ភ្នំពេញ ៖ ស្ដ្រី មេឃុំ ចៅសង្កាត់ របស់គណបក្សសង្គ្រោះជាតិ បានបង្ហាញជំហររបស់ពួកគេថា មិនចាកចេញពីគណបក្សនេះឡើយ បើទោះបីជាបក្សត្រូវបានរំលាយ។ ក្រុមស្ដ្រីទាំងនោះបញ្ជាក់ថា ពួកគាត់សុខចិត្ដធ្វើជាពលរដ្ឋសាមញ្ញ ជាជាងក្បត់ឆន្ទៈរបស់ពលរដ្ឋ។ ការសន្យារបស់ស្ត្រី មេឃុំទាំងនោះ ជាការឆ្លើយតទៅនឹងប្រសាសន៍របស់សម្ដេច ហ៊ុនសែន ដែលណែនាំឲ្យក្រុមប្រឹក្សាឃុំសង្កាត់គណបក្សសង្គ្រោះជាតិចុះចូលជាមួយគណបក្សប្រជាជន មុនគណបក្ស ប្រឆាំងនេះត្រូវបានរំលាយ។
អ្នកស្រី ជួង ឈុននី មេឃុំ គណបក្សសង្រ្គោះជាតិ នៅឃុំព្រះប្រសប់ ខេត្ដកណ្ដាល
ស្ដ្រី មេឃុំ ចៅសង្កាត់ របស់គណបក្សសង្គ្រោះជាតិ មួយចំនួនបានអះអាងពីជំហររបស់ពួកគេ ដែលមិនមានបំណងចាកចេញពីគណបក្ស ទៅចូលរួមជីវភាពនយោបាយជាមួយគណបក្សផ្សេង។ ស្ដ្រី មេឃុំ ចៅសង្កាត់ ទាំងនោះបញ្ជាក់ថា ពួកគេសុខចិត្ដធ្វើជាពលរដ្ឋសាមញ្ញ ជាជាងក្បត់ឆន្ទៈរបស់ពលរដ្ឋដែលបានបោះឆ្នោតឲ្យគណបក្សសង្គ្រោះជាតិ។
កញ្ញា ស៊ិន ចាន់ពៅរ៉ូហ្សិត ចៅសង្កាត់អូចារ ក្រុងបាត់ដំបង បានឲ្យវិទ្យុស្ដ្រីអេហ្វអឹម១០២ ដឹងនៅថ្ងៃទី២៥ ខែតុលា នេះថា កញ្ញាមិនចាប់អារម្មណ៍រឿងបណ្ដឹងរំលាយគណបក្សសង្គ្រោះជាតិនោះទេ ហើយកញ្ញាក៏គ្មានបំណងរត់ចេញពីគណបក្សប្រឆាំងមួយនេះ ដើម្បីទៅជ្រកក្រោមឆ័ត្រគណបក្សនយបាយផ្សេង ដើម្បីរក្សាមុខតំណែង ឬក៏យស់ស័ក្ដិ ក្នុងនាមជាចៅសង្កាត់នាពេលនេះនោះដែរ។
ការបង្ហាញជំហរ របស់ស្ដ្រីជាចៅសង្កាត់អូចារ មកពីគណបក្សសង្គ្រោះជាតិដូចនេះ គឺបន្ទាប់ពីមានអ្នកតំណារាស្ដ្រ សមាជិកក្រុមប្រឹក្សាឃុំ និងជំទប់ របស់គណបក្សប្រឆាំងដ៏ធំនេះ មួយចំនួនបានសម្រេចចិត្ដសុំចុះចូលជាមួយគណបក្សប្រជាជនកម្ពុជា ដែលកំពុងកាន់អំណាច។
កញ្ញា ស៊ិន ចាន់ពៅរ៉ូហ្សិត បញ្ជាក់ទៀតថា ប្រសិនបើនាងរត់ចេញពីគណបក្សសង្គ្រោះជាតិ ព្រោះតែខ្លាចបាត់បង់តំណែង គឺប្រៀបបាននិងការក្បត់ឆន្ទៈរបស់ប្រជាពលរដ្ឋខ្មែរ ដែលបានបោះឆ្នោតឲ្យគណបក្សសង្គ្រោះជាតិ និងផ្ដល់ឱកាសឲ្យនាងបានក្លាយជាចៅសង្កាត់នាពេលនេះ។ កញ្ញា ស៊ិន ចាន់ពៅរ៉ូហ្សិត ៖«បើខ្ញុំយកសំឡេងរបស់ប្រជាពលរដ្ឋនៅសង្កាត់អូចារ ដែលបោះឆ្នោតឲ្យគណបក្សសង្គ្រោះជាតិ ទៅចុះចូលដើម្បីរក្សាតួនាទី តំណែង ជាមេឃុំចៅសង្កាត់កន្លងមកហ្នឹង គឺខ្ញុំអត់មានន័យក្នុងជីវិតរបស់ខ្ញុំ ហើយខ្ញុំមិនខ្លាចបាត់បង់តំណែងជាមេឃុំ ចៅសង្កាត់នេះទេ»។
