោកPrigozhin ត្រូវបានព្រមានមុននេះថា កាលបរិច្ឆេទកំណត់សម្រាប់ Wagner ត្រូវចូលជាមួយក្រសួងការពារជាតិគឺមិនអាចចរចាបានទេ។

 លោក វ្ល៉ាឌីមៀ ពូទីន ដែលបានបដិសេធមានទំនាក់ទំនងផ្លូវការជាមួយក្រុម Wagner ជាច្រើនឆ្នាំបានធ្វើការផ្លាស់ប្តូរភ្លាមៗបន្ទាប់ពីមានការបះបោរកាលពីចុងសប្តាហ៍នេះ។ តាមមើលទៅលោកពូទីនព្យាយាមកាត់បន្ថយចំនួនកងទ័ពរបស់លោក Yevgeny Prigozhin ឱ្យនៅទំហំតូច និងបានអះអាងថាក្រុមនេះត្រូវបានរដ្ឋរុស្ស៊ីផ្តល់មូលនិធិឱ្យ 100% ។ កាលពីថ្ងៃសៅរ៍សប្ដាហ៍មុន លោក ពូទីន បានចុះហត្ថលេខាលើច្បាប់មួយ ដែលមានន័យថា មានតែក្រសួងការពារជាតិរុស្ស៊ីទេ ដែលមានសិទ្ធិជ្រើសរើសទាហានក្នុងចំណោមអ្នកជាប់ពន្ធនាគាររុស្ស៊ី ដែលពីមុនអ្នកប្រយុទ្ធWagner បានរើសចេញពីអ្នកទោសទាំងនោះ។ប៉ុន្តែទោះយ៉ាងណាការជ្រើសរើសបុគ្គលិកបន្ថែមរបស់ក្រុមWagner បានបន្តធ្វើកាន់តែទូលំទូលាយជាងមុន។ នៅទីក្រុង Volgograd បុរសម្នាក់បាននិយាយថាប្រសិនបើនរណាម្នាក់ចុះឈ្មោះនៅថ្ងៃនេះ “ខ្ញុំអាចបញ្ជូនគាត់ទៅធ្វើការនៅថ្ងៃស្អែក” ហើយបានបញ្ជាក់ថាឥឡូវនេះប្រទេសបេឡារុស្សគឺជាគោលដៅរបស់ក្រុមនេះ។កាលពីដើមសប្តាហ៍នេះ មេដឹកនាំបេឡារុស លោក Alexander Lukashenko បានសម្រុះសម្រួលបញ្ចប់ការបះបោរកាលពីថ្ងៃសៅរ៍បាននិយាយថា អ្នកប្រយុទ្ធ Wagner ត្រូវបានស្វាគមន៍នៅទីនេះ។លោក​បាន​ថ្លែង​ថា កងទ័ព​បេឡារុស្ស​មាន​អ្វី​ជាច្រើន​ត្រូវ​រៀនសូត្រ​ពី​អ្នកប្រយុទ្ធ Wagner ។ សមាជិក Wagner ជាជនជាតិបេឡារុស្សម្នាក់ បាននិយាយថាក្រុមនេះនឹងក្លាយជាការការពារដ៏ល្អរបស់លោក Lukashenko នៅមុនការបោះឆ្នោតសភានៅឆ្នាំក្រោយ ក្នុងករណីមានការតវ៉ាទ្រង់ទ្រាយធំ ។ស្ត្រីនៅតំបន់ Saratov ភាគកណ្តាលនៃប្រទេសរុស្ស៊ីបាននិយាយថា “សម្រាប់ពេលនេះអ្វីគ្រប់យ៉ាងគឺដូចពីមុន ។ គ្មានអ្វីផ្លាស់ប្តូរទេ” ស្ត្រីរូបនេះបញ្ជាក់ថានាងនៅតែជ្រើសរើសអ្នកប្រយុទ្ធ Wagner ដើម្បីប្រយុទ្ធនៅអ៊ុយក្រែន៕

ប្រភព៖ BBC ថ្ងៃទី៣០ ខែមិថុនា ឆ្នាំ២០២៣