ភ្នំពេញ៖ លោក អ៊ូ ច័ន្ទរ័ត្ន អ្នកតំណាងរាស្ដ្រមណ្ឌលខេត្ដតាកែវ មកពីគណបក្សសង្គ្រោះជាតិនៅថ្ងៃទី ២៦ ខែ កញ្ញា ឆ្នាំ ២០១៦ បានសរសេរលិខិតមួយច្បាប់ដាក់ជូនអភិបាល នៃគណៈអភិបាល រាជធានីភ្នំពេញលោក ប៉ា សុជាតិវង្ស ដោយ សុំឲ្យបំភ្លឺលើលិខិតរបស់លោកដែឡចុះថ្ងៃទី ១៧ ខែ សីហា ឆ្នាំ ២០១៦ ស្ដីពីសំណើសុំតម្កល់រូបសំណាក់លោកបណ្ឌិត កែម ឡី នៅក្នុងបរិវេណទីលានប្រជាធិបតេយ្យ ។
លិខិតដែលដដែលនេះបានឲ្យដឹងថា ក្រោយពីបានដាក់លិខិតស្នើសុំតម្កល់រូបសំណាក់លោកបណ្ឌិត កែម ឡី តាំងពីថ្ងៃទី ១៧ ខែ សីហា ឆ្នាំ ២០១៦ រហូតមកដល់ថ្ងៃទី ២៦ កញ្ញា គឺនៅតែមិនទាន់ទទួលបានការឆ្លើយតបពីអភិបាលរាជធានីភ្នំពេញនៅឡើយ ។ បន្ថែមពីនេះលិខិតបន្ដថាទាំង លោក អូ ច័ន្ទរ័ត្ន ក៏ដូចជាយុវជន និង ប្រជាពលរដ្ឋដែលគោរពស្រលាញ់លោកបណ្ឌិត កែម ឡី សង្ឃឹមថា លោកអភិបាលរាជធានីភ្នំពេញនឹងឯកភាពលើសំណើនេះ ឲ្យបានមុនកម្មវិធីបុណ្យខួបគម្រប់ ១០០ថ្ងៃ នៃមរណភាពលោកបណ្ឌិត ដែលនឹងប្រារព្ធឡើងនៅថ្ងៃទី ១៤ ដល់ថ្ងៃទី ១៧ ខែ តុលា ឆ្នាំ ២០១៦ ខាងមុខ ។
ទាក់ទិនលិខិតនេះ អ្នកនាំពាក្យសាលារាជធានីភ្នំពេញលោក មាន ចាន់យ៉ាដា បានប្រាប់វិទ្យស្ដ្រីFM102 នៅថ្ងៃទី ២៧ កញ្ញានេះដោយលោកមានប្រសាសន៍ថា នៅរយៈពេលនេះសាលារាជធានីភ្នំពេញនៅមិនទាន់អាចឆ្លើយតបនឹងលិខិតរបស់លោក អ៊ូរ ច័ន្ទរ័ត្ន បានទេ ដោយត្រូវរង់ចាំការប្រជុំពិភាក្សាគ្នាជាមុនសិន ។ ប៉ុន្ដែលោកបញ្ជាក់ថា សាលារាជធានីភ្នំពេញនឹងឆ្លើយតបចំពោះសំណើនេះ បន្ទាប់ពីសាលារាជធានីភ្នំពេញបានជួបប្រជុំគ្នារួចរាល់ ។ លោក មាន ចាន់យ៉ាដា«បាទយើងនឹងឆ្លើយតបចំពោះរឿងហ្នឹងបាទ ប៉ុន្ដែយើងមិនទាន់កំណត់ថាពេលវេលាណានោះទេ ដោយយើងរវល់កម្មវិធីការងារអាទិភាពរបស់សាលារាជធានីភ្នំពេញជាច្រើនយើងមិនទាន់បានប្រជុំរឿងហ្នឹងទេបាទ»។
គួរជម្រាបដែរថា កាលពីថ្ងៃទី ២៣ ខែ កញ្ញា គណៈកម្មការបុណ្យខួបគម្រប់ ១០០ថ្ងៃ របស់លោកបណ្ឌិតគឺ លោក សៅ កុសល់ បានឲ្យវិទ្យុស្ដ្រីដឹងថា រហូតមកដល់ពេលនេះ ពុំទាន់មានសម្បុរសជនណាសន្យាផ្ដល់ដំណឹងដល់គណៈកម្មការបុណ្យក្នុងការជួលទីតាំងប្រារព្ធពិធីបុណ្យនេះនៅឡើយទេ ។ លោកបញ្ជាក់ថា កន្លែងមួយចំនួនធំដែលក្រុមគណៈកម្មការបុណ្យ ស្នើសុំសុទ្ធសឹងតែត្រូវបានបដិសេធ ៕