loader

កម្ពុជានឹងទទួលបានកំណើនអ្នកដំណើរតាមអាកាស១០ លាននាក់

ក្រុងភ្នំពេញ៖ ក្រុមហ៊ុនព្រលានយន្តហោះ Cambodia Airports បានបង្ហាញរបាយការណ៏ថា ភ្ញៀវទេសចរ មិនថាភ្ញៀវជាតិអន្តរជាតិ ដែលប្រើប្រាស់មធ្យោបាយតាមដំណើរផ្លូវអាកាសចូលមកកម្ពុជាកំពុងហក់ឡើងខ្លាំងនៅឆ្នាំនេះ ដែលក្រុមហ៊ុននេះ រំពឹងថាកម្ពុជានឹងទទួលអ្នកដំណើរ ១០ លាននាក់នៅចុងឆ្នាំ ២០១៨។

របាយការណ៍នៅឆមាសទី ១​ ឆ្នាំ ២០១៨ របស់ក្រុមហ៊ុនព្រលានយន្តហោះ Cambodia Airports នេះ បានបង្ហាញថា កម្ពុជាទទួលបានអ្នកដំណើរប្រមាណ ៥ លាន នាក់ដែលនេះ គឺជាសន្ទុះមួយដែលកម្ពុជាដាក់ការរំពឹងទុកថា ក្នុងរយៈពេល ៥ ខែ ខាងមុខនេះ កម្ពុជានឹងទទួលបានអ្នកដំណើរ ១០ លាននាក់។

របាយការណ៍បានបង្ហាញទៀតថា ចំនួនអ្នកដំណើរឆ្លងកាត់ព្រលានយន្តហោះអន្តរជាតិទាំង ៣ របស់កម្ពុជាគឺព្រលានយន្តហោះភ្នំពេញអន្តរជាតិ ព្រលានយន្តហោះ ខេត្តសៀមរាប និងខេត្តព្រះសីហនុ មានចំនួន ៥,២ លាននាក់ដែលរាប់ចាប់ពីដើមខែមករា រហូតដល់ខែមិថុនានេះ។ ចំនួននេះ បានកើនឡើង ២៤ ភាគរយធៀបនឹងរយៈពេលដូចគ្នាកាលពីឆ្នាំមុន។

ចំណែកឯ លោក ខែក នរិន្ទដា នាយកផ្នែកទំនាក់ទំនងប្រចាំក្រុមហ៊ុន Cambodia Airports បានផ្តល់បទសម្ភាសន៍ដល់អ្នកសារព័ត៌មានក្នុងស្រុកថា កត្តាបរិយាកាសនយោបាយ និងសេដ្ឋកិច្ចមានផលប្រយោជន៍ខ្លាំងចំពោះកំណើននៃអ្នកដំណើរដែលធ្វើដំណើរមកកាន់ប្រទេសកម្ពុជា  និងបង្កើនចរាចរណ៍នៃអ្នកដំណើរផ្លូវអាកាស។

លោកបានថ្លែងបន្តដោយសុទិដ្ឋិនិយមថា កំណើនអ្នកដំណើរផ្លូវអាកាសក្នុងឆមាសទី ១នេះ នឹងបន្តកើនឡើងនៅក្នុងឆមាសទី ២​ ពោលគឺ កម្ពុជានឹងទទួលបានអ្នកដំណើរផ្លូវអាកាសរហូតដល់ទៅ ១០លាននាក់ នាចុងឆ្នាំ ២០១៨។

លោកថា៖«យើងមានសុទិដ្ឋិនិយមសមហេតុផល ហើយយើងអាចទទួលបានអ្នកដំណើរសរុបប្រមាណ ១០ លាននាក់ជាលើកដំបូងនៅព្រលានយន្តហោះទាំង ៣ នេះ»។

លោកបន្តថា ដំណើរការបោះឆ្នោតថ្នាក់ជាតិ ឆ្នាំនេះ អាចពុំក្លាយជាឧបសគ្គនៃការហោះហើររបស់អ្នកដំណើរផ្លូវអាកាសបានទេ។

លោកថ្លែងបន្តថា៖«យើងអាចមើលឃើញកំណើនចរាចរណ៍ខ្ពស់ខ្លាំងក្នុងចំនួន ២០,៦ ភាគរយនៅត្រីមាសទី២ ដែលជាធម្មតាជារដូវមានអ្នកធ្វើដំណើរតិច»។

ក្នុងឆមាសទី ១ ឆ្នាំ ២០១៨ នេះ ព្រលានយន្តហោះអន្តរជាតិភ្នំពេញទួលបានអ្នកដំណើរសរុប ២,៦លាននាក់ កើនឡើង៣២ ភាគរយធៀបនឹងរយៈពេលដូចគ្នាកាលពីឆ្នាំមុន។

របាយការណ៍ដដែលនេះបង្ហាញទៀតថា  ចរាចរណ៍អ្នកដំណើរផ្លូវអាកាស តាមរយៈព្រលានយន្តហោះអន្តរជាតិសរុប ២,៣ លាននាក់កើនឡើង ១២ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៧ ខណៈដែលព្រលានយន្តហោះ ខេត្តព្រះសីហនុ ទទួលបាន ២៤០ ០០០នាក់ កើនឡើង ៧០ ភាគរយ។

