កំពង់ចាម៖ មន្ដ្រីមូលនិធិសហប្រជាជាតិសម្រាប់ប្រជាជន UNFPA លោកស្រី អាំង សុខចំរើន ដែលធ្វើការលើ ហិង្សាលើស្ដ្រី និងកុមារ ថា ស្ដ្រីកម្ពុជាមួយនាក់ក្នុងចំណោមប្រាំនាក់ មានអាយុចន្លោះពី ១៥ ទៅ៤៩ឆ្នាំ បានទទួលរងនូវអំពើហិង្សាផ្លូវកាយ ផ្លូវភេទ និងផ្លូវចិត្តពីដៃគូស្និទ្ធស្នាល។
ថ្លែងនៅក្នុងកម្មវិធីយុទ្ធនាការ ១៦ថ្ងៃបញ្ឈប់អំពើហិង្សាលើស្ដ្រី និងកុមារ ក្រោមប្រធានបទ «ញ្ឈប់អំពើហិង្សាលើស្ដ្រី និងកុមារចាប់ផ្ដើមពីយើង» នៅខេត្តកំពង់ចាម ថ្ងៃទី២៧ វិច្ឆិកា លោកស្រី អាំង សុខចំរើន មន្ដ្រីកម្មវិធីយេនឌ័រ បានឱ្យដឹងទៀតថា អ្វីដែលកាន់តែព្រួយបារម្ភនោះ គឺ មានស្ដ្រីប្រហែល ៥១ភាគរយ គិតថា បុរសជាប្ដីមានសិទ្ធិប្រព្រឹត្តហិង្សាលើខ្លួន។
លោកស្រី អាំង សុខចំរើន បញ្ជាក់លើចំនុចនេះថា ៖ « វាអាចថា ស្ដ្រីគាត់នៅគិតថា គាត់អត់បានបំពេញតួនាទីជាភរិយាប្រពន្ធល្អ ជាភរិយាល្អ សមតែឱ្យប្ដីគាត់វ៉ៃ»។
តាមលោកស្រី អាំង សុខចំរើន មូលហេតុដែលស្ដ្រីប្រហែល ៥១ភាគរយ គិតថា បុរសជាប្ដីមានសិទ្ធិប្រព្រឹត្តហិង្សាលើខ្លួន គឺដោយសារស្ដ្រីទាំងនោះ គិតថាខ្លួនគាត់ខកខានបំពេញតួនាទីជាភរិយាល្អ ដល់បុរសជាស្វាមី៕
ព័ត៌មានលំអិតនឹងផ្យាយជូន នៅវេលាម៉ោង ៥ រសៀល ថ្ងៃទី ២៨ នេះ។