ភ្នំពេញ ៖ តំណាងសហជីពប្រចាំនៅរោងកច្រកាត់ដេរ ម៉ាកាឡូត ៥ អំពាវនាវដល់កម្មករ កម្មការិនី ក្នុងរោងចក្រនេះ កុំមានការព្រួយបារម្ភពីការបាត់បង់ការងារ បើទោះបីជារោងចក្របានឆេះអស់ទាំងស្រុងក៏ដោយ។ លោក លៀ ស៊ីណា រាយការណ៍៖
រោងចក្រកាត់ដេរសម្លៀកបំពាក់ ម៉ាកាឡូង ៥ ស្ថិតនៅក្នុង អាគារសួនឧស្សាហកម្មវឌ្ឍនៈ ភូមិត្រពាំងថ្លឹង សង្កាត់ចោមចៅ ខណ្ឌពោធី៍សែនជ័យ រាជធានីភ្នំពេញ ត្រូវបានភ្លើងឆេះទាំងស្រុងកាលពីថ្ងៃទី១៤ ខែវិច្ឆិកា ឆ្នាំ២០១៧។ ក្រោយហេតុការណ៍នេះ កម្មករ ដែលមានគ្នាប្រមាណជាង ១០០០នាក់ ហើយ ជាង ៧០ភាគរយជាស្ដ្រី បានបង្ហាញក្ដីព្រួយបារម្ភ អំពីការបាត់បង់ការងារសម្រាប់ចិញ្ចឹមជីវិតរបស់ពួកគេ។
ឆ្លើយតបនឹងក្ដីព្រួយបារម្ភនេះ សហព័ន្ធសហជីពប្រជាធិបតេយ្យសំណាងកម្មករ ដែលជាសហជីពតំណាងប្រចាំនៅរោងចក្រកាត់ដេរមួយនេះ បានអះអាងថា លោកនឹងមិនបណ្ដោយឲ្យកម្មករ កម្មការិនី នៅរោងចក្រនេះបាត់បង់ការងារនោះទេ។
លោក វ៉ាត សំណាង ប្រធានសហព័ន្ធសហជីពប្រជាធិបតេយ្យសំណាងកម្មករ បានប្រាប់វិទ្យុស្ដ្រីនៅថ្ងៃទី១៧ វិច្ឆិកានេះថា មកដល់ពេលនេះភាគីរោងចក្របានឲ្យក្រុមកម្មករ សម្រាកមួយសប្ដាហ៍សិន ដើម្បីទុកពេលឲ្យថៅកែ និយោជក ពិភាក្សាគ្នាជុំវិញការរៀបចំ និងរកដំណោះស្រាយសម្រាប់ពួកគេ។ ក៏ប៉ុន្ដែលោកមិនទាន់អាចបញ្ជាក់ពីចំណាត់ការច្បាស់លាស់បាននៅឡើយទេ ព្រោះពេលនេះខាងភាគីថៅកែ កំពុងសិក្សាពីអគារផ្សេងៗ របស់រោងចក្រម៉ាកាឡូត នៅក្នុងសួនឧស្សាហកម្មវឌ្ឍនៈនេះ ថាតើអាចដាក់កម្មករ បន្ថែមបានឬយ៉ាងណា។
លោក វ៉ាត សំណាង ៖«ដោយសារម៉ាកាឡូត គាត់មានសាខាច្រើនៅក្នុងសួនវឌ្ឍនៈ អញ្ចឹងគាត់កំពុង {ពិនិត្យមើលអាគារនីមួយៗ} តើយើងអាចផ្ទុកម្មករបន្ថែមបានអត់! អញ្ចឹងបានយើងអត់ទាន់ហ៊ានឆ្លើយតបនៅក្នុងចំណុចណាមួយសម្រាប់សារព័ត៌មានទេ យើងកំពុងជជែកគ្នាសិន»។
