en     km
en     km

​ស្ត្រី​នៅ​តែ​ជា​ជន​ដ៏​ឆ្នើម​ក្នុង​ការ​ស្វែងរក​ ជម្រក​សម្រាប់​កូន​ (មានសំឡេង)

Share

ភ្នំពេញ​៖​ នៅ​ស​ប្ដា​ហ៍​នេះ​ស្ត្រី​មក​ពី​ភ្នំ​បាត​ស្រុក​ឧត្តុ​ង​ ស្ត្រី​មក​ស្រុកស្រែ​អំបិល​ខេត្តកោះកុង​ បាន​ឡើង​មក​រាជធានី​ភ្នំពេញ​ ដើម្បី​ស្វែងរក​ដំណោះស្រាយ​មួយ​ពី​រដ្ឋាភិបាល​។​ ស្ត្រី​ទាំងនោះ​ បាន​នាំ​ទាំង​កូន​តូច​ក្នុង​គ្រួសារ​មក​ជួយ​មក​ផង​។​ អ្វី​ដែល​ពួក​គាត់​តវ៉ា​ គឺ​ការ​ចង់បាន​ដីធ្លី​ឬ​ផ្ទះសំបែង​មួយ​សមរម្យ​ មាន​ទីកន្លែង​ស្រួល​ប្រកប​មុខរបរ​ទទួលទាន​។​

តាម​រយៈ​សកម្មភាព​នេះ​ គេ​សង្កេត​ឃើញ​ស្ត្រី​បាន​ធ្វើ​សកម្មភាព​កាន់តែ​ខ្លាំង​ជាង​បុរស​ដើម្បី​អនាគត​កូន​និង​ គ្រួសារ​។​ ជា​បន្ត​សូម​អញ្ជើញ​ស្ដាប់​អត្ថាធិប្បាយ​របស់​កញ្ញា​ ឆេ​ង​ ណា​តា​ ដូច​តទៅ​៖

 

ក្រុមស្រ្តីរងគ្រោះដីធ្លីមកពីខេត្តកោះកុងជិត២០០នាក់ ព្រមានថានឹងទៅតវ៉ាដល់ផ្ទះសម្តេច ហ៊ុន សែន
ក្រុមស្រ្តីរងគ្រោះដីធ្លីមកពីខេត្តកោះកុងជិត២០០នាក់ ព្រមានថានឹងទៅតវ៉ាដល់ផ្ទះសម្តេច ហ៊ុន សែន
ស្រី្ត​នៅ​តែ​ដើរតួ​នាទី​យ៉ាង​សំខាន់​ ក្នុង​ការ​រ៉ាប់រង​ទៅ​លើ​គ្រួសារ​ ស្រប​តាម​ពាក្យស្លោក​មួយ​ពោល​ថា​ «​ស៊ូស្លាប់​បា​ កុំឱ្យ​ស្លាប់​មេ​ ស៊ូ​លិច​ទឹក​កណ្តាលទន្លេ​ កុំឱ្យ​តែ​ភ្លើង​ឆេះ​ផ្ទះ​»​។ ​ក្នុង​ន័យ​នេះ​គេ​ចង់​បញ្ជាក់​ពី​ភាព​សំខាន់​របស់​ស្ត្រី​ក្នុង​គ្រួសារ​ដែល​មិន​អាច​ខ្វះ​បាន​។​ បើ​ទោះបីជា​គេ​មើលឃើញ​ថា​ ស្ត្រី​មួយ​ចំនួន​ មិន​អាច​រក​លុយ​ផ្គង់​ផ្គត់​គ្រួ​សារបាន​ តែ​ពួក​គេ​មានការ​ប្តេជ្ញា​ខ្ពស់​ រិះរក​គ្រប់​វិធី​ដើម្បី​ធ្វើ​យ៉ាងណា​ ឱ្យ​គ្រួសារ​មាន​សុភមង្គល​។​

​ជា​ទូទៅ​គ្រួសារ​មួយ​ ប្រសិនបើ​មិន​ឱ្យ​តម្លៃ​ស្មើគ្នា​រវាង​បុរស​និង​ស្ត្រី​ គេ​កម្រ​ឃើញ​គ្រួសារ​នោះ​ទទួល​បាន​សុភមង្គល​ណាស់​។​

