ភ្នំពេញ៖ សម្ដេច ហ៊ុន សែន នាយករដ្ឋមន្ដ្រីកម្ពុជា បានអំពាវនាវជាថ្មីម្ដងទៀត ដល់ ម្ចាស់ផ្ទះជួលទាំងអស់ កុំឲ្យដំឡើងថ្លៃផ្ទះ ខណៈដែលជីវភាពរបស់កម្មករនៅមានកម្រិតនៅឡើយ។ ការអំពាវនាវរបស់សម្ដេច ធ្វើឡើងក្នុងពិធីសម្ពោធរោងចក្រក្រុមហ៊ុន កូកាកូឡាថ្មី ដែលស្ថិតនៅក្នុងតំបន់សេដ្ឋកិច្ចពិសេសភ្នំពេញ នៅថ្ងៃទី០៥ ខែធ្នូ ឆ្នាំ២០១៦នេះ។
សម្ដេច ហ៊ុន សែន បានលើកឡើងបន្ដដូចនេះ៖ « ប្រាក់ខែអប្បបរមានឹងឡើងដល់ ១៥៣ដុល្លារសហរដ្ឋអាមេរិក នៅចាប់ពីខែមករាទៅ ប៉ុន្ដែរៀងរាល់ពេលនៃការដំឡើងបៀរវត្សឱ្យកម្មករ អ្នកផ្ទះជួលទាំងប៉ុន្មានក៏ត្រូវតម្លើងថ្លៃទៅតាម »។
ក្រៅពីការអំពាវនាវនេះ សម្ដេច ក៏បានស្នើសុំទៅកាន់អាជ្ញាធរគ្រប់ជាន់ថ្នាក់ដែលពាក់ព័ន្ធក្នុងរឿងនេះ ឱ្យធ្វើការតាមដាន ម្ចាស់ផ្ទះជួលកុំឲ្យដំឡើងថ្លៃ ជួលផ្ទះ។
សម្ដេច ហ៊ុន សែន ៖«ចឹងទេ ខ្ញុំសុំឱ្យអាជ្ញាធរគ្រប់ជាន់ថ្នាក់ធ្វើការជាមួយម្ចាស់ផ្ទះសំណាក់នានា ឱ្យបានច្បាស់លាស់ ដើម្បីកុំឲ្យពួកគេដំឡើងថ្លៃ បើដំឡើងក៏ដំឡើងរំកិលតិចបានហើយ កុំឲ្យដំឡើងថ្លៃជ្រុលពេក» ។
ដើម្បីលើកស្ទួយជីវភាពកម្មករ តាមរយៈការកាត់បន្ថយការចំណាយ ដូចជា ការជួយតបណ្តាញអគ្គិសនី និងបណ្តាញទឹកដល់បន្ទប់ជួលនោះ សម្តេចនាយករដ្ឋមន្ដ្រី ក៏បានជំរុញឲ្យអាជ្ញាធរអគ្គិសនី និងរដ្ឋាករទឹកបន្តធ្វើការតបណ្តាញទឹក និងអគ្គិសនីបន្ថែមទៀតទៅតាមបន្ទប់ជួលរបស់កម្មករឱ្យបាន គ្រប់បន្ទប់ទៅតាមស្ថានភាពជាក់ស្ដែង៕