សេចក្តីប្រកាសព័ត៌មានរបស់ក្រុមហ៊ុននេះ មិនបានបែងចែកចំនួនអ្នកដំណើរតាមប្រទេសនោះទេ តែបញ្ជាក់ពីចរាចរណ៍នៃកំណើនអ្នកដំណើរផ្លូវអាកាស ដែលភាគច្រើន គឺភ្ញៀវទេសចរក្នុងស្រុក និងភ្ញៀវទេសចរអាស៊ី ដែលក្នុងនោះមាន ជនជាតិចិន ថៃ ម៉ាឡេស៊ី និងវៀតណាម។

កាលពីឆ្នាំ ២០១៧ ព្រលានយន្តហោះទាំង៣ របស់កម្ពុជាទទួលបានភ្ញៀវទេសចរណ៍អន្តរជាតិ ប្រមាណ ៨.៨ លាននាក់ ដែលនេះ គឺជាកំណើននៃការប្រើប្រាស់មធ្យោបាយផ្លូវអាកាសមកកម្ពុជា។ ប្រសិនបើគ្មានការរងសម្ពាធនយោបាយសេដ្ឋកិច្ចពីសហគមអន្តរជាតិជុំវិញបម្រែបម្រួលនយោបាយ នោះទេ កម្ពុជាអាចនឹងទទួលបានភ្ញៀវទេសចរ ១០ លាននាក់នៅចុងឆ្នាំ ២០១៨។

សូមបញ្ជាក់ថា នេះគឺជាលើកដំបូងហើយដែលកម្ពុជាទទួលបានអ្នកដំណើរ ៥ លាននាក់ជាលើកដំបូងក្នុងឆមាសទី១ នៃរយៈពេលមួយឆ្នាំ។

បើតាមក្រុមហ៊ុន Cambodia Airports បង្ហាញថាព្រលានយន្តហោះ​អន្តរជាតិ​ភ្នំពេញ​ទទួល​បាន​ជើង​ហោះហើរ​ ១៣៥ ក្នុង ១ ​ថ្ងៃ​ជា​មធ្យម​ព្រលាន​យន្តហោះ អន្តរជាតិ​សៀមរាប​ត្រូវ​បាន​រាយការណ៍​ពី​ជើង​ហោះហើរ ១០០ ក្នុង​ ១ ​ថ្ងៃ​ជា​មធ្យម ខណៈ​ព្រលាន​យន្តហោះ​អន្តរជាតិ​ខេត្ត​ព្រះសីហនុ​ទទួល​បាន​ជើង​ហោះហើរ​ចំនួន​ ១៥ ក្នុង ​១ ​ថ្ងៃ​ជា​មធ្យម​។

ក្រុមហ៊ុនអាកាសចរណ៍ ៤៥ កំពុងប្រតិបត្តិនៅក្នុងព្រលានយន្តហោះអន្តរជាតិទាំង ៣ ក្នុងនោះ ៩ ក្រុមហ៊ុនគឺជាក្រុមហ៊ុនក្នុងស្រុក។

បើ​តាម​របាយការណ៍​ប្រចាំ​ឆ្នាំ ​២០១៧ ​របស់​ក្រសួង​ទេសចរណ៍​បង្ហាញ​ថា​ ​ទេសចរ​អន្តរ​ជាតិ​សរុប​មាន​ចំនួន​ជាង​ ៥,៦ ​លាន​នាក់ ​មក​ទស្សនា​កម្ពុជា ​កើន​ឡើង​ ១១,៨​ ភាគ​រយ​ បើ​ធៀប​នឹង​ឆ្នាំ​ ២០១៦​។

នៅ​ក្នុង​នោះ គេ​កត់​សម្គាល់​ឃើញ​ថា ចំនួន​ភ្ញៀវ​ទេសចរ​ចិនបាន​បន្ត​កើន​ឡើង​ជា​បន្ត​បន្ទាប់ ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ។ នៅ​ក្នុង​ឆ្នាំ ២០១៧ ភ្ញៀវ​ទេសចរ​ចិន​បាន​ឈរ​នៅ​លំដាប់​ឈាន​មុខ​គេ​ដែល​មាន​រហូត​ដល់​ជាង​ ១,២​ លាន​នាក់​ កើន​ឡើង ​៤៥,៩​ ភាគ​រយ​ធៀប​នឹង​​ឆ្នាំ​២០១៦ ​ដែល​មាន​តែ​ជាង​ ៨៣ ​ម៉ឺន​នាក់​ប៉ុណ្ណោះ៕

 

បញ្ចេញមតិ

avatar

ព័ត៌មានទាក់ទង

រោងចក្រចំនួន៥ ទើបបង្កើតថ្មីនៅដើមខែសីហានេះផ្តល់ការងារជាង ៦ពាន់កន្លែងដល់កម្មករ

ភ្នំពេញ៖ យ៉ាងហោចណាស់រោងចក្រសហគ្រាសចំនួន៥ បានប[...]

ក្រសួងពាណិជ្ជកម្មអះអាងថា កម្ពុជានាំចេញក្រោមការអនុគ្រោះពន្ធជាង ៦ពាន់លានដុល្លារនៅឆមាសទី១ឆ្នាំនេះ

ភ្នំពេញ៖ លោក ឱក ប៊ុង រដ្ឋលេខាធិការក្រសួងពាណិជ[...]

ភ្ញៀវទេសចរចិនមកលេងកម្ពុជានៅតែបន្តនាំមុខនៅរយៈពេល ៦ខែ ឆ្នាំ ២០១៨នេះ

ភ្នំពេញ៖ រយៈពេល ៦ខែ នាឆ្នាំ ២០១៨នេះ ភ្ញៀវទេសច[...]

ព័ត៏មានថ្មី

វីដេអូថ្មីបំផុត