ភ្នំពេញ៖ លោក មាជ សុវណ្ណារ៉ា មន្ដ្រីប្រធាននាយកដ្ឋាននៃប្រព័ន្ធផ្សព្វផ្សាយគណបក្សសង្គ្រោះជាតិ បានទទូចឲ្យសម្ដេច ហ៊ុន សែន ធ្វើឲ្យមានស្ដេរភាពនយោបាយ និងសន្ដិភាព មុនពេលដែលកូនសម្ដេចចូលធ្វើនយោបាយ។ តែមន្ដ្រីរាជរដ្ឋាភិបាលឆ្លើយតបថា សន្ដិភាពគឺមានពេញលេញហើយក្រោមការដឹកនាំរបស់សម្ដេច មិនចាំបាច់លោក មាជ សុវណ្ណារ៉ា មកក្រើនរំលឹកនោះទេ។ ប៉ុន្ដែអ្នកឃ្លាំមើលពីការអភិវឌ្ឍសង្គម យល់ស្របការលើកឡើងដូចនេះ ដោយលោកបញ្ជាក់ដែរថា អ្នកធ្វើនយោបាយបើចង់ឲ្យមានកេរ្ដ៍ឈ្មោះបាននៅយូរអង្វែង ក្រៅតែពីការគោរពច្បាប់ រក្សាសន្ដិភាព ចំណុចសំខាន់ទៀតនោះគឺក្រមសីលធម៌ និងសុជីវធម៌ ចំពោះមនុស្សទូទៅក៏ដូចជាពលរដ្ឋជាដើម ។ លោក លៀ ស៊ីណា រាយការណ៍៖
លោក មាជ សុវណ្ណារ៉ា ទទូចឲ្យសម្ដេច នាយករដ្ឋមន្ដ្រី ហ៊ុន សែន ធ្វើឲ្យប្រទេសមានសន្ដិភាពមុននឹង ទុកឱកាសឲ្យកូនរបស់សម្ដេចធ្វើនយោបាយដោយសន្តិវិធី ។ លោក មាជ សុវណ្ណារ៉ា បាននិយាយដូចនេះនៅពេលលោក ត្រូវបានសមត្ថកិច្ចនាំខ្លួនចេញពីរថយន្ដហើយបណ្ដើរចូលក្នុងបន្ទប់សវនាវការ តុលាការកំពូលកាលពីព្រឹកថ្ងៃ ពុធ ទី ១៩ តុលា នេះ ។
ស្ថិតក្នុងសំលៀកបំពាក់ពណ៍ស្លាទុំនិងដៃទាំងពីរជាប់ខ្នោះតែលោក មាជ សុវណ្ណារ៉ា បានហាមាត់និយាយយ៉ាងប្រញាប់ថា៖«ខ្ញុំជឿថាបញ្ហានយោបាយដោះដោយនយោបាយ ហើយលោក ហ៊ុន សែន គាត់ចាស់ហើយ កូនគាត់នៅធ្វើនយោបាយជាមួយគ្នានៅពេលក្រោយទៀតអញ្ចឹង សន្ដិភាពនឹងកើតមាននៅថ្ងៃខាងមុខ»។
ជាមួយគ្នានេះលោកបានប្រាប់អ្នកសារព័ត៌មានទៀតថា អ្នករាយការណ៍ពិសេសអង្គការសហប្រជាជាតិ ផ្នែកសិទ្ធិមនុស្សលោកស្រី រ៉ូណា ស្មីត បានប្រាប់លោកថា គេបានដឹងអស់ហើយអំពីស្ថានភាពតុលាការនៅកម្ពុជា។
លោក មាជ សុវណ្ណារ៉ា៖«លោកស្រី រ៉ូណា ស្មីត បានមកជួបខ្ញុំកាលពីសប្ដាហ៍មុន ដោយគាត់និយាយតុលាការ នៅកម្ពុជាគាត់ដឹងទាំងអស់ហើយ ពិភពលោកក៏គេដឹងដែរ»។
លោក មាជ សុវណ្ណារ៉ា ត្រូវនាំខ្លួនទៅកាន់តុលាការកំពូលកាលពីព្រឹកមិញនេះ គឺក្នុងសំណុំរឿងដែលលោកបានប្ដឹងសុំទៅព្យាបាលជំងឺនៅសហរដ្ឋអាមេរិក។ នៅក្នុងសាវនាការកាលពីព្រឹកមិញនេះ តុលាការកំពូលមិនទាន់សម្រេចថា ប្រធាននាយក នៃប្រព័ន្ធផ្សព្វផ្សាយគណបក្សសង្គ្រោះជាតិរូបនេះ ត្រូវអនុញ្ញាតតាមការស្នើសុំនោះទេ ដោយតុលាការប្រកាសថា នៅថ្ងៃទី ២៦ តុលា ឆ្នាំ ២០១៦ នឹងប្រកាសឲ្យដឹងថា តើត្រូវអនុញ្ញាតតាមការស្នើសុំដែរឬយ៉ាងណា។ កន្លងមកលោក មាជ សុវណ្ណារ៉ា ធ្លាប់ស្នើទៅសភាស៊ើបសួរសាលាឧទ្ធរណ៍ ម្តងរួចមកហើយ ដើម្បីស្នើចេញទៅក្រៅប្រទេសព្យាបាលជំងឺ តែត្រូវបដិសេធចោល។
