ភ្នំពេញ៖ អគ្គិសនីកម្ពុជាបានអំពាវនាវទៅកាន់អតិថិជនដែលប្រើប្រាស់សេវាអគ្គិសនីកម្ពុជាទាំងអស់ អោយចូលរួមទប់ស្កាត់អ្នកចែកចាយសេវាកម្មអគ្គសនី ឬបុគ្គលិកអគ្គិសនីកម្ពុជា ណាដែលបានប្រព្រឹត្តិអំពើខិលខូច ទារថ្លៃសេវាលើសពីការកំណត់របស់អាជ្ញាធរជាតិអគ្គិសនីកម្ពុជា។ នេះបើតាមហ្វេសប៊ុករបស់អគ្គិសនីកម្ពុជានៅថ្ងៃទី ២៨ ខែវិច្ឆិកា ឆ្នាំ២០១៧នេះ។
តាមសេចក្ដីជូនដំណឹងនេះ បញ្ជាក់ថា ការចូលរួមពីអតិថិជន គឺជាការកែទម្រង់ការយកថ្លៃផ្សេងៗក្នុងវិស័យអគ្គិសនីនៅកម្ពុជាឲ្យបានត្រឹមត្រូវ ។
បច្ចុប្បន្នការផ្តល់សេវានិងការយកថ្លៃផ្សេងៗក្នុងវិស័យអគ្គិសនីនៅកម្ពុជាត្រូវអនុវត្តដោយបុគ្គលិករាប់ម៉ឺននាក់នៅ ទូទាំងប្រទេស ក្នុងក្របខណ្ឌបុគ្គលិករបស់អគ្គិសនីកម្ពុជា EDC ផង និងរបស់អ្នកកាន់អាជ្ញាប័ណ្ណឯកជនផង ។
តាមការបញ្ជាក់ក្នុងសេចក្ដីជូនដំណឹងរបស់អាជ្ញាធរជាតិអគ្គិសនីកម្ពុជាដដែល កន្លងមកមានបុគ្គលិកខ្លះបានប្រព្រឹត្តអំពើ ខិលខូចយកថ្លៃខុសពីការកំណត់ ក្នុងនោះក៏មានការណែនាំជាច្រើនលើកច្រើនសារ ។ តែលើកនេះ ដើម្បីបោសសំអាតបញ្ហាខុសឆ្គងនេះឲ្យអស់ នឹងស្នើសុំឲ្យប្រជាពលរដ្ឋទាំងអស់ជួយចូលរួមជាមួយ៕