ភ្នំពេញ៖សម្ព័ន្ធសហជីពជាតិកម្ពុជា(NTUC)អះអាងថា ប្រាក់ខែគោល១៧០ដុល្លារក្នុងគោលនយោបាយថ្មីរបស់រាជរដ្ឋាភិបាល បានជួយបង្កើនជីវភាពប្រចាំថ្ងៃរបស់កម្មករកម្មការិនីបានមួយកម្រិត តែបើកបូកនឹងប្រាក់លើកទឹកចិត្តផ្សេងៗទៀតគឺ រឹតតែធ្វើឱ្យជីវភាពរបស់ពួកគាត់កាន់តែរឹងមាំនិងប្រសើរឡើង។
សម្ព័ន្ធសហជីពជាតិកម្ពុជាបានបញ្ជាក់ដូចនេះ តាមរយៈលទ្ធផលនៃការសិក្សាស្រាវជ្រាវរបស់ខ្លួន ចុះផ្សាយកាលពីថ្ងៃទី១៩ ខែកុម្ភៈដែលវិទ្យុស្ត្រីទទួលបានកាលពីថ្ងៃទី២២កុម្ភៈ។
លទ្ធផលនៃការស្រាវជ្រាវរបស់សម្ព័ន្ធសហជីពនេះ រកឃើញថាប្រាក់ខែគោល បូកនឹងប្រាក់រង្វាន់ ប្រាក់សោហ៊ុយធ្វើដំណើរ ប្រាក់អតីតភាពការងារ ប្រាក់ថែមម៉ោងនិងប្រាក់លើកទឹកចិត្តផ្សេងទៀត ធ្វើឲ្យការរកប្រាក់បានក្នុងមួយខែរបស់កម្មករកម្មការិនី កើនឡើងពីចន្លោះ ២៣៨ ដុល្លារទី២៦០ដុល្លារ ។
លទ្ធផលនៃការស្រាវជ្រាវរបស់សម្ព័ន្ធសហជីពនេះ បង្ហាញទៀតថា បើកម្មករ-កម្មារិនីដេរគិតបុងជាមធ្យមទទួលប្រាក់ឈ្នួលចន្លោះពី២៨០ដុល្លារដល់៤៨០ដុល្លារដោយបូកនិងប្រាក់អត្ថប្រយោជន៍ផ្សេងទៀត។ជាមួយគ្នានេះកម្មករ-កម្មារិនីធ្វើការងារសាកល្បងឬទើបនឹងពេញសិទ្ធិគ្មានអតីតភាពការងារដោយទទួលប្រាក់ឈ្នួលទាប់បំផុត ចន្លោះ១៨២ដុល្លារដល់២១០ដុល្លារក្នុងមួយខែ។
លោក រ៉ា ជាកម្មកររោងចក្រកាត់ដេរនៅខេត្តកំពង់ស្ពឺមានប្រសាសន៍ថាលោកពិតជារីករាយចំពោះប្រាក់ខែគោល១៧០ដុល្លារនៃនយោបាយថ្មីនេះដែលលោកអះអាងថាបានជួយជីវភាពគ្រួសារលោកកាន់តែប្រសើរជាងមុន។
លោក រ៉ា៖«ដូចថាវាគ្រាន់បើជាងមុនបងហើយយើងបើកមកវាបានក្រែលដែរ ប្រាក់ខែឡើងអញ្ចឹងគេគុណម៉ោងថែមដែរយើងចំណាយផ្ទះជួល។ផ្ទះជួលវានៅថេរអញ្ចឹងអាលុយដែលបន្លែមអោយវានៅសល់។បើបានឡើងច្រើនជាងនិងក៏ល្អ។»
ដូចគ្នានេះដែរ លោក ហេង សួរ អ្នកនាំពាក្យក្រសួងការងារនិងបណ្តុះវិជ្ជាជីវៈបានផ្តល់បទសម្ភាសឱ្យវិទ្យុស្ត្រីថាកម្មករ-កម្មរិនីបានបង្ហាញអារម្មណ៍សប្យាយរីករាយចំពោះប្រាក់ខែគោលថ្មី១៧០ដុល្លារ។
លោក ហេង សួរ បន្ថែមថា ការរីករាយរបស់ពួកគាត់ គឺស្របពេលរាជរដ្ឋាភិបាលចេញគោលនយោបាយបញ្ចុះតម្លៃអគ្គីសនី ទឹក បន្ទប់ជួលដែលជាការជួយកាត់បន្ថយការចំណាយរបស់កម្មកររោងចក្រហើយធ្វើឲ្យជីវភាពគ្រួសារកាន់តែប្រសើរឡើងថែមទៀត។