លោក មាជ សុវណ្ណារ៉ា ត្រូវបានតុលាការ រាជធានភ្នំពេញផ្ដន្ទាទោសឲ្យមានទោស ២០ឆ្នាំពីបទ «ដឹកនាំកុបកម្ម និង អំពើចូលរួមចលនាកុបកម្ម» ប្រព្រឹត្តនៅចំណុចទីលានប្រជាធិបតេយ្យ ក្នុងសង្កាត់វត្តភ្នំ ខណ្ឌដូនពេញ កាលពីថ្ងៃទី១៥ ខែកក្កដា ឆ្នាំ២០១៤ ។ មិនមែនតែលោក មាជ សុវណ្ណារ៉ា ម្នាក់ទេដែលត្រូវបានផ្ដន្ទាទោស គឺមានសកម្មជនគណបក្សសង្គ្រោះជាតិ ១៥រូបទៀត ក៏ត្រូវរងការចោទប្រកាន់ដូចនេះដែរ។
ទាក់ទិន សម្ដីរបស់លោក មាជ សុវណ្ណារ៉ា នេះអ្នកនាំពាក្យគណបក្សប្រជាជនកម្ពុជាលោក សុខ ឥសាន្ដ ដែលបានផ្ដល់បទសម្ភាសន៍ឱ្យ វិទ្យុស្ដ្រីនៅថ្ងៃទី១៩ តុលា នេះថា ការដែល យករឿងខ្លួនប្រព្រឹត្ដិខុសច្បាប់មកដាក់បន្ទុកថា ជារឿងនយោបាយគឺមិនមែនជាលើកដំបូងទេ។
អ្នកនាំពាក្យបក្សកាន់អំណាចបន្ថែមទៀតថា សន្ដិភាពនៅកម្ពុជាដែលដឹកនាំដោយសម្ដេច ហ៊ុន សែន គឺរកបានតាំងតែឆ្នាំ ១៩៩៨ មកម្ល៉េះ មិនចាំបាច់លោក មាជ សុវណ្ណារ៉ា មករំលឹកទៀតនោះទេ។
លោក សុខ ឥសាន្ដ«អញ្ចឹងបានន័យថាយើងមិនបានសន្ដិភាពពេញលេញទេ ទោះបីមានកិច្ចព្រមព្រៀងសន្ដិភាពទីក្រុងប៉ារីសបោះឆ្នោតឆ្នាំ ១៩៩៣ ក៏ដោយ ទើបឆ្នាំ ១៩៩៦ បានសម្ដេច ហ៊ុន សែន ដាក់នយោបាយឈ្នះៗមក ទើបអង្គការចាត់តាំងនយោបាយ យោធាខ្មែរក្រហម ត្រូវដួលរលំហើយយើងបានសន្ដិភាពពេញលេញ ហើយមិនបាច់គាត់ថាទេកម្ពុជារកបានសន្ដិភាពរួចហើយគាត់ថា ហ្នឹងក្រោយគេទេ»។
ករណីលោក លោក មាជ សុវណ្ណារ៉ា និង សកម្មជបក្សប្រឆាំងដែលកំពុងជាប់ឃុំខ្លួន ត្រូវបានអ្នកវិភាគនិងសហគមន៍អន្តរជាតិចាត់ទុក ជារឿងគំនុំនយោបាយ ។
លោក កឹម សុខ អ្នកឃ្លាំមើលការអភិវឌ្ឍសង្គមនិង នយោបាយ លោកយល់ស្របដូចការថ្លែងរបស់លោក មាជ សុវណ្ណារ៉ា ដោយលោកសង្កត់ធ្ងន់ថា អ្នកនយោបាយដែលជាមេដឹកនាំល្អ មិនមែនផ្ដោតតែការអនុវត្ដន៍ច្បាប់មួយមុខទេ គឺត្រូវតែមានសីលធម៌ និងសុជីវធម៌ហើយបើចង់ឲ្យមនុស្សជំនាន់ក្រោយរបស់ខ្លួន អាចឈរក្នុងឆាកនយោបាយប្រកបដោយមោទនភាព និងមិនមានការស្អប់ខ្ពើមពីមនុស្សទូទៅ។
លោក គឹម សុខ៖«អ្នកដឹកនាំបើចង់មានឱកាសដឹកនាំជាតិ ហើយពេលដែលខ្លួនមានឱកាសហើយ ដឹកនាំជាតិបានជោគជ័យជាទីគោរព នៃជនរួមជាតិឈាមរបស់ខ្លួនហ្នឹង អ្នកហ្នឹងទី១ត្រូវបង្ហាញពលរដ្ឋថាខ្លួនគោរពច្បាប់ មានសីលធម៌ សុជីវធម៌ ក្នុងការប្រតិបត្ដិជាក់ស្ដែង នោះទើបនាំជោគជ័យដល់ខ្លួននឹងប្រទេសជាតិ»។
លោក សម រង្ស៊ី ប្រធានគណបក្សសង្គ្រោះជាតិ បានប្ដេជ្ញាថា លោកនឹងវិល ចូលប្រទេសវិញ បើ លោកចូលមក សកម្មជនរបស់លោកទាំងអស់ រួមនឹងអ្នកការសិទិ្ធមនុស្ស ត្រូវបានដោះលែង ឱ្យមានសេរីភាពឡើងវិញ ៕