ភ្នំពេញ៖ លោកវេជ្ជបណ្ឌិត គួច ម៉េងលី ដែលមានងារជាឧកញ៉ា និងជាប្រធានក្រុមហ៊ុនមួយ នៅក្នុងប្រទេសកម្ពុជា ហើយក៏ជាបុគ្គលដែលត្រូវបានគេកោតសរសើរថា ជាអ្នកជំនួញមានគុណធម៍ផងនោះ លោកបានថ្លែងក្នុងវេទិកាភាពជាអ្នកដឹកនាំថា សិស្សនៅកម្ពុជា នឹងមិនអាចមានចំណេះដឹងទូលាយ ដូចនៅប្រទេសដទៃជុំវិញពិភពលោក បានទេ បើការអប់រំនៅតែមិនមានការកំណែទម្រង់ឲ្យបានជាក់លាក់។
ទន្ទឹមនឹងការថ្លែងរបស់លោក គួច ម៉េងលី អង្គការសង្គមស៊ីវិល ដែលធ្វើការ លើកិច្ចការសង្គមពិសេស លើការអប់រំនេះ បង្ហាញការគាំទ្រដោយបញ្ជាក់ថា ក្រសួងអប់រំគួរ មានការគិតគូរ ពីការធ្វើកំណែទម្រង់ ឡើងវិញ ដើម្បីភាពរីកចម្រើនប្រទេសជាតិ។ លោក លៀ ស៊ីណា រាយការណ៍៖
លោកវេជ្ជបណ្ឌិត គួច ម៉េងលី មានប្រសាសន៍ ក្នុងវេទិកាភាពជាអ្នកដឹកនាំក្រោមប្រធានបទ «ភាពជាអ្នកបន្ដវេន» នៅឯមជ្ឈមណ្ឌលសហប្រតិបត្តិការ កម្ពុជា-ជប៉ុន នៅថ្ងៃ ចន្ទ ទី ១០ តុលា នេះ ថា ដើម្បីឲ្យសិស្សនៅកម្ពុជា អាចមានចំណេះដឹង និងការអប់បានល្អដូចនៅប្រទេសដទៃ លុះត្រាតែក្រសួងអប់រំ ធ្វើការកែទម្រង់ ការសិក្សារបស់សិស្សឲ្យមានភាពជាក់លាក់។
លោក វេជ្ជបណ្ឌិត បានលើកឡើងបីចំណុចសំខាន់ ក្នុងនោះរួមមាន ក្រសួងអប់រំត្រូវតែ កែទម្រង់ការសិក្សាសិស្សកម្ពុជាឲ្យដូចទៅនឹងប្រទេសនៅជុំវិញពិភពលោក។ ទីពីរ ត្រូវតែរៀបចំហេដ្ឋារចនាសម្ព័ន្ធសាលា និងផ្លូវ សម្រាប់សិស្សកុំឲ្យមានការលំបាក ក្នុងការធ្វើដំណើរទៅសាលា។ ចំណុចទីបី គឺធ្វើយ៉ាងណាផ្ដល់តម្លៃ គ្រូបង្រៀន ឲ្យបានខ្ពស់ តាមរយៈការផ្ដល់ប្រាក់បៀវត្ស។
ប្រការនេះលោកថា បើកាលណាគ្រូង្រៀន ត្រូវធ្វើការងារ ពីរ បី ដើម្បីចិញ្ជិមជីវិត បន្ថែមពីការបង្រៀន ដែលខ្វះមុខខ្វះក្រោយនោះ នឹងធ្វើឲ្យពួកគាត់ ត្រូវបានសិស្សដែលជាកូនអ្នកមានមួយចំនួនមិនគោរព មិនឲ្យតម្លៃលើការបង្រៀនរបស់លោកគ្រូ អ្នកគ្រូនោះទេ។