ចំណែកអ្នកស្រី ទូច សាវុធ មេឃុំ អរិយក្សត្រ ស្រុកល្វាឯម ខេត្ដកណ្ដាល ឯណេះវិញក៏បង្ហាញជំហរដូចគ្នានឹងចៅសង្កាត់អូចារដែរ អ្នកស្រីអះអាងថា ក្នុងករណីដែលគណបក្សសង្គ្រោះជាតិត្រូវបានរំលាយ អ្នកស្រីសុខចិត្ដធ្វើជាពលរដ្ឋធម្មតា ដោយមិនមានបំណងចង់ទៅចូលរួមជីវភាពនយោបាយជាមួយគណបក្សកាន់អំណាច ដូចអ្នកតំណាងរាស្ដ្រ និងសមាជិកគណបក្សសង្គ្រោះជាតិមួយចំនួននោះទេ។ អ្នកស្រី ទូច សាវុធ៖«តែបើថា ត្រូវគេរំលាយមែន អាហ្នឹងច្បាប់លើអ្នកកាន់អំណាចទេ តែចំពោះខ្ញុំ ខ្ញុំអត់ទៅខ្វល់ខ្វាយថាគេរំលាយ ប្រសិនរំលាយទៅខ្ញុំបើចប់ក៏ចប់ទៅ»។
ដូចគ្នាដែរអ្នកស្រី ជួង ឈុននី មេឃុំព្រះប្រសប់ ខេត្ដកណ្ដាល យល់ឃើញថា គ្រប់អ្នកធ្វើនយោបាយទាំងអស់មានសិទ្ធិគ្រប់គ្រាន់ក្នុងការសម្រេចចិត្ដទៅចូលរួមជាមួយគណបក្សនយោបាយណាមួយ ក៏ប៉ុន្ដែសម្រាប់អ្នកស្រីគឺគ្មានបំណងទេចំពោះការក្បត់ឆន្ទៈពលរដ្ឋ ដើម្បីតែអំណាច។ អ្នសស្រី ជួង ឈុននី ៖«ខ្ញុំអត់ស្ដាយស្រណោះទេតួនាទីនេះគឺខ្ញុំបានមកពីប្រជាពលរដ្ឋបោះឲ្យគណបក្សសង្គ្រោះជាតិ ប្រសិនបើខ្ញុំនៅទៅចូលរួមគណបក្សផ្សេងពីសង្គ្រោះជាតិបានន័យថា ខ្ញុំក្បត់ប្រជាពលរដ្ឋ ខ្ញុំមិនអាចធ្វើទៅរួចទេ ខ្ញុំសុខចិត្ដធ្វើជាប្រជាពលរដ្ឋធម្មតា»។
ក្រៅពីស្ដ្រី ជាមេឃុំ ចៅសង្កាត់ របស់គណបក្សសង្គ្រោះជាតិ ដែលបង្ហាញជំហរមិនរត់ចេញពីគណបក្សប្រឆាំងមួយនេះ ទៅជ្រកកោនក្រោមគណបក្សផ្សេងហើយ លោក ជិន សុខង៉េង ចៅសង្កាត់ សាលាកម្រើក ក្រុងសៀមរាប ក៏រក្សាជំហរមិនចាកចេញទៅចូលរួមជាមួយបក្សណាដែរ សូម្បីបក្សកាន់អំណាចក៏ដោយ។ ចៅសង្កាត់ វ័យ ២៦ឆ្នាំរូបនេះ បន្ដទៀតថា ការចូលប្រឡូកនយោបាយនេះ លោកបានត្រៀមខ្លួនរួចជាស្រេចហើយ ដើម្បីបម្រើផលប្រយោជន៍ពលរដ្ឋ ដែលមិនមែនមក ដើម្បីតែតំណែងនោះទេ។ លោក ជិន សុខង៉េង៖«ខ្ញុំសូមបញ្ជាក់ដែរថា ខ្ញុំមិនដែល សូម្បីតែស្រម៉ៃ ឬក៏ដេកយល់សប់ថា ចូលទៅខាងគេម្ខាងទៀតទេ សូម្បីតែយល់សប់ក៏ខ្ញុំមិនដែលយល់សប់ផង»។
យ៉ាងណាចៅសង្កាត់ វ័យក្មេងរូបនេះ មើលឃើញថា សារនយោបាយរយៈពេលចុងក្រោយនេះគឺបំណងធ្វើឲ្យគណបក្សប្រឆាំងដ៏ធំជាងគេនៅកម្ពុជាមួយនេះចុះខ្សោយ មុនការបោះឆ្នោតថ្នាក់ជាតិឈានមកដល់។