រោងចក្រកាត់ដេរម៉ាកាឡូត មានចំនួន ៤សាខា ស្ថិតក្នុងសួនឧស្សាហកម្មវឌ្ឍនៈ ដែលប្រធានសហជីពរូបនេះ គិតថា កម្មករ នឹងមិនប្រឈមការបាត់បង់ការងារនោះទេ ព្រោះកម្មករទាំងអស់ អាចនឹងចូលទៅធ្វើការងារនៅតាមសាខាផ្សេងៗ របស់រោងចក្រកាត់ដេរម៉ាកាឡូតនេះ។
រោងចក្រកាត់ដេរសម្លៀកបំពាក់ម៉ាកាឡូត ៥ ត្រូវបានភ្លើងឆេះកាលពីវេលាម៉ោង ៤ទៀបភ្លឺ ថ្ងៃទី១៤ វិច្ឆិកា ឆ្នាំ២០១៧។
លោក ព្រហ្ម យ៉ន នាយការិយាល័យ បង្ការ និងពន្លត់អគ្គីភ័យ រាជធានីភ្នំពេញ មានប្រសាសន៍ថា ជាជំហ៊ានដំបូងលោកសន្និដ្ឋានថា អគ្គិភ័យនេះ បណ្ដាលមកពីការផ្ទុះសេ ខ្សែរភ្លើង។ លោកបន្ដថា នៅពេលនេះ សមត្ថកិច្ចគឺរកមិនឃើញចំណុចគួរឲ្យសង្ស័យអ្វីផ្សេងពីនេះនៅឡើយទេ។ លោក ព្រហ្ម យ៉ន ៖«យើងមិនដឹងវា យ៉ាងម៉េចទេ តែវាជាបញ្ហាបច្ចេកទេសចរន្ដអគ្គិសនី យើងពិនិត្យឃើញអញ្ជឹង»។
នាយការិយាល័យ បង្ការ និងពន្លត់អគ្គីភ័យរាជធានីភ្នំពេញបន្ដថា ពេលនេះ គឺក្រុមហ៊ុនធានារ៉ាប់រង ក៏កំពុងតែធ្វើការសិក្សាស្រាវជ្រាវករណីឆេះរោងចក្រនេះដែរ ក៏ប៉ុន្ដែពួកគេមិនទាន់អាចសន្និដ្ឋានអ្វីបានទេ។
ករណីឆេះរោងចក្រកាត់ដេរសម្លៀកបំពាក់ ម៉ាកាឡូត នេះ គឺជាករណីទី ៧៦ហើយក្នុងឆ្នាំ២០១៧នេះ។ ក្នុងចំណោមករណីទាំងអស់នេះ គឺ ១០ករណីធំៗ ដែលបានបណ្ដាលឲ្យស្ដ្រីម្នាក់ស្លាប់បាត់បង់ជីវិត ក្នុងចំណោមបុរស ៦នាកផ្សេងទៀត ខណៈមានស្ដ្រី ៤នាក់រងរបួស និងបុរស ៨នាក់។
វិស័យឧស្សាហកម្មកាត់ដេរកម្ពុជា គឺជាឆ្អឹងខ្នងសេដ្ឋកិច្ចចម្បងមួយរបស់កម្ពុជា ដែលផ្ដល់ចំណូដល់សេដ្ឋកិច្ចជាតិ និងជួលពលរដ្ឋខ្មែរឲ្យមានការងារធ្វើក្នុងស្រុកដោយមិនចាំបាច់ចំណាកស្រុករហូតដល់ជាង ៨០ម៉ឺននាក់ ដែលជាង៧០ភាគរយគឺជាស្ដ្រី។ តែយ៉ាងណាចំនួននេះ ក៏នៅតិចនៅឡើយបើធៀបនឹងចំនួនពលរដ្ឋខ្មែរ ដែលបានចំណាកស្រុកចេញទៅរកការងារធ្វើនៅក្រៅប្រទេស។ តាមតួលេខរបស់ក្រសួងការងារ ពលរដ្ឋខ្មែរដែលកំពុងបំពេញការងារនៅប្រទេសមានចំនួនដល់ជាង ១លាននាក់៕