ភ្នំពេញ៖ ប្រធានស្ដីទីសមាគមគ្រូបង្រៀនកម្ពុជាឯករាជ្យ (CITA) លោកស្រី អ៊ុក ឆាយ៉ាវី បានហៅទង្វើររបស់រដ្ឋមន្ដ្រីក្រសួងអប់រំយុវជន និងកីឡា ថា បានប្រមាថ និងរើសអើងធ្ងន់ធ្ងរដល់ សមាគមគ្រូបង្រៀនកម្ពុជាឯករាជ្យ ករណីមិនឱ្យ CITA ចូលប្រជុំជាមួយយូណេស្កូ។
ការចោទប្រកាន់របស់ប្រធានស្ដីទីសមាគមគ្រូបង្រៀនកម្ពុជាឯករាជ្យ ទៅលើរដ្ឋមន្ដ្រីក្រសួងអប់រំយុវជននិងកីឡា លោក ហង់ ជួនណារ៉ុន នេះ ធ្វើឡើងបន្ទាប់ពីលោក ហង់ ជួនណារ៉ុន មិនអនុញ្ញាតឱ្យសមាគមគ្រូបង្រៀនកម្ពុជាឯករាជ្យចូលរួមបើកកិច្ចប្រជុំតំបន់ប្រចាំឆ្នាំលើកទី៩ នៃក្រុមការងារអប់រំអន្ដរជាតិដើម្បីគ្រូបង្រៀន ដែលចាប់ផ្ដើមនៅថ្ងៃទី០៥ ខែធ្នូ ឆ្នាំ២០១៦នេះ ខណៈលោក ជួនណារ៉ុន ក៏មានវត្តមានដែរ។
លោកស្រី អ៊ុក ឆាយ៉ាវី បានបញ្ជាក់ពីមូលហេតុបន្ថែមដូចនេះថា ៖ «ដោយមានការអញ្ជើញចូលរួមប៉ុន្មានថ្ងៃកន្លងមកហើយ ប៉ុន្ដែនៅថ្ងៃបើកកិច្ចប្រជុំវគ្គដំបូង គឺក្រសួងមិនអោយសមាគមចូលទៅក្នុងសាលប្រជុំ ទើបបាន ហង់ ជួនណារ៉ុន នេះឯងចូលទៅបើក បើសិនសមាគមគ្រូបង្រៀនកម្ពុជាឯករាជ្យមានវត្តមាននៅទីនេះ គាត់និងត្រឡប់ទៅវិញ។ ចឹងដោយសារតែបែបនេះ ទើបយើងសម្រេចចិត្ដថា យើងនឹងត្រឡប់ទៅវិញនៅថ្ងៃនេះដែរ»។
លោកស្រីបានហៅចំពោះទង្វើរបស់រដ្ឋមន្ដ្រីក្រសួងអប់រំនាពេលនេះ ថា ជាការរើសអើង និងថ្កោលទោសចំពោះទង្វើមួយនេះ។
អ្នកស្រី អ៊ុក ឆាយ៉ាវី៖ «ខ្ញុំ សូមថ្កោលទោស ហង់ ជួនណារ៉ុន ដែលមានការរើសអើងចំពោះបុគ្គលិកខ្លួនឯងដែលជារដ្ឋមន្ដ្រីក្រសួងអប់រំ មានការរើសអើងចំពោះបុគ្គលិកខ្លួនឯងដែលស្ថិតនៅក្រោមឱវាទ ដែលជាស្ថាប័នមួយអប់រំដែរ គ្រាន់តែសមាគមគ្រូបង្រៀនកម្ពុជាឯករាជ្យ ទាមទារនូវអ្វីដែលចង់ឱ្យលោកគ្រូ អ្នកគ្រូ មានសេចក្ដីថ្លៃថ្នូរ»។
ជាមួយគ្នានេះ លោកស្រី គឹម តារានី សមាជិកគ្រូបង្រៀនកម្ពុជាឯករាជ្យ ដែលមានវត្តមាននៅក្រៅកិច្ចប្រជុំ បានសម្ដែងការខកចិត្ត។ លោកឱ្យក្រសួងអប់រំ កែប្រែជំហរឡើងវិញ។
តែជាយ៉ាងណា លោក រស់ សាលីន អ្នកនាំពាក្យក្រសួងអប់រំបានស្ដាប់ សំនួររបស់ អ្នករាយការណ៍ព៌ត៌មាន វិទ្យុស្ត្រីដែលបានលើកឡើង ការចោទសួររបស់ប្រធានស្ដីទីសមាគមគ្រូបង្រៀនកម្ពុជាឯករាជ្យ ប៉ុន្តែបែរជាលោកមិនឆ្លើយហើយបានអះអាងថា កំពុងជាប់ប្រជុំ រួចបិទទូរស័ព្ទភ្លាម។
សូមជម្រាបជូនថា កិច្ចប្រជុំប្រចាំឆ្នាំលើកទី០៩ នៃក្រុមការងារអប់រំអន្ដរជាតិដើម្បីគ្រូបង្រៀន ប្រព្រឹត្តទៅនៅរវាង ថ្ងៃទី០៣ ដល់ថ្ងៃទី០៧ខែធ្នូ នៅខេត្តសៀមរាប។ កិច្ចប្រជុំនេះធ្វើឡើងដើម្បីលើកកម្ពស់គ្រូបង្រៀននៅកម្ពុជា៕