លោក គួច ម៉េងលី៖ «ដោយសារ គ្រូអត់មានតម្លៃ ប្រទេសណាក៏ដោយបើយើងមិនគោរព មាតាបិតាគឺបរាជ័យ បើយើងមិនគោរពលោកគ្រូ គឺបរាជ័យ ដូច្នេះសំខាន់ណាស់គឺយើងឲ្យតម្លៃគ្រូ ហើយបើឲ្យតម្លៃគ្រូ ទាល់តែគ្រូចិញ្ចឹមក្រពេះរួច ទាល់តែគ្រូហ្នឹងមានឱកាសលូតលាស់ ហើយមានពេលស្រាវជ្រាវ មានពេលកំសាន្ដ មានកម្លាំងកាយចិត្ដដើម្បីបង្រៀន ហ្នឹង ជាស្អីគេគឺជាស្នូលដើម្បីឲ្យគាត់ កម្លាំងចិត្ដហ្នឹងគឺថវិការ ជាស្នូលតាមអតិផរណា អាចចិញ្ចឹមគ្រួសាររស់»។
ចំណែកលោកស្រី អុក ឆាយ៉ាវី ប្រធានស្ដីទីសមាគមគ្រូបង្រៀនកម្ពុជា ឯករាជ្យ ដែលផ្ដល់បទសម្ភាសន៍ មកកាន់វិទ្យុស្ដ្រីFM102 នៅថ្ងៃទី ១០ ខែ តុលា នេះ មានប្រសាសន៍ថា អនុសាសន៍ របស់ លោកវេជ្ជបណ្ឌិត គួច ម៉េងលី គឺលោកស្រីពិតជាគាំទ្រ ហើយក៏សំណូមពរ ដល់រាជរដ្ឋាភិបាល ពិសេសក្រសួងអប់រំផ្ទាល់ត្រូវតែរៀងចំការ ការសិក្សា របស់សិស្សឲ្យមានប្រសិទ្ធភាពជាងនេះ។ លោកស្ដ្រីបន្ថែមថា ដើម្បីឲ្យសិស្ស ទទួលបានចំណេះដឹង បានច្រើនពីគ្រូ គឺសំខាន់ ក្រសួងត្រូវតែយកចិត្ដទុកដាក់ លើការរស់នៅរបស់លោកគ្រូអ្នកគ្រូ ធ្វើយ៉ាងណាឲ្យអាចរស់នៅបានសមរម្យ ។
លោកស្រី អុក ឆាយ៉ាវី បញ្ជាក់ថា កាលណាសិស្សមិនមានសមត្ថភាព គឺធ្វើឲ្យប៉ះពាល់យ៉ាងខ្លាំងដល់សង្គមជាតិ ដែលក្រសួងអប់រំ គួរងាកមកយកចិត្ដទុកដាក់ លើការឲ្យតម្លៃគ្រូបង្រៀនឲ្យបានច្រើន ពិសេសគឺប្រាក់បៀវត្ស។
អ្នកស្រី អុក ឆាយ៉ាវី៖«តាមពិតទៅប្រសាសន៍ លោកឧកញ៉ា ពិតជាត្រឹមត្រូវ បើរាជរដ្ឋាភិបាលប្រើយុទ្ធសាស្ដ្របែបនេះ ខ្ញុំគិតថាប្រសើរ ជាពិសេសគឺប្រាក់បៀវត្ស របស់លោកគ្រូអ្នកគ្រូ ទោះបីយើងបង្រៀនដូចកាលពីសង្គមរាស្ដ្រនិយម សង្គមរាស្ដ្រនិយម គេបង្រៀនទាំងព្រឹកទាំងល្ងាច ប៉ុន្ដែថវិការលោកគ្រូអ្នកគ្រូ យើងគឺពេញទៅដោយការខិតខំប្រឹងប្រែង»។
