ភ្នំពេញ៖ស្ដ្រីសហគមន៍បឹងកក់មានគ្នាជាង ១០នាក់បានស្វែងរកកិច្ចអន្ដរាគមន៍ជាថ្មីម្ដងទៀតពីនាយករដ្ឋមន្ដ្រី នៅព្រឹកថ្ងៃទី១៤ កុម្ភៈនេះ ដោយពួកគេដាក់ញត្ដិស្នើសុំឲ្យមានការដោះលែងអ្នក ស្រី ទេព វន្នី តំណាងរបស់ពួកគេឲ្យបានវិលមកជួបជុំគ្រួសារវិញ។ ញត្ដិរបស់ក្រុមស្ដ្រីបឹងកក់ត្រូវបានមន្ដ្រីខុទ្ទកាល័យនាយករដ្ឋមន្ដ្រីមកទទួលប៉ុន្ដែមិនបាននិយាយអ្វីប្រាប់អ្នកសារព័ត៌មានទេ។
មូលហេតុដែលនាំឲ្យស្ដ្រីបឹងកក់ប្រមូលផ្ដុំគ្នានៅមុខព្រះវិហារឥស្លាមដើម្បីរង់ចាំមន្ដ្រីតំណាងខុទ្ទកា ល័យសម្ដេចនាយករដ្ឋមន្ដ្រីមកទទួលញត្ដិ ពីព្រោះតែអាជ្ញាធរបានហាមឃាត់ពួកគេមិនឲ្យធ្វើដំណើរទៅមុខវិមានសន្តិភាពនោះទេ ដោយអះអាងថាមានការប្រជុំសំខាន់នៅទីនោះ។ ក្រុមស្ដ្រីបឹងកក់បាននិយា យថា ការហាមឃាត់ពួកគាត់មិន ឱ្យទៅដល់មុខវិមានសន្តិភាព គឺជាការបំបិទសំឡេងជនរងគ្រោះមិនឲ្យឮដល់សម្ដេច ហ៊ុន សែន ដើម្បីអន្ដរាគមន៍ជួយរកយុត្ដិធម៌សម្រាប់ស្ដ្រីបឹងកក់។
ក្រុមស្ដ្រីបឹងកក់ជួបជុំគ្នានេះ គឺដើម្បីដាក់ញត្ដិស្នើសុំនាយករដ្ឋមន្ដ្រីអន្ដរាគមន៍ដោះលែងអ្នកស្រី ទេព វន្នី ដែលកំពុងជាប់ក្នុងពន្ធនាគារឲ្យបានវិលមកជួបជុំគ្រួសារវិញ។ អ្នកស្រី បូវ សោភា តំណាងស្ដ្រីបឹងកក់បាននិយាយថា អ្នកស្រីមានអារម្មណ៍សោកស្ដាយដែលមន្ដ្រីអាជ្ញាធរបង្ហាញសកម្មភាពរើសអើងលើក្រុមអ្នកស្រី ដោយពេលខ្លះបានលាក់បាំងនិងបិទព័ត៌មានមិនឲ្យនាយករដ្ឋមន្ដ្រីបានដឹងអំពីទុកសោករបស់ស្ត្រីបឹងកក់។ អ្នកស្រី បូវ សោភា ៖«ខ្ញុំមានអារម្មណ៍មួយសោកស្ដាយមែនទែន ដែលពួកយើងជាកូនចៅរបស់គាត់ តែបែរជាយើងរត់រកគាត់ ដើម្បីធ្វើកិច្ចអន្ដរាគមន៍ គឺមិនដែលបានទេ តែអ្វីដែលពួកយើងបាន គឺមានតែការប្រើអំពើហិង្សា និងបិទបាំងសិទ្ធិសេរីភាពតែប៉ុណ្ណោះ។»
ញត្ដិរបស់ក្រុមស្ដ្រីបឹងកក់ត្រូវបានមន្ដ្រីនៃខុទ្ទកាល័យសម្ដេចនាយករដ្ឋមន្ដ្រី ហ៊ុន សែន គឺលោក គង់ ចំរើន មកទទួលប៉ុន្ដែលោកមិនបានផ្ដល់បទសម្ភាសន៍ដល់អ្នកសារព័ត៌មាននោះទេ ហើយក៏ត្រឡប់ទៅវិញក្រោយពីចុះហត្ថលេខាទទួលញត្ដិរួចរាល់។
អ្នកស្រី បូវ សោភា បន្ដថា ថ្វីបើមានមន្ដ្រីមកទទួលយកទៅក៏ពិតមែន តែអ្នកស្រីមិនសូវមានជំនឿថា សម្ដេច ហ៊ុន សែន នឹងបានទទួលញត្ដិនេះទេ ព្រោះកន្លងមកញត្ដិជាច្រើនរបស់ក្រុមស្ដ្រីបឹងកក់ដែលដាក់ជូនសម្ដេចនាយករដ្ឋមន្ដ្រីមិនដែលមានកិច្ចអន្ដរាគមន៍ម្ដងណាទេ។ តែយ៉ាងណាអ្នកស្រីសង្ឃឹមថា លើកនេះសម្ដេចនឹងបានឃើញការអំពាវនាវរបស់ក្រុមអ្នកស្រីតាមបណ្ដាញសង្គមជាក់ជាពុំខាន។
អ្នកស្រី បូវ សោភា៖«ញត្ដិដែលសហគមន៍បឹងកក់ដាក់ទៅមិនតិចជាង ១០០ ឬ២០០ទេ ប៉ុន្ដែពួកខ្ញុំនៅតែព្យាយាមដាក់ ដោយសារខ្ញុំមិនបានសង្ឃឹមទៅលើញត្ដិខ្ញុំបានទៅដល់ដៃគាត់ទេ តែអ្វីដែលខ្ញុំសង្ឃឹមបំផុតនោះគឺលោកនាយករដ្ឋមន្ដ្រីពេលនេះគាត់កំពុងចាប់អារម្មណ៍លើបណ្ដាញសង្គមហ្វេសប៊ុក។»
គោលបំណងរបស់ស្ដ្រីសហគមន៍បឹងកក់ដែលដាក់ញត្ដិជួនខុទ្ទកាល័យនាយករដ្ឋមន្ដ្រីនៅថ្ងៃនេះ មានគោលបំណងស្នើសុំសម្ដេច ហ៊ុន សែន ជួយអន្ដរាគមន៍ដោះលែងអ្នកស្រី ទេព វន្នី តំណាងរបស់ពួកគេ ស្នើសុំសម្ដេចជួយបញ្ជាទៅ អាជ្ញាធរបញ្ឈប់ការប្ដឹងប្ដលើពលរដ្ឋសហគមន៍បឹងកក់ទៅតុលាការបន្ដទៀត ព្រមទាំងសុំអន្ដរាគមន៍ឲ្យជួយផ្ដល់ប្លង់កម្មសិទ្ធិជូនពលរដ្ឋដែលមិនទាន់បានទទួលបានប័ណ្ណកម្មសិទិ្ធដីធ្លី៕
