(ភ្នំពេញ)៖ ក្រោយបញ្ចប់សវនាការជាអសាធារណៈ នៅព្រឹកថ្ងៃទី២៧ ខែមីនានេះ ក្រុមប្រឹក្សាជំនុំជម្រះសភាស៊ើបសួរសាលាឧទ្ធរណ៍ បានសម្រេចបន្តឃុំខ្លួនលោក កឹម សុខា អតីតប្រធានគណបក្សសង្គ្រោះជាតិក្នុងពន្ធនាគារដដែល ដោយពុំព្រមដោះលែងនោះទេ។ សវនាការប្រើពេលជិត ២ម៉ោងនៅព្រឹកមិញនេះ ដោយពុំមានវត្តមានលោក កឹម សុខា នោះឡើយ។សវនាការនេះធ្វើឡើង ស្របពេលដែលសម្តេច ហ៊ុន សែន ថ្លែងដោយមិនជឿថាតុលាការអាចដោះលែងលោក កឹម សុខា នោះទេ។
ក្រោយបញ្ចប់សវនាការរយៈពេលជិតពីរម៉ោងដោយគ្មានវត្តមានលោក កឹម សុខា អតីតប្រធានគណបក្សសង្គ្រោះជាតិនៅព្រឹកនេះ សភាស៊ើបសួរនៃសាលាឧទ្ធរណ៍បានសម្រេចបន្តឃុំខ្លួនលោក កឹម សុខា តែមិនបានបញ្ជាក់ពីថេរវេលាពិតប្រាកដនោះឡើយ។ នេះបើតាមការប្រកាសរបស់ក្រុមប្រឹក្សាជំនុំជម្រះនៃសភាស៊ើបសួរសាលាឧទ្ធរណ៍។
មេធាវីម្នាក់ក្នុងចំណោមមេធាវីផ្សេងទៀតរបស់លោក កឹម សុខា គឺលោក ហែម សុជាតិ បានប្រាប់អ្នកសារព័ត៌មានថា ក្រុមមេធាវីការពារក្តីជូនលោក កឹម សុខា បានផ្តល់ចម្លើយនិងឯកសារគិតយុត្តជាច្រើនតាមការសាកសួរចង់បានពីតុលាការ ដែលលោកទទូចថាតុលាការមិនគួរពន្យារពេលឃុំខ្លួនកូនក្តីលោកទៀតឡើយ។ លោកមេធាវីបន្តថា សវនាការដែលធ្វើឡើងដោយគ្មានវត្តមានកូនក្តីបែបនេះ ធ្វើឱ្យការសាកសួរដេញដោលមិនមានលក្ខណទូលំទូលាយ និងផ្តល់យុត្តិធម៌ដល់កូនក្តីលោកឡើយ។ លោកក៏ពុំអាចគូសបញ្ជាក់ពីមូលហេតុដែលកូនក្តីរបស់លោកគឺលោក កឹម សុខា អវត្តមានក្នុងសវនាការនៅថ្ងៃនេះបានដែរ គ្រាន់តែបញ្ជាក់យ៉ាងខ្លីថា លោកទើបទទួលលិខិតអវត្តមានលោក កឹម សុខា ពីព្រះរាជអាជ្ញានៅព្រឹកនេះ។
ជុំវិញអវត្តមានលោក កឹម សុខា ក្នុងអង្គសវនាការនៅពេលនេះ លោក នុត សាវនា អគ្គនាយករងនៃអគ្គនាយកពន្ធនាគារ បានប្រាប់សារព័ត៌មានក្នុងស្រុកថា សវនាការនៅពេលមិញនេះ គឺជារឿងសារទុក្ខដែលមិនពាក់ព័ន្ធនឹងរឿងក្តីស្នូរដែលគេចោទប្រកាន់នោះទេ។ ម្យ៉ាងទៀតដើម្បីរក្សាសណ្តាប់ធ្នាប់សន្តិសុខពេលសវនាការ។ តែយ៉ាងលោកបញ្ជាក់ថា ការសម្រេចមិនបញ្ជូនលោក កឹម សុខា ទៅចូលរួមអង្គសវនាការនៅថ្ងៃនេះ គឺមានការពិភាក្សាជាមួយព្រះរាជអាជ្ញាសាលាឧទ្ធរណ៍ត្រឹមត្រូវមិនមែនជាការសម្រេចដោយឯកឯងនោះទេ។
ស្របពេលសាលាឧទ្ធរណ៍កំពុងបន្តសវនាការលើបណ្តឹងសារទុក្ខរបស់ក្រុមមេធាវីលោក កឹម សុខា ប្រឆាំងការឃុំខ្លួនកូនក្តីខ្លួន ៦ ខែទៀតនោះ សម្តេច ហ៊ុន សែន បានថ្លែងក្នុងពិធីចែកសញ្ញាប័ត្រជូននិស្សិតនៃសាកលវិទ្យាល័យអាស៊ីអឺរ៉ុបថា សម្តេចសង្ឃឹមថា សាលាឧទ្ធរណ៍នឹងមិនដោះលែងលោក កឹម សុខា ដែលសម្តេចចោទថាជាមេក្បត់ជាតិនោះទេ។
លោក កឹម សុខា ត្រូវបានឃុំខ្លួនក្នុងគុកត្រពាំងផ្លុងជាប់ព្រំដែនវៀតណាមរយៈពេលជិត ៧ ខែមកហើយ។ លោកត្រូវបានតុលាការចោទប្រកាន់ពីបទ សន្ធិដ្ឋិភាពជាមួយបរទេស តាមមាត្រា ៤៤៣ នៃក្រមព្រហ្មទណ្ឌ។ លោក កឹម សុខា ត្រូវបានសមត្ថកិច្ចចាប់ខ្លួន នៅពាក់កណ្តាលអាធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។
ជាការកត់សម្គាល់នៅក្បែរបរិវេនសាលាឧទ្ធរណ៍នៅព្រឹកថ្ងៃទី២៧ មីនានេះ មានការបិទកំណត់ផ្លូវមួយចំនួនមិនឱ្យធ្វើចរាចរណ៍នោះទេ។ ចំណែកអ្នកគាំទ្រគណបក្សសង្គ្រោះជាតិ មន្រ្តីសិទ្ធមនុស្ស និងអ្នកសារព័ត៌មានប្រមានមួយនាក់ក៏មានវត្តឃ្លាំមើលសវនាការនោះផងដែរ។ តែយ៉ាងណាសកម្មភាពប្រមូលផ្តុំតវ៉ាពីអ្នកគាំទ្រលោក កឹម សុខា និងសកម្មភាពផ្តល់បទសម្ភាសន៍ដល់អ្នកសារព័ត៌មានត្រូវបានរំខាន និងរឹតបណ្តឹងយ៉ាងខ្លាំង៕
