ភ្នំពេញ៖សមាជិកព្រឹទ្ធសភាសហរដ្ឋអាមេរិកលោក Ted Cruz បានផ្ញើលិខិតមួយច្បាប់ទៅឯកអគ្គរាជទូតកម្ពុជាប្រចាំនៅទីក្រុងវ៉ាស៊ីនតោន ដើម្បីឲ្យសម្ដេចនាយករដ្ឋមន្ត្រី ហ៊ុន សែន ដោះលែងប្រធានគណបក្សប្រឆាំងលោក កឹម សុខា ឲ្យបានមុនទី៩ ខែវិច្ឆិកា។តែយ៉ាងនេះក្ដីមន្ត្រីជាន់ខ្ពស់រដ្ឋាភិបាលមិនផ្តល់តម្លៃចំពោះលិខិតសមាជិកព្រឹទ្ធសភាអាមេរិករូបនេះទេ។
លិខិតរបស់លោក Ted Cruz សមាជិកព្រឹទ្ធសភាអាមេរិកដែលជាអ្នកនយោបាយមានឥទ្ធិពលម្នាក់ធ្វើឡើងនៅថ្ងៃទី២៣តុលា បានបញ្ជាក់ថាដំណើរការបោះឆ្នោតជ្រើសរើសតំណាងរាស្ត្រឆ្នាំ២០១៨នឹងមិនសេរី ត្រឹមត្រូវ និងយុត្តិធម៌ទេ ប្រសិនបើលោក កឹម សុខា ប្រធានគណបក្សសង្គ្រោះជាតិមិនត្រូវបានដោះលែងមុនថ្ងៃទី៩ ខែវិច្ឆិកា ដែលជាថ្ងៃចុងក្រោយនៃដំណើរការចុះឈ្មោះបោះឆ្នោត។
ឆ្លើយតបទៅនឹងលិខិតប្រតិកម្មអាមេរិកលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបញ្ជាក់ថាការទាមទាររបស់សមាជិកព្រឹទ្ធអាមេរិកគឺគ្មានតម្លៃសម្រាប់ឲ្យកម្ពុជាគោរពតាមនោះទេ។លោក ផៃ ស៊ីផាន បន្ថែមថាទង្វើរបស់សមាជិកព្រឹទ្ធអាមេរិកទាំងនោះកំពុងធ្វើឲ្យឥទ្ធិពលសហរដ្ឋអាមេរិកធ្លាក់ចុះនៅតំបន់អាស៊ាន។
«សហរដ្ឋអាមេរិកគ្រាន់តែជាភាគីដៃគូសន្ទនាក៏ដូចជាដៃគូអភិវឌ្ឍន៍ជាមួយកម្ពុជាដើម្បីរក្សាឥទ្ធិពលរបស់ខ្លួននៅតំបន់អាស៊ានដូច្នេះការបង្គាប់វាមិនមានតម្លៃជាផ្លូវការអត់មានតម្លៃជាផ្លូវច្បាប់ចំពោះកម្ពុជាជារដ្ឋ អធិបតេយ្យមួយ។»
លិខិតរបស់ព្រឹទ្ធសមាជិកសភារូបនេះត្រូវបានបង្ហោះផ្សព្វផ្សាយជាសាធារណៈលើបណ្ដាញសង្គមបានបញ្ជាក់ទៀតថាក្នុងនាមលោកនិង សមាជិកព្រឹទ្ធិសភានិងរដ្ឋសភាដទៃទៀតបានដឹងយ៉ាងច្បាស់អំពីការរារាំងនិងសកម្មភាពទាំងឡាយដើម្បីធ្វើការចោទប្រកាន់ទៅលើលោក កឹម សុខា ដោយយកច្បាស់ ព្រហ្មទណ្ឌមកអនុវត្តហើយឈានដល់ការធ្វើទុក្ខបុកម្នេញទៅលើគណបក្សសង្គ្រោះជាតិ។
ការសម្របសម្រួលផ្លូវច្បាប់របស់បក្សកាន់អំណាចនេះ មានផែនការដើម្បីយកអាសនៈ បក្សប្រឆាំងក្នុងរដ្ឋសភាដោយការរំលាយគណបក្សនេះដែលលោកថានេះជាហេតុផលមួយរបស់ លោកនាយករដ្ឋមន្ដ្រីហ៊ុនសែនព្យាយាមបំផ្លាញស្ថាប័នប្រជាធិបតេយ្យនៅកម្ពុជា។
