កំពត៖ កាលពីយប់ថ្ងៃទី ១៤ ខែវិច្ឆិកា ឆ្នាំ២០១៦ មានករណីឧបទ្ទវហេតុលិចទូកទេសចរណ៍មួយគ្រឿងបានកើតឡើងនៅខេត្ដកំពតដែលបណ្ដាលឲ្យមនុស្ស ៤នាក់ស្លាប់បាត់បង់ជីវិតក្នុងនោះមានស្ដ្រី ៣នាក់។
បើតាមការបញ្ជាក់ឲ្យដឹងពីស្នងការនគរបាលខេត្តកំពតលោកឧត្តមសេនីយ៍ ម៉ៅ ច័ន្ទមធុរិទ្ធ ដែលបានប្រាប់វិទ្យុស្ដ្រីFM102 នៅថ្ងៃ អង្គារ ទី ១៥ ខែ វិច្ឆិកា នេះ បញ្ជាក់ថា ទូកទេចរណ៍ដែលដឹកភ្ញៀវប្រមាណជាង ៧០នាក់នោះគឺដាក់ចំនួនមនុស្សលើសប្រមាណ ហើយអ្នកបើកបរខ្វះការប្រុងប្រយ័ត្នទើបធ្វើឲ្យទូកគឿងនឹងដីខ្សាច់ហើយក៏ផ្អៀងក្រឡាប់តែម្ដង។
ក្នុងហេតុការនេះស្នងការនគរបាលខេត្ដកំពតបញ្ជាក់ថា បណ្ដាលឲ្យមនុស្ស ៤នាក់ស្លាប់បាត់បង់ជីវិតដែលក្នុងនោះមានស្ដ្រី ៣នាក់ និងកុមារម្នាក់អាយុ ៩ឆ្នាំ។
លោក ម៉ៅ ច័ន្ទមធុរិទ្ធ៖«ទូកនេះគឺបើកទៅគឿងជាមួយនឹងខ្សាច់ ហើយបើកទៅប្រហែលជាអាចបែកបាតព្រោះទូកឈើហើយវាធ្លាយទឹក ដល់ធ្លាយទឹកទៅប្រជាពលរដ្ឋអ្នកខ្លះក៏លោតទឹក រហូតមកដល់ពេលនេះគឺអ្នកស្លាប់គឺរកឃើញ២នាក់ ហើយនៅបីនាក់ទៀត អ្នកស្លាប់គឺនៅកំពតពីរនាក់នៅភ្នំពេញម្នាក់»។
លោកឧត្ដមសេនីយ៍ ម៉ៅ ច័ន្ទមធុរិទ្ធ ឲ្យដឹងបន្ដថា ភ្ញៀវទេសចរណ៍ទាំងអស់ដែលស្ថិតលើទូកគឺពុំមានភ្ញៀវបរទេសនោះទេ ពោលគឺមានតែភ្ញៀវជាតិតែប៉ុណ្ណោះដែលអ្នកខ្លះជាអ្នកខេត្ដកំពត ហើយអ្នកខ្លះគឺទៅពីភ្នំពេញ និងអ្នកខ្លះទៀតទៅខេត្ដព្រះសីហនុ។
បន្ថែមពីនេះលោកស្នងការនគរបាលខេត្តកំពតបន្តថា ក្រោយហេតុការណ៍លិចទូកភ្លាមៗនគរបាលខេត្ដកំពតបានទៅដល់កន្លែងកើតហេតុជួយសង្គ្រោះប្រជាពលរដ្ឋ ហើយក៏បានឃាត់ម្ចាស់ទូកដើម្បីរៀបចំសំណុំរឿងបញ្ជូនទៅតុលាការផងដែរ។
លោក ម៉ៅ ច័ន្ទមធុរិទ្ធ៖«តៃកុងទូកគឺរត់បាត់ហើយប៉ុន្ដែយើងបានឃាត់ម្ចាស់ទូក ព្រោះម្ចាស់ទូកហ្នឹងយប់មិញគាត់ក៏នៅលើទូកហ្នឹងដែរ គាត់ដាក់ភ្ញៀវច្រើនពេករហូតដល់ ៧០នាក់ ៨០នាក់»។
ជុំវិញអ្នកបាត់ខ្លួនពីរនាក់ទៀតដែលសមត្ថកិច្ចពុំទាន់រកឃើញនៅព្រឹកថ្ងៃទី ១៥ នេះសមត្ថកិច្ចក៏កំពុងតែបន្ដការស្វែងរកជាបន្ដទៀត។ សូមជម្រាបថា ទូកទេសចរណ៍ដែលលិចនេះគឺដឹកភ្ញៀវទេសចរណ៍ដើម្បីទៅមើលអំពិលអំពែកនៅតាមមាត់សមុទ្រហើយក្រោយត្រឡប់មកវិញដល់ចំណុចជិតស្ពានថ្មីក្រុងកំពង ស្រាប់តែទូកនេះក៏បានគឿងនឹងខ្សាច់បណ្ដាលឲ្យបែកបាតទូកហូរទឹកចូលនិងលិចតែម្ដង៕