​ងាក​មក​ទិដ្ឋភាព​ជាក់ស្តែង​នៅ​ក្នុង​សង្គម​វិញ​ សង្កេត​ឃើញ​ថា​ រាល់​សកម្មភាព​ចេញ​តវ៉ា​អ្វីមួយ​ ជា​ពិសេស​ការ​តវ៉ា​ ដើម្បី​ភាព​រស់នៅ​សមរម្យ​របស់​គ្រួសារ​ឬ​ ការ​តវ៉ា​ដើម្បី​ទទួល​បាន​ជម្រក​វិញ​ គឺ​ស្ត្រី​ចេញ​មុខមុន​ ដើរ​ស្រែក​តវ៉ា​ រហូត​ទទួល​បាន​ដោះស្រាយ​ណាមួយ​។​

​បើ​ទោះបី​ពេល​ខ្លះ​ពួក​គេ​ប្រឈម​មុខ​ នឹង​ការ​ប្រើប្រាស់​អំពើ​ហឹ​ង្សា​ពី​សំណាក់​បុរស​ ឬ​ប្រឈម​មុខ​នឹង​រឿង​ក្តីក្តាំ​ រហូត​ជាប់​ពន្ធនាគារ​ក៏​ដោយ​ ប៉ុន្តែ​ពួក​គេ​មិន​បាន​បញ្ឈប់​សកម្មភាព​របស់​ពួក​គេ​នោះ​ទេ​ ផ្ទុយ​ទៅ​វិញ​ពួក​គេ​កាន់តែ​រុលទៅមុខ​ជា​និច្ច​ តស៊ូ​ដើម្បី​គ្រួសារ​។​

​ជាក់ស្តែង​ ស្ត្រី​នៅ​តំបន់​បឹង​កក​ បាន​ចេញ​តវ៉ា​រាប់​ឆ្នាំ​ ទម្រាំ​បាន​ទទួល​ដីធ្លី​របស់​ពួក​គេ​ឡើង​វិញ​។​ ទម្រាំ​ទទួល​បាន​ចំណែក​ដីធ្លី​ ផ្ទះសម្បែង​មក​វិញ​នេះ​ ពួក​គេ​បាន​ឆ្លងកាត់​បញ្ហា​ជា​ច្រើន​ ដូច​ជា​រង​នូវ​អំពើ​ហឹ​ង្សា​ពី​សមត្ថកិច្ច​ ជាប់​ពន្ធនាគារ​។​

លោកស្រី​ ទេព​ វ​ន្នី​ តំណាង​សមាគម​ន៍​បឹង​កក់​ ដែល​កំពុង​ជាប់​ពន្ធនាគារ​ព្រៃ​ស​ ធ្លាប់​បាន​លើក​ឡើង​ថា​សកម្មភាព​ចេញ​តវ៉ា​របស់​ស្ត្រី​គឺ​ភាគច្រើន​ ជួប​នូវ​ការ​លំបាក​យ៉ាងច្រើន​។​ មួយវិញទៀត​ ដោយសារ​តែ​ពួក​គាត់​សុទ្ធសឹងតែ​ស្ត្រី​មេផ្ទះ​ មាន​កាតព្វកិច្ច​ច្រើន​នៅ​ក្នុងផ្ទះ​ ដូច​ជា​ថែរក្សា​កូន​ ថែរក្សា​ផ្ទះ​និង​បំពេញ​តួនាទី​ជា​ភរិយា​ជាដើម​។​ តែ​យ៉ាងណា​ ពួក​គេ​ត្រូវ​តែ​ តស៊ូ​គឺ​ដើម្បី​គ្រួសារ​ និង​ក្តី​ឈឺចាប់​ដែល​ពួក​គេ​ទទួល​បាន​។​

​ចំណែក​ស្ត្រី​នៅ​សហគមន៍​បុរី​កីឡា​ ក៏​មាន​សកម្មភាព​តស៊ូ​ មិន​ចាញ់​ស្ត្រី​នៅ​តំបន់​បឹង​កក់​ដែរ​។​ ពួក​គេ​តែង​ចេញ​តវ៉ា​ ដើម្បី​ឱ្យ​រដ្ឋាភិបាល​អន្តរាគមន៍​ឱ្យ​ក្រុមហ៊ុន​ផា​ន​អ៊ី​មិច​ ផ្តល់​អាគារ​រស់នៅ​តាម​សន្យា​ដែល​បាន​ព្រមព្រៀង​។​

