ភ្នំពេញ៖ សម្ដេច ហ៊ុន សែន នាយករដ្ឋមន្ត្រីកម្ពុជា ថ្លែងតាមរយៈសំណេរនៅលើទំព័រហ្វេសបុកនៅថ្ងៃទី ២១ ខែ វិច្ឆិកា នេះថា ប្រសិនបើកម្ពុជាមិនមានសន្តិភាព នោះកម្ពុជាក៏មិនអាចរៀបចំពិធីបុណ្យជាតិធំៗ ដូចជាពិធីបុណ្យអុំទូកដូចថ្ងៃនេះដែរ។
យោងតាមការចុះផ្សាយនេះបង្ហាញថា ការបញ្ជាក់របស់សម្ដេច ហ៊ុន សែន ថា កម្ពុជាមានសន្តិភាពនេះ ធ្វើឡើងនៅថ្ងៃដំបូងនៃព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ក្នុងឆ្នាំ ២០១៨នេះ។ ដោយហេតុថា នៅក្នុងពិធីបុណ្យនេះ មានមនុស្សចូលរួមទស្សនាច្រើន មានស្ដង់ទំនិញដែលដាក់តាំងពិព័រណ៍ មានការប្រគុំតន្ត្រីតាមទម្រង់សិល្បៈបុរាណ និងសម័យនេះហើយ ទើបសម្ដេចនាយករដ្ឋមន្ត្រីថា កម្ពុជាមានសន្តិភាពពេញលេញ។ សម្ដេច ហ៊ុន សែន សរសេរក្នុងទំព័រហ្វេសបុកថា ៖«ប្រទេសជាតិយើងមានសុខសន្តិភាពពេញលេញ ទើបយើងអាចប្រារព្ធពិធីបុណ្យជាតិធំៗប្រចាំឆ្នាំបែបនេះបាន។ បើគ្មានសន្តិភាពទេ ក៏គ្មានពិធីបុណ្យអុំទូកថ្ងៃនេះដែរ»។
នាយករដ្ឋមន្ត្រីកម្ពុជារូបនេះ បានអំពាវនាវឱ្យអាជ្ញាធរ និងសមត្ថកិច្ចគ្រប់ជាន់ថ្នាក់ ត្រូវយកចិត្តទុកដាក់ខ្ពស់ ក្នុងការថែរក្សាសន្តិសុខសណ្តាប់ធ្នាប់ឱ្យបានល្អ ដើម្បីប្រជាពលរដ្ឋ និងភ្ញៀវទេសចរបរទេសមានឱកាសបានសប្បាយរីករាយនៅក្នុងពិធីបុណ្យអុំទូក ទាំងនៅក្នុងរាជធានីភ្នំពេញ និងតាមបណ្តាខេត្តនានា។ សម្រាប់ការប្រារព្ធពិធីបុណ្យអុំទូក បណ្ដែតប្រទីប អកអំបុក និងសំពះព្រះខែនៅឆ្នាំនេះ គឺធ្វើឡើងនៅថ្ងៃទី ២១ ២២ និង២៣ ខែវិច្ឆិកា ឆ្នាំ ២០១៨ ក្នុងនោះមានទូកចូលរួមប្រកួតចំនួន ២៩៥ ស្មើនឹង ១៤៨គូ៕ (អត្ថបទដោយលោក សោម លាភ)