នៅសល់តែជាង១០ ថ្ងៃទៀតប៉ុណ្ណោះ ជំនួបកំពូលរវាងប្រធានាធិបតីអាមេរិក ដូណាល់ត្រាំ និង មេដឹកនាំកូរ៉េខាងជើង គីម ជុងអ៊ុន នឹងធ្វើហើយ នៅក្នុងប្រទេសសិង្ហបុរី ដែលនេះជាព្រឹត្តិការណ៍អន្តរជាតិ ដ៏វិសេសវិសាលមួយ។
លោក សោមលៀប ជូនសេចក្ដីប្រែសម្រួល ៖
មុនជំនួបចូលមកដល់ ដែលគេរំពឹងថា អាចនឹងធ្វើឡើងនៅថ្ងៃទី ១២ មិថុនា ឃើញថា ប្រទេសជាប់ពាក់ព័ន្ធជាមួយកូរ៉េខាងជើងបានបញ្ជូន ប្រេសិត របស់ខ្លួនជាបន្តបន្ទាប់ទៅជួបលោកគីមជុងអ៊ុន។
ប្រទេសចិន បានបញ្ជូនមន្រ្តីជាន់ខ្ពស់របស់ខ្លួនទៅកាន់ទីក្រុងព្យុងយ៉ាងភ្លាមៗ បន្ទាប់ពី លោកត្រាំសរសេរ លិខិតទៅ លោក គីម ជុងអ៊ុន ប្រាប់អំពីការលុបចោលជំនួបនេះ តែមិនបានប៉ុន្មានថ្ងៃផង ស្រាប់តែ លោកត្រាំ ដូរចិត្ត ហើយយល់ព្រមជួបលោកគីម ជុងអ៊ុនឡើងវិញ។
ដោយសារ សញ្ញាវិជ្ជមាន បញ្ជាក់ថា លោក គីម ជុងអ៊ុន និង លោក ត្រាំ ពិតជាជួបគ្នាមែននោះ ប្រទេសរុស្សីដែលជាសម្ព័ន្ធមិត្តជាមួយកូរ៉េខាងជើង ក៏ត្រៀមឲ្យមានជំនួបមួយកើតឡើងផងដែរ រវាង រដ្ឋមន្រ្តីការបរទេស រុស្សី សេហ្កេឡារ៉ូស ជាមួយនឹងសមភាគីកូរ៉េខាងជើង ហើយជំនួបនេះអាចនឹងធ្វើឡើងឆាប់ៗនេះ ។
តែអ្វីក៏ដោយសញ្ញាវិជ្ជមាន កើតឡើងបន្ទាប់ពី លោក គីម ជុងអ៊ុន និង លោក មូន ជែអ៊ីនប្រធានាធិបតីកូរ៉េខាងត្បូងបានជួបគ្នាមួយលើកទៀត កាលពីថ្ងៃសៅរិ៍ សប្តាហ៍មុន ទើបធ្វើឲ្យ គម្រោងការនៃជំនួបកំពូល គីម ជុងអ៊ុន នឹង លោកត្រាំ អាចនឹងជួបគ្នាបាននៅសប្ដាក្រោយទៀតនោះ។
ជាមួយគ្នានេះ ប្រទេសទាំង ២ អាមេរិក កូរ៉េខាងជើង បានបញ្ជូន មន្រ្តីជាន់ខ្ពស់របស់ខ្លួន ទៅប្រទេសសិង្ហបុរី ដើម្បីរៀបចំពិធីការមួយចំនួនសម្រាប់ កិច្ចប្រជុំកំពូលនេះ។
នៅថ្ងៃទី ៣១ ឧសភា នេះ កូរ៉េខាងជើងបានបញ្ជូន មន្រ្តីជាន់ខ្ពស់ម្នាក់ទៀតដែលជាដៃស្តាំរបស់លោក គីម ជុងអ៊ុន ឲ្យទៅកាន់ទីក្រុងវ៉ាស៊ីនតោន។ ដំណើរទស្សនកិច្ចនេះដឹកនាំដោយ លោក គីម យ៉ុងឈុល ។ លោក បានជួបជាមួយ រដ្ឋមន្រ្តី្កការបរទេសអាមេរិក ម៉ៃ ភុំពៀហើយក្រោយមកបានទទួលទានអាហារជាមួយគ្នា។
តាមបណ្តាញផ្សាយព័ត៌មាន BBC នេះ គឺជាជំនួបចុងក្រោយ រវាងមន្រ្តីជាន់ខ្ពស់នៃប្រទេសទាំង ២ ធ្វើឡើងជាការត្រួសត្រាយផ្លូវដើម្បី ជំនួបលោកគីមជុងអ៊ុន និង លោក ដូណាល់ត្រាំ។
តែយ៉ាងនេះ ក្តី បណ្តាញផ្សាយព័ត៌មានជាច្រើនចុះផ្សាយថា អាមេរិក បានភា្ជប់លក្ខខ័ណ្ឌរួចទៅហើយ
ឲ្យកូរ៉េខាងជើង ទទួលយក គឺការរំលាយ កម្មវិធីអាវុធនុយក្លេអ៊ែរ ដោយសន្យាជួយកសាង ប្រទេសកូរ៉េខាងជើងក្លាយជា ប្រទេសសេដ្ឋកិច្ច ដែលមានសន្តិភាពពេញលេញ។
ទោះបែបនេះ សំណួរមួយបានចោទសួរថា តើអាមេរិកអាចដកទ័ពចេញពីកូរ៉េខាងត្បូងបានដែរឬទេ ហើយបញ្ឈប់ការដាក់ទណ្ឌកម្ម ភ្លាម ទៅរួចនោះទេ។ នេះជាចំណោទមួយដែលធ្វើឲ្យក្រុងវ៉ាស៊ីនតោន ពិបាកនឹងឆ្លើយតប៕