អ្នកស្រី ផាវ ញ៉ឺង ដែលបានមកតវ៉ារឿងដីធ្លី
អ្នកស្រី ផាវ ញ៉ឺង ដែលបានមកតវ៉ារឿងដីធ្លី
ថ្មីៗ​នេះ​ នៅ​ចុងឆ្នាំ​២០១៦​ និង​ដើមឆ្នាំ​២០១៧​ សកម្មភាព​ចេញ​តវ៉ា​ ដើម្បី​ទទួល​បាន​ដីធ្លី​ផ្ទះសម្បែង​បាន​កក្រើក​ឡើង​វិញ​។​ តែ​យ៉ាងណា​ សកម្មភាព​ចេញ​តវ៉ា​ទាំងនោះ​ ស្រី្ត​នៅ​តែ​ចេញ​មុខ​ជាង​បុរស​។​

​កាលពីដើម​ស​ប្ដា​ហ៍​នេះ​ប្រជាពលរដ្ឋ​ជាង​១០០​នាក់​នៅ​ឃុំ​ជី​ខ​លើ​ ស្រុកស្រែ​អំបិល​ ខេត្តកោះកុង​ ដែល​ភាគច្រើន​ជា​ស្ត្រី​ បាន​ចេញ​ដើរ​តវ៉ា​ យក​ញត្តិ​ទៅ​ដាក់​គ្រប់​ស្ថាប័ន​ពាក់ព័ន្ធ​ ដើម្បី​ដោះស្រាយ​បញ្ហា​ដីធ្លី​របស់​ពួក​គេ​ បន្ទាប់​ពី​រដ្ឋាភិបាល​បាន​សម្បទាន​ឱ្យ​ក្រុមហ៊ុន​ លី​យ៉ុ​ង​ផាត់​ និង​ក្រុម​ ហេង​ ហ៊ុយ​ ដាំ​អំពៅ​។​

​ចំណែក​ការ​តវ៉ា​ របស់​ស្ត្រី​នៅ​សហ​គម​ន៏​បុរី​កីឡា​ កាលពីដើម​នេះ​ដែរ​ នៅ​ពេល​មានការ​ប៉ះទង្គិច​ជា​សមត្ថកិច្ច​ គេ​សង្កេត​ឃើញ​ស្ត្រី​ឈរ​នៅ​ជួរ​មុខ​ ក្នុង​ការ​តស៊ូ​ជាមួយ​សមត្ថកិច្ច​ជា​បុរស​។

​ស្ត្រី​ទាំងនោះ​មក​ពី​ភ្នំ​បាត​បាន​លើកគ្នា​មក​កាន់កាប់​ផ្ទះសំបែង​ពួក​គេ​វិញ​ បើ​ទោះជា​ ត្រូវ​បាន​សមត្ថកិច្ច​ ដេញ​ឱ្យ​ចុះ​ចេញពី​អតីត​អាគារ​ដែល​ពួក​គេ​ធ្លាប់​ រស់នៅ​ក៏​ដោយ​។​ បរាជ័យ​ ពិតមែន​ តែ​នៅ​តែ​បន្ត​ក្រាញននៀល​ ដើម្បី​បានការ​រស់នៅ​សម្រាប់​កូនៗ​។​ ពួក​គាត់​ថា​ បរាជ័យ​ពិតមែនតែ​ជា​សារ​មួយ​ប្រាប់​ថា​ មនុស្ស​ត្រូវការ​ជីវិត​មួយ​មាន​សុខ​ភ​មង្គល​ ដោយ​មានមុខ​របរ​ទទួលទាន​ត្រឹមត្រូវ​ដើម្បី​អនាគត​កូន​។​

​ចំណែក​ស្ត្រី​មក​ពី​ស្រុកស្រែ​អំបិល​ខេត្តកោះកុង​ វិញ​ ក៏​ជា​ក្រុម​ស្រី្ត​ខ្លាំង​មួយ​ដែរ​ គឺ​មក​ដល់​ពេល​នេះ​ នៅ​បន្ត​ដេក​ក្នុង​វត្ត​សាមគ្គី​រង្សី​ ដោយ​ទាមទារ​ឱ្យ​រដ្ឋាភិបាល​ រក​ដំណោះស្រាយ​ឱ្យ​បាន​ទើប​ពួក​គាត់​ត្រឡប់​ទៅ​វិញ​។​  

​និយាយ​ជា​រួម​ទៅ​រយៈពេល​ចុង​ក្រោយ​នេះ​ ស្ត្រី​នៅ​តែ​មាន​សកម្មភាព​ខ្លាំងក្លា​ជាង​បុរស​ក្នុង​ការ​តស៊ូ​ទាមទារ​ ដើម្បី​យ៉ាងណា​ឱ្យ​គ្រួសារ​របស់​ពួក​គេ​មាន​សុភមង្គល​ និង​ជម្រក​រស់នៅ​ដោយ​សមរម្យ​៕​

 

Share

Image
Image
Image