ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានរិះគន់មន្ត្រីនាំពាក្យរបស់ខ្លួនថា ជាមន្ត្រីអត់វិន័យ ដោយ សារបាននិយាយទៅកាន់អ្នកសារព័ត៌មានហួសសមត្ថកិច្ចរបស់ខ្លួន ដែលសម្ដេចថា ធ្វើឱ្យប៉ះពាល់ ការចាត់តាំងរបស់សម្ដេចក្នុងឋានៈជានាយករដ្ឋមន្ត្រី។ ឆ្លើយតបនឹងការរិះគន់នេះលោក ផៃ ស៊ីផាន ឲ្យដឹងថា លោកគ្មានការអាក់អន់ចិត្ដអ្វីទេ គឺមានតែការទទួលដោយដឹងគុណសម្ដេចតែប៉ុណ្ណោះ។
ការថ្លែងរិះគន់របស់សម្ដេច ហ៊ុន សែន ទៅលើលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី ធ្វើឡើងនៅក្នុងពិធីប្រគល់សញ្ញាប័ត្រជូនគរុនិស្សិតនៅវិទ្យាសា្ថនជាតិអប់រំ នៅព្រឹកថ្ងៃពុធ ទី២២ មីនានេះ។
ការណ៍ដែលនាំឱ្យ សម្ដេចនាយករដ្ឋមន្ត្រីរិះគន់លោក ផៃ ស៊ីផាន ដូចនេះ គឺត្រង់បញ្ហាមួយដែលសម្ដេច ថា អ្នកនាំពាក្យរូបនេះ ចេះតែបកស្រាយរឿងតួនារបស់អតីតគណៈរដ្ឋមន្ត្រីសម្ដេចវិបុលបញ្ញា សុខ អាន ថាខុសនឹងសភាពការណ៍ជាក់ស្ដែងមួយចំនួន។ សម្ដេចនាយករដ្ឋមន្ត្រីបន្តថា បើសម្ដេចមិនបកស្រាយរឿងនេះទេ គឺនឹងធ្វើឱ្យមានការភ័ន្តច្រឡំ ដែលករណីនេះសម្ដេច រិះគន់លោក ផៃ ស៊ីផាន ថា ជាមន្ត្រីអត់វិន័យ។
សម្ដេច ហ៊ុន សែន៖«អញ្ចឹងបានថា សោកស្ដាយដែលឯកឧត្ដម ផៃ ស៊ីផាន គាត់ធ្វើរឿងនេះ អាជ្ញាធរអប្សរាដោយសារវាស្ថិតនៅក្នុងក្របខ័ណ្ឌទាក់ទិននិងក្រសួងវប្បធម៌វិចិត្រសីល្បអញ្ចឹងត្រូវប្រគល់ អាជ្ញាធរអប្សរា ទៅនៅក្រោមការគ្រប់គ្រងរបស់ក្រសួងវប្បធម៌ និងវិចិត្រសីល្បៈហើយប្រធានអាជ្ញាធរអប្សរាគឺលោកជំទាវ ភឿង សកុណា នេះអាជ្ញាធរអប្សរា មេមិនទាន់ស៊ីសងផងចេញរួចទៅហើយ រឿងហ្នឹងអាចធ្វើទៅរួច មន្ដ្រីរបស់យើងអត់វិន័យ អត់វិន័យ រឿងហ្នឹងខ្ញុំសុំនិយាយដោយត្រង់ទៅចុះ។»
យ៉ាងណាក៏ដោយសម្ដេចនាយករដ្ឋមន្ត្រីក៏បានសោកស្ដាយដែរចំពោះការរិះគន់ ដូចនេះទៅលើលោក ផៃស៊ីផាន ខណៈដែលសម្ដេចថា លោក ផៃ ស៊ីផាន មានគុណសម្បត្តិច្រើនដែរ។ ក្រៅពីរិះគន់ លោក ផៃស៊ីផាន សម្ដេចនាយករដ្ឋមន្ត្រីក៏បាន អំពាវនាវឱ្យប្រព័ន្ធផ្សព្វផ្សាយ មួយចំនួន ដែលចុះផ្សាយខុស ត្រូវកែតម្រូវអត្ថបទរបស់ខ្លួនឡើងវិញ។
ជាការឆ្លើយតបលោក ផៃ ស៊ីផាន បានផ្ដល់បទសម្ភាសន៍ឲ្យវិទ្យុស្ដ្រីអេហ្វអឹម១០២ នៅថ្ងៃទី២២ មីនានេះ ថា លោកទទួលស្គាល់ប្រសាសន៍របស់សម្ដេច ហ៊ុន សែន ដែលចង់ឲ្យមន្ដ្រីនាំពាក្យពិសេសរូបលោកផ្ទាល់ពង្រឹងវិជ្ជាជីវៈ។ លោកបន្ដថា ការផ្ដល់ដំបូន្មានរបស់សម្ដេចនាពេលនេះរូបលោកផ្ទាល់គឺមិនមានការអាក់អន់ចិត្ដអ្វីទេ ផ្ទុយទៅវិញមានការដឹងគុណនិងអរគុណសម្ដេច ហ៊ុន សែន តែប៉ុណ្ណោះ។
លោក ផៃ ស៊ីផាន៖«នេះជាការណែនាំមួយដ៏ខ្ពង់ខ្ពស់ ដែលទាំងអ្នកនាំពាក្យ ទាំងមន្ដ្រីទាំងអស់ ក៏ដូចជាអ្នកធ្វើព័ត៌មាន ត្រូវពង្រឹងវិជ្ជាជីវៈម្ដងទៀត ក្នុងន័យនេះឯងគ្មានអ្វីជាការអាក់អន់ស្រពន់ចិត្ដទេមានតែការទទួលដោយអំណរនៃការណែនាំដ៏ខ្ពង់ខ្ពស់។»
ស្របពេលដែលរិះគន់ទៅលើលោក ផៃ ស៊ីផាន សម្ដេចនាយករដ្ឋមន្ត្រីក៏បានបង្ហើបពីភារកិច្ចនិងស្ថាប័ន មួយចំនួនដែលពីមុនស្ថិតក្រោមការគ្រប់គ្រងរបស់សម្ដេច សុខ អាន ឱ្យទៅរដ្ឋមន្ត្រីផ្សេងកាន់កាប់។ ស្ថាប័ននោះមាន អាជ្ញាធរអប្សរា និង អាជ្ញាធរព្រះវិហារទៅនៅក្រោមក្រសួងវប្បធម៌ និងវិចិត្រសីល្បៈ៕