លោក ហេង សួរ៖«កំណើនប្រាក់ឈ្នួលពិតប្រាកដរបស់បងប្អូនកម្មករនិយោជិតក្នុងផ្នែកវិស័យកាត់ដេរគឺមានប្រមាណជា១៤ភាគរយក្នុងខណៈពេលដែលតម្លៃទំនិញឬយើងហៅអតិផលរណាក្នុងឆ្នំា២០១៨បើតាមការព្យាករណ៍ស្ថិតនៅក្នុងរង្វង់៣ភាគរយចំពោះយើងមានកម្លំាងទិញប្រាក់បៀវត្សបងប្អូនដឺលទទួលបាននឹងធ្វើឲ្យបងប្អូនមានលទ្ធិភាពទិញនូវសម្ភារៈម្ហូបអាហារ របស់របរចំបាច់សម្រាប់បំពេញតម្រូវការប្រចំាថ្ងៃរបស់បងប្អូន។»
យ៉ាងនេះក្ដី អ្នកស្រី ម៉ៅ ជាកម្មការិនីម្នាក់ដែរបែរជាត្អូញត្អែរថាគ្រួសារអ្នកស្រីមិនទាន់ល្អប្រសើរបើទោះជាប្រាក់ខែគោលខ្ពស់ជាងមុនដែលអ្នកស្រីថាមិនសមស្របទៅនឹងទំនិញត្រី សាច់នៅលើទីផ្សារ។ ម្យ៉ាងក្នុងរោងចក្ររបស់អ្នកស្រីមិនសូវមានការងារថែមម៉ោងដូចរោងចក្រដទែទៀតនោះទេ។
អ្នកស្រី ម៉ៅ៖«ទំនិញទីផ្សារាឡើងហើយមួយទៀតនៅពេលខ្ញុំធ្វើការនៅក្នុងរោងចក្រតម្លៃឡូខ្ញុំអត់ឡើងទេបង។ចំនួនកម្មករឬកន្លែងធ្វើការរបស់ខ្ញុំភាគច្រើនត្រូវបានគេកាត់បន្ថយ។កម្លំាងថាមពលយើងប្រើច្រើនជាងមុនហើយការហូបចុកយើងកើនឡើង ឈឺច្រើន។ពួកខ្ញុំមិនមានបសសពេលយើងទៅទេព្យ យើងឃើញថាយើងមានប័ណ្ណបបសហើយប៉ុន្តែការចង់ចិត្តទុកដាក់មកលើពួកយើងជាកម្មករនៅមានកម្រិត។»
ឆ្លើយតបចំពោះការត្អូញត្អែរបស់ស្ត្រីកម្មកររូបនេះ លោក ហេង សួរ អ្នកនាំពាក្យក្រសួងការងារមានប្រសាសន៍ថាទោះបីជានៅតាមបណ្តារោងចក្រមិនសូវសំបូរការងារថែមម៉ោងមែនតែកម្មក រកម្មការិនីទទួលបានសុខាមាលភាពសង្គមដែលជាគោលនយោបាយថ្មីរបស់រាជរដ្ឋាភិបាល។
លោក ហេង សួរ៖«ជារួមនងប្អុនអាចមើលមិនឃើញលុយមិនកើនដោយសារតែការថែមម៉ោងនេះវាមិនសំបូរដូចមុនតែអ្វីបងប្អូនទទួលបានសុខភាពគឺមានលក្ខណៈល្អប្រសើរជាងមុនជាមួយពេលវេលាធ្វើការងារតិចជាងមុនតែបានប្រាក់បៀវត្សច្រើនជាងមុនតិច។»
អ្នកនាំពាក្យ រូបនេះអះអាងថាដើម្បីបង្កើនជីវភាពកម្មកររោងចក្រក្នុងវិស័យកាត់ដេរសំលៀកបំពាក់និងស្បែកជើង រាជរដ្ឋាភិបាលបានខិតខំជំរុញនិងបន្តឲ្យមានការអភិវឌ្ឍរោងចក្រទៅក្បែរផ្ទះប្រជាពលរដ្ឋបន្ថែមទៀត។
រាជរដ្ឋាភិបាលដាក់ចេញគោលនយោបាយថ្មីចាប់ពីឆ្នាំ២០១៨នេះ ដោយផ្ដល់ឱ្យកម្មការិនីសម្រាលកូនបានមួយទទួលបានប្រាក់ឧបត្ថម្ភ ៤០ម៉ឺនរៀល កូនភ្លោះពីរទទួលបាន ៨០ម៉ឺនរៀល និងកូនភ្លោះ៣ ទទួលបាន ១លាន២សែនរៀល។
តាមរបាយការណ៍របស់ក្រសួងការងារ គឺគិតចាប់ខែមករា រហូតដល់ថ្ងៃទី២០ ខែកុម្ភៈ កម្មការិនីសម្រាលកូនជាង៧ពាន់នាក់។ តាមគោលនយោបាយថ្មីនេះ រាជរដ្ឋាភិបាល ក៏បានអនុញ្ញាតឲ្យកម្មករ កម្មការិនី ទាំងក្នុងនិងក្រៅប្រព័ន្ធ ចាប់ពីឆ្នាំ២០១៨នេះតទៅ អាចស្វែងរកសេវាព្យាបាលសុខភាពនៅមន្ទីរពេទ្យរដ្ឋដោយឥតគិតថ្លៃ៕
