ភ្នំពេញ៖ ការបោះឆ្នោតជ្រើសរើសក្រុមប្រឹក្សាឃុំសង្កាត់ដែលនឹងប្រព្រឹត្តិទៅនៅដើមខែមិថុនា ឆ្នាំ ២០១៧ នឹងចំណាយទឹកប្រាក់ចំនួន ៥៣ លានដុល្លារអាមេរិក។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ថា ការចំណាយនេះ ទៅលើការចុះឈ្មោះបោះឆ្នោត និងត្រៀមរៀបចំការបោះឆ្នោតក្រុមប្រឹក្សា ឃុំ-សង្កាត់ នៅថ្ងៃទី ៤ ខែ មិថុនា ឆ្នាំ ២០១៧។
ថ្លែងក្រោយបញ្ចប់ជំនួបពិភាក្សាការងាររវាងមន្ត្រី គ.ជ.ប និងតំណាងមូលនិធិកូហ្វីអាណាន់ កាលពីរសៀលថ្ងៃទី ១៧ ខែមីនា ម្សិលមិញ លោក ហង្ស ពុទ្ធា បានឱ្យដឹងថា គ.ជ.ប បានត្រៀមរួចជាស្រេចចំពោះដំណើរការបោះឆ្នោតក្រុមប្រឹក្សា ឃុំ-សង្កាត់ ។
តាមលោក ហង្ស ពុទ្ធា ឱ្យដឹងទៀតថាថវិកាទាំងអស់នេះបានមកពី ថវិការបស់ជាតិ របស់សហគមន៍អឺរ៉ុប ជប៉ុន និងជំនួយមកពីប្រទេសចិន។
ការបោះឆ្នោតក្រុមប្រឹក្សាឃុំ-សង្កាត់ នឹងប្រព្រឹត្តិទៅនៅដើមខែមិថុនា ឆ្នាំនេះ ដែលមាន គណបក្សនយោបាយ ចំនួន ១២ ចូលរួមប្រកួប្រកួតប្រជែង។ បេក្ខជនចូលរួមប្រកួតជាង ៩ ម៉ឺននាក់ ដើម្បីដណ្តើមយកឃុំ សង្កាត់ចំនួន ១៦៤៦ ទូទាំងប្រទេស៕