ការបង្ហាញជំហររបស់ មេឃុំ ចៅសង្កាត់ គណបក្សសង្គ្រោះជាតិនាពេលនេះ ក្រៅពីឆ្លើយតបទៅនឹងអ្នកតំណាងរាស្ដ្រ សមាជិកក្រុមប្រឹក្សាឃុំ និងជំទប់បក្សរបស់ខ្លួនដែលចាកចេញទៅចុះចូលជាមួយគណបក្សកាន់អំណាចហើយ ក៏ជាការឆ្លើយតបទៅនិងការអំពាវនាវរបស់ប្រមុខដឹកនាំរាជរដ្ឋាភិបាលដែលបាននិយាយជាសាធារណៈពីការបើកចំហរទ្វា
ទទួលយក អ្នកតំណាងរាស្ដ្រ សមាជិក សមាជិកា របស់គណបក្សសង្គ្រោះជាតិ និងរក្សាមុខតំណែងនៅដដែលបើសុខចិត្ដដើរចេញពីបក្សសង្គ្រោះជាតិចូលរួមជាមួយគណបក្សប្រជាជនកម្ពុជាដែលកំពុងដឹកនាំប្រទេសសព្វថ្ងៃ។
នៅថ្ងៃទី២៥ ខែតុលា ឆ្នាំ២០១៧ នេះ សម្ដេច នាយករដ្ឋមន្ដ្រីហ៊ុន សែន និងជាប្រធានគណបក្សប្រជាជនកម្ពុជា បាននិយាយសំដៅដល់ការបើកភ្លើងខៀវសម្រាប់ អ្នកតំណាងរាស្ដ្រ សមាជិកក្រុមប្រឹក្សាឃុំ និងជំទប់ របស់គណសង្គ្រោះជាតិ បើសិនចូលរួមជាមួយគណបក្សប្រជាជនកម្ពុជា ពួកគេនឹងអាចរក្សាតំណែងបាន ក្នុងករណីដែលគណបក្សសង្គ្រោះជាតិត្រូវបានរំលាយ។ សម្ដេច ហ៊ុន សែន៖«យើងស្វាគមន៍ចំពោះអ្នកតំណាងរាស្ដ្រ ដែលបានផ្ដាច់ខ្លួនចេញពីគណបក្សមកចូលរួមជីវភាពនយោបាយជាមួយគណបក្សប្រជាជនកម្ពុជា យើងស្វាគមន៍មេដឹកនាំនៃគណបក្សដែលគ្នាមិនបានដឹងអី ហើយទើបនឹងបានដឹងអំពីឧបាយកលរបស់មេ របស់ខ្លួន មកចូលរួមជីវភាពនយោបាយជាមួយគណបក្សប្រជាជនកម្ពុជា យើងស្វាគមន៍ជាមួយក្រុមប្រឹក្សា ខេត្ដ ក្រុមប្រឹក្សាស្រុក ក្រុមប្រឹក្សា ឃុំ សង្កាត់ ដែលចង់បន្ដការងាររបស់ខ្លួនតទៅទៀត ចូលរួមជាមួយគណបក្សប្រជាជនកម្ពុជា»។
សម្តេចនាយករដ្ឋមន្ត្រី ហ៊ុន សែន បានថ្លែងបញ្ជាក់ដូចនេះជាលើកទី២ហើយ។ ប៉ុន្ដែនៅពេលនេះលោកបានបញ្ជាក់ថា នេះជាយុទ្ធសាស្ដ្រឈ្នះៗ មួយរបស់សម្ដេចដែលធ្លាប់ប្រើនៅក្នុងយុទ្ធនាការអូសទាញកងទ័ពខ្មែរក្រហម ឲ្យមករួមរស់ជាមួយរដ្ឋាភិបាល។ តែយ៉ាងនេះក្ដីជោគវាសនារបស់គណបក្សសង្គ្រោះជាតិស្ថិតក្នុងកណ្ដាប់ដៃ និងដែនយុត្ដាធិការ របស់តុលាការកំពូលនៅឡើយ ហើយស្របពេលនេះ សហគមន៍អន្ដរជាតិ បានទាមទារឲ្យគណបក្សកាន់អំណាចបញ្ឈប់យុទ្ធសាស្ដ្ររំលាយគណបក្សសង្គ្រោះជាតិ។ តែជម្រាបថា គណបក្សសង្គ្រោះជាតិក្រៅពីមានក្រុមប្រឹក្សាឃុំរបស់ខ្លួន ជាង ៥០០០នាក់ នៅទូទាំងប្រទេសហើយ គណបក្សប្រឆាំងដ៏ធំជាងគេនៅកម្ពុជាមួយនេះក៏មានក្រុមប្រឹក្សា ស្រុក ខេត្ដ នៅទូទាំងប្រទេសផងដែរ៕