តាមរយៈនេះលោកព្រឹទ្ធសភាទីនហ្ក្រោស(Ted Cruz)បញ្ជាក់ថាមិនអាចទទួលយកបានទេ ព្រោះជាការ ប៉ុនប៉នបំផ្លាញជំនឿទុកចិត្តរបស់ប្រជាជនក្នុងដំណើរការប្រជាធិបតេយ្យដែលលោកថាត្រូវតែបញ្ឈប់ជាបន្ទាន់។
លោកសមាជិកព្រឹទ្ធសភាបានបញ្ជាក់ទៀតថាបើមិនដោះលែងលោកកឹមសុខានៅមុនថ្ងៃ៩វិច្ឆិកាទេគឺក្នុងនាមលោកនិងសមាជិកព្រឹទ្ធសភានិងសមាជិករដ្ឋសភាដទៃទៀតរួមទាំងរដ្ឋការរបស់លោក ដូណាល់ ត្រាំផងដែរនឹងមានវិធានការណ៍ជាក់ស្ដែងលើមន្ដ្រីរបស់រដ្ឋាភិបាលកម្ពុជា មួយចំនួនគឺ ការឃាឃាំង មិនឱ្យចូលសហរដ្ឋអាមេរិក។
លិខិតរបស់សមាជិកព្រឹទ្ធសភា Ted Cruz បានបន្ថែមទៀតថាក្នុងនាមសហរដ្ឋអាមេរិកជា ភាគីមួយនៃ ហត្ថលេខីកិច្ចព្រមព្រៀងសន្ដិភាពក្រុងប៉ារីស១៩៩១ រួមជាមួយនឹងសហភាពអឺរ៉ុបបណ្ដាញ ហិរញ្ញវត្ថុដទៃទៀតដូចជាធនាគារពិភពលោកធនាគារអភិវឌ្ឍន៍អាស៊ីហើយសម្រាប់អាមេរិកផ្ទាល់ដែលមានវិនិយោគទុនជាមួយកម្ពុជានោះ នឹងពិនិត្យឡើងវិញចំពោះផលប្រយោជន៍ខ្លួនជាមួយនឹងកម្ពុជា។
សូមជម្រាបថាលិខិតរបស់ព្រឹទ្ធសមាជិកសភាអាមេរិកលោកទីនហ្ក្រោស(Ted Cruz)បានធ្វើឡើង បន្ទាប់ពី សមាជិកសភាអាមេរិកនិងសមាជិកព្រឹទ្ធសភាចនម៉ាកខេនដែលជាប្រធានគណៈ កម្មាធិការ សេវាកម្ម អាវុធក៏បានចេញលិខិតដូចគ្នានេះផងដែរជំរុញព្រឹទ្ធសភាអាមេរិកទាំងមូលរៀបចំវិធានការណ៍ ជាក់ស្ដែងដើម្បីដាក់ទណ្ឌកម្មលើកម្ពុជាករណីដែលសមាជិកព្រឹទ្ធសភាចនម៉ាកខេននេះលើកឡើងថាបើពុំមានវិធានការណ៍ទេគឺកម្ពុជាមិនអាចវិលថយក្រោយបានឡើយ។
កាលពីសប្ដាហ៍មុនសហភាពសភាអន្ដរជាតិIPUបានចេញសេចក្ដីសម្រេចឱ្យកម្ពុជាបញ្ឈប់យន្ដការច្បាប់ដើម្បីរំលាយគណបក្សសង្គ្រោះជាតិហើយត្រូវដោះលែងលោកកឹមសុខាឱ្យមានសេរីភាពឡើងវិញ។ក្រុមសមាជិកសភារបស់ស្ថាប័នអន្ដរជាតិនេះបានប្រាប់ថាគេនឹងបញ្ជូនគណៈកម្មាធិការស្វែងរកការពិតមួយក្រុមមកកាន់កម្ពុជាក្នុងពេលដ៏ឆាប់ខាងមុខនេះ។
យ៉ាងនេះក្ដី កាលពីថ្ងៃទី២២ តុលា ក្នុងពិធីជួបសំណេះសំណាលជាមួយកម្មកររោងចក្រកាត់ដេរសម្លៀកបំពាក់ស្បែកជើង សម្ដេចហ៊ុន សែន បាន ទស្សន៍ទាយថាគឺ៩៩ភាគរយ គណបក្សសង្គ្រោះជាតិ នឹងត្រូវបានរំលាយ ហើយលោក កឹម សុខា ត្រូវតែឆ្លង់កាត់ជំនុំជម្រះក្តីករណីអំពើក្បត់ជាតិ៕