ដូចគ្នាដែរលោក សន ជ័យ នាយកប្រតិបត្ដិ សម្ព័ន្ធគណនេយ្យភាពសង្គមកម្ពុជា ក៏គាំទ្រការលើកឡើងរបស់លោកវេជ្ជបណ្ឌិត គួច ម៉េងលី ដូចគ្នាដែរ។ លោកយល់ថា ការអប់រំនៅកម្ពុជា ពិតជាមានកម្រិតមែន។ ជាងនេះ ក្រៅតែពីពឹងផ្អែកលើការបង្រៀនរបស់គ្រូនៅសាលា គឺ មាតាបិតាសិស្ស ក៏ត្រូវតែរួមចំណែកអប់រំដល់កូនៗរបស់ខ្លួនផងដែរ។
លោក សន ជ័យ មើលឃើញថា បច្ចុប្បន្ន ក្មេងដែលមិនចូលសាលារៀន ហើយបែរជាមកបង្កការរំខាន ដល់សិស្សដែលសិក្សា ក៏មានច្រើនណាស់ដែរ ដែលលោកអំពាវនាវដល់អាជ្ញាធរ មានសមត្ថកិច្ច គួរតែរឹតបន្ដឹង ការអនុវត្ដន៍ច្បាប់ឲ្យបានតឹងរឹង ធ្វើយ៉ាងណាកាត់បន្ថយ ឬលុបបំបាត់ក្មេង ដែលបង្កការរំខានដល់ការសិក្សា ឲ្យបាន ទើបធ្វើឲ្យការសិក្សា នៅកម្ពុជាមានភាពល្អប្រសើរជាងនេះ។
លោក សន ជ័យ៖ «សិស្សខ្លះអត់ខ្លាចគ្រូទេ ហើយសិស្សខ្លះនឹងមនុស្សខ្លះទៀត ទៅបំផ្លាញទ្រព្យសម្បត្ដិ ក្នុងសាលារៀន ដូចយើងឃើញសាលារៀនខ្លះ ត្រូវបានក្មេងហែកទ្វា កំទេចសំភារៈ ក្នុងសាលារៀនជាដើម ព្រោះអត់មានការសហការ ពីកងប្រដាប់អាវុធ ឬកងសមត្ថកិច្ចដែលធ្វើការក្នុងសង្គមហ្នឹង»។
កាលពីពេលថ្មីៗទៅនេះ សម្ដេចនាយករដ្ឋមន្ដ្រី ហ៊ុន សែន បានសន្យាដំឡើងប្រាក់ខែ ជាង៩០ម៉ឺនរៀល ដល់គ្រូបង្រៀន ដោយគិតពីឆ្នាំ ២០១៧ តទៅ ដើម្បីឲ្យគ្រូបង្រៀន អាចមានជីវភាព អាចរស់នៅបានប្រកបដោយភាពថ្លៃថ្នូរ ។ ប៉ុន្ដែយ៉ាងណាក៏ដោយ ទោះបីសម្ដេចនាយករដ្ឋមន្ដ្រីសន្យាដូចនេះក៏ពិតមែន ប៉ុន្ដែក្រុមគ្រូបង្រៀនភាគច្រើន យល់ថា ទឹកប្រាក់នេះមិនទាន់ អាចជួយគ្រួបង្រៀនទាំងអស់ដែលមានជីវភាពខ្សត់ខ្សោយ ឈប់ប្រកបមុខរបរទីពីរ ឬទីបី នោះទេ។
គួរជម្រាមបដែរថា កាលពីថ្ងៃទី ០៥ ខែ តុលា ឆ្នាំ ២០១៦ កន្លងទៅ សមាគម គ្រូបង្រៀនកម្ពុជាឯករាជ្យ បានប្រារព្ធទិវាគ្រូបង្រៀនពិភពលោកលើកទី ៥០ ដោយទាមទារឲ្យរាជរដ្ឋាភិបាល តម្លើងប្រាក់ខែជួនគ្រូបង្រៀនចាប់ពី ១លាន ៥សែនរៀល ដោយគិតចាប់ពីកម្រិត មតេយ្យសិក្សាឡើងទៅ៕
