នៅពេលដែលអ្នកមានបញ្ហាផ្លូវចិត្ត មានការព្រួយបារម្ភ ឬ ខូចចិត្តដោយសារបញ្ហាអ្វីមួយ ថាមពលផ្លូវចិត្តរបស់អ្នកនឹងស្រុតចុះ មានន័យថា កម្លាំងចិត្តរបស់អ្នកនៅក្នុងស្មារតីតស៊ូព្យាយាម ក៏ចាប់ផ្តើមធ្លាក់ចុះរលាយសូន្យបន្តិចម្តងៗដែរ។ ដូច្នេះ ដើម្បីឱ្យអ្នកមានកម្លាំងចិត្ត មានថាមពល និងមានទស្សនៈវិជ្ជមានឡើងវិញ សូមអ្នកសាកល្បងអនុវត្តន៍វិធីសាស្ត្រសាមញ្ញ ៨យ៉ាង ដើម្បីធ្វើឱ្យផ្លូវចិត្តរឹងមាំ មានដូចខាងក្រោម ៖
១. ព្យាយាមធ្វើចិត្តឱ្យត្រជាក់ ៖ រក្សាអារម្មណ៍ឱ្យស្ងប់ ដង្ហើមវែងមួយៗ ធ្វើអ្វីៗយឺតៗជាងមុនបន្តិច ការងារធ្ងន់ធ្ងរនឹងស្រាកស្រាន្ត ពេលនោះផ្លូវចិត្តដែលតានតឹងនឹងធូរស្រាលជាងមុនមិនខាន។
២. ដាក់ខ្លួនប្រឡូកទៅក្នុងធម្មជាតិ ៖ ដើរកម្សាន្តតាមទីជនបទ តំបន់ទេសចរណ៍ធម្មជាតិ ដងស្ទឹង ទន្លេ សមុទ្រ ឬព្រៃភ្នំ ជាវិធីសាស្ត្រសាមញ្ញមួយ អាចជួយឱ្យអារម្មណ៍ស្រស់ស្រាយ និង ដើម្បីធ្វើឱ្យផ្លូវចិត្តរឹងមាំឡើងវិញ។
៣. ចិញ្ចឹមសត្វដែលអ្នកចូលចិត្ត ៖ ស្វែងរកសត្វណាមួយដែលអ្នកចូលចិត្តមកចិញ្ចឹម ដើម្បីកាត់បន្ថយភាពអផ្សុក និង អារម្មណ៍តានតឹង។
៤.តស៊ូនឹងបញ្ហាដោយស្នាមញញឹម ៖ អ្នកដឹងទេ ស្នាមញញឹម ឬសើចមានសារៈសំខាន់ណាស់ ដើម្បីបំបាត់ភាពហត់នឿយ ជាពិសេសធ្វើឱ្យអារម្មណ៍ស្រស់ថ្លាទប់ទល់នឹងអ្វីៗដែលខ្លួនជួបប្រទះ។
៥. ផ្តល់រង្វាន់ដល់ខ្លួនឯង ៖ មិនចាំបាច់តែអ្នកដទៃនោះទេ ការផ្តល់រង្វាន់លួងចិត្តដល់ខ្លួន ក៏ជាវិធីមួយធ្វើឱ្យចិត្ត កាយ និងស្មារតីរបស់អ្នកស្រស់ស្រាយដែរ។ ផ្តល់រង្វាន់ស្នាដៃដល់ខ្លួននិងកិច្ចការអ្វីដែលខ្លួនបម្រុងធ្វើ ឬ ពេលដែលធ្វើបានសម្រេច មានដូចជាភេសជ្ជៈល្អៗ អាហារនិងនំឆ្ងាញ់ៗ មកទទួលទានមុនពេលចាប់ផ្តើមធ្វើការ ឬ អំណោពិសេសណាមួយពេលធ្វើកិច្ចការចប់។
៦. សុំជំនួយពីអ្នកដទៃ ៖ កុំមានចិត្តរារែកឱ្យសោះក្នុងការសុំជំនួយពីអ្នកដទៃរាល់ពេលដែលអ្នកមានបញ្ហា ។ ការសុំជំនួយពីអ្នកដទៃជារឿងល្អបំផុត ព្រោះនៅពេលដែលសម្ពាធផ្លូវចិត្តរបស់អ្នកមានបញ្ហាដោះស្រាយមិនចេញ ទោះអ្នកបង្ខំចិត្តស៊ូទ្រាំយ៉ាងណាក៏ដោយ ក៏មិនអាចដោះស្រាយបានដែរ។ ផ្ទុយទៅវិញសម្ពាធទាំងនោះ នឹងធ្វើឱ្យអ្នកមានវិបត្តិកាន់តែធ្ងន់ធ្ងរមិនខាន។
៧. អានសៀវភៅ ៖ អានសៀវភៅគឺជាគន្លឹះសំខាន់បំផុត ដើម្បីធ្វើឱ្យផ្លូវចិត្តរឹងមាំ។ គ្មានអ្វីអាចបំបាត់ភាពស្មុគស្មាញជាបានប្រសើរ ដូចការអានសៀវភៅល្អមួយក្បាលឡើយ។ ចូរសាកល្បងជ្រើសរើសសៀវភៅណាល្អៗ អានដើម្បីធ្វើឱ្យគុណភាព និងដោះស្រាយបញ្ហាដោយងាយស្រួល។
៨. ប្រើប្រាស់ពេលវេលាសម្រាកឱ្យមានប្រយោជន៍បំផុត ៖ ពេលធ្វើការ គឺធ្វើការ ពេលសម្រាក គឺជាពេលដែលខួរក្បាល ចិត្ត កាយត្រូវការសម្រាក ត្រូវបែងចែកឱ្យបានច្បាស់។ ត្រូវមានពេលវេលាសមស្របសម្រាប់ខ្លួនឯង ដើម្បីធ្វើរឿងល្អៗចំពោះខ្លួនឯង និង មនុស្សជុំវិញខ្លួន។ ទោះមានឃ្លាថា ពេលវេលាជាមាសប្រាក់ក៏ដោយ ក៏មិនត្រូវបង្ខំខ្លួនធ្វើការឱ្យធ្លាក់ក្នុងស្ថានភាពទាសករនៃលុយកាក និងការងារដែរ ។ បង្កើតភាពរីករាយ និង ប្រើប្រាស់ពេលវេលាសម្រាកឱ្យមានប្រយោជន៍បំផុត ទើបជីវិតមានគុណភាព ៕
អត្ថបទ ម៉ៅ សំណាង