ភ្នំពេញ៖ នាពេលបច្ចុប្បន្ននេះ ការចូលរួមរបស់ស្ត្រីក្នុងវិស័យមុខងារសាធារណៈនៅកម្ពុជានៅមានកម្រិតទាបនៅឡើយ គឺមានត្រឹម ៣៩% ប៉ុណ្ណោះ បើធៀបទៅនឹងបុរសក្នុងតួនាទី ឬតំណែងក្នុងវិស័យមុខងារសាធារណៈនេះដូចគ្នា។
ចំនួននៃការចូលរួមរបស់ស្ត្រីមានកម្រិតទាបនេះ មិនអាចធ្វើឱ្យមានសមភាពយេនឌ័រក្នុងការសម្រេចចិត្តផ្សេងៗទាក់ទងវិស័យមុខងារសាធារណៈរបស់រាជរដ្ឋាភិបាលបានឡើយ។ នេះជាការលើកឡើងរបស់មន្ត្រីក្រសួងមុខងារសាធារណៈ ក្នុងសិន្និសីទថ្នាក់ជាតិស្តីអំពីស្ត្រីលើកទីបី នាថ្ងៃទី១២ ខែកុម្ភៈ ឆ្នាំ២០១៦ នេះ នៅសណ្ឋាគារកាំបូឌីយ៉ាណា រាជធានីភ្នំពេញ។
លោក ហ៊ឹម ថុកលឹម អនុប្រធាននាយកដ្ឋានមណ្ឌលធនធានអាស៊ាន-កម្ពុជា និង សហប្រតិបត្តិការអន្តរជាតិនៃក្រសួងមុខងារសាធារណៈ មានប្រសាសន៍ថា គិតត្រឹមខែធ្នូ ឆ្នាំ ២០១៥ កន្លងទៅ ការចូលរួមរបស់ស្ត្រីក្នុងវិស័យមុខងារសាធារណៈនៅកម្ពុជានៅមានកម្រិតទាបនៅឡើយ។
លោកថា កត្តាដែលនាំឱ្យស្ត្រីមានការចូលរួមក្នុងកិច្ចការសាធារណៈមានកម្រិតទាបនេះ ដោយសារស្ត្រីពុំទាន់ទទួលបានព័ត៌មាននានាទូលំទូលាយពីសង្គមកម្ពុជា ជាពិសេសស្ត្រីដើរតួនាទីច្រើននៅក្នុងគ្រួសារ ការលើកទឹកចិត្តដល់ស្ត្រីនៅមានកម្រិត ព្រមទាំងស្ត្រីខ្លួនឯង មិនព្រមផ្ដល់ឱកាសឱ្យខ្លួនចូលរួមក្នុងកិច្ចការសាធារណៈ។
លោក ហ៊ឹម ថុកលឹម បានបន្តទៀតថា ដើម្បីឱ្យមានវត្តមានស្ត្រីក្នុងការសម្រេចចិត្តស្មើនឹងបុរស ស្ត្រីត្រូវតែរៀន ផ្តល់ឱកាសដល់ខ្លួនឯងឱ្យបានច្រើន ដោយលះបង់ភាពខ្មាសអៀន និងគំនាបទាំងឡាយដែលមាននៅក្នុងសង្គមខ្មែរ។ លោកថា រដ្ឋាភិបាលនឹងជំរុញឱ្យមានវត្តមានស្ត្រីកាន់ច្រើនក្នុងវិស័យមុខងារសាធារណៈរបស់រដ្ឋ។ ក្នុងនោះដែររដ្ឋាភិបាលនឹងផ្តល់ការបណ្តុះបណ្តាលផ្សេងៗដល់ស្ត្រីឱ្យមានតួនាទីក្នុងក្រសួងស្ថាប័នរដ្ឋទាំងអស់ ឱ្យមានសមត្ថភាពកាន់តែប្រសើរឡើង ដើម្បីចូលរួមធ្វើកិច្ចការ និងការសម្រេចចិត្តរួមគ្នាជាមួយបុរសក្នុងការចូលរួមអភិវឌ្ឍសង្គមជាតិ។
ទន្ទឹមគ្នានេះដែរ លោកស្រី ចាន់ សុធាវី អគ្គលេខាធិការងក្រុមប្រឹក្សាជាតិដើម្បីស្ត្រី មានប្រសាសន៍ថា វត្តមានរបស់ស្ត្រីនៅក្នុងការសម្រេចចិត្តនៅក្នុងកិច្ចការក្រសួង-ស្ថាប័នរដ្ឋ ឬវិស័យផ្សេងៗពិតជាសំខាន់ និងមិនអាចខ្វះបានឡើយ។ លោកស្រី ចាន់ សុធាវី បានសង្កត់ធ្ងន់ថា នៅពេលដែលស្ត្រីមានភាពក្លាហ៊ាន មានចំណេះដឹងខ្ពស់ ស្ត្រីអាចបំពេញកិច្ចការបានយ៉ាងប្រសើរ ស្ទើរគ្រប់វិស័យទាំងអស់ ក្នុងនោះអ្វីដែលសំខាន់បំផុតស្ត្រីអាចសម្រេចចិត្តទាំងក្នុងវិស័យសេដ្ឋកិច្ច និង នយោបាយនៅក្នុងសង្គម។
សូមជម្រាបថា សន្និសីទថ្នាក់ជាតិស្តីអំពីស្ត្រីលើកទីបីនេះ ធ្វើឡើងក្រោមប្រធានបទ៖ «ការធ្វើឱ្យគោលដៅអភិវឌ្ឍន៍ ប្រកបដោយចីរភាពដំណើរការសម្រាប់ស្ត្រី និងក្មេងស្រីនៅប្រទេសកម្ពុជា»។ សន្និសីទថ្នាក់ជាតិស្តីអំពីស្ត្រីនេះ មានក្នុងគោលបំណង ផ្តល់ទម្រង់សកម្មភាពថ្នាក់ជាតិ ជំរុញឱ្យមានសមភាពយេនឌ័រ និងពង្រឹងភាពអង់អាចដល់ស្ត្រី និងក្មេងស្រី ស្របតាមអាទិភាពថ្នាក់ជាតិសំខាន់ៗ ដូចមានចែងក្នុងនារីរតនៈ ទី៤ និងគោលដៅទី៥ នៃគោលដៅអភិវឌ្ឍន៍ប្រកបដោយចីរភាព៕