នៅថ្ងៃទី២២ ខែមករា នេះ គឺជាថ្ងៃខួបលើកទី ១២ ឆ្នាំហើយ នៃការបាត់បង់ជីវិតរបស់ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា វិជា្ជ។ សមត្ថកិច្ចមិនទាន់វែកមុខ ជនល្មើសដែលបាញ់ប្រហារផ្តាច់ជីវិត លោក ជា វិជ្ជា យកមកផ្តន្ទាទោសនៅឡើយទេ។
ប្រធានសហជីពសេរីកម្មករបច្ចុប្បន្ន ដែលត្រូវជាប្អូនប្រុសបង្កើតរបស់លោក ជា វិជ្ជា គឺលោក ជា មុនី ចោទរដ្ឋាភិបាលថា អសមត្ថភាពក្នុងការវែកមុខរកជនល្មើសផ្តន្ទាទោសតាមច្បាប់ ដើម្បីផ្តល់យុត្តិធម៌ឱ្យបងប្រុសរបស់លោក។
ប្រជាពលរដ្ឋ កម្មករ-កម្មការិនី ជិត ៣០០ នាក់ និងសាច់ញាតិជនរងគ្រោះ បានប្រមូលផ្តុំគ្នានៅលើសួនច្បារជិតវិមានឯករាជ្យ នៅព្រឹកថ្ងៃសុក្រនេះ ដើម្បីដាក់កម្រងផ្ការំឭកខួប ១២ ឆ្នាំ នៃការបាត់បង់ជីវិតអតីតប្រធានសហជីពសេរីកម្មករ លោក ជា វិជ្ជា។
អតីតប្រធានសហជីពសេរីកម្មករ លោក ជា វិជ្ជា ត្រូវបានឃាតកបាញ់សម្លាប់ កាលពីថ្ងៃទី២២ ខែមករា ឆ្នាំ២០០៤ នៅមុខតូបលក់កាសែតក្បែរវត្តលង្ការ ខណៈលោកកំពុងអានកាសែត ដូចសព្វដង។
លោក ជា មុនី ប្រធានសហជីពសេរីកម្មករនៃព្រះជាណាចក្រកម្ពុជា សម្តែងការសោកស្តាយចំពោះការយឺតយ៉ាវក្នុងការវែកមុខជនដៃដល់ដែលបានបាញ់សម្លាប់ លោក ជា វិជ្ជា យកមកផ្តន្ទាទោសតាមច្បាប់។ លោកចង់ឃើញចំណាត់ការណាមួយដែលមានប្រសិទ្ធភាព ចេញពីរដ្ឋាភិបាល ដើម្បីវែកមុខជនល្មើស មិនមែនគ្រាន់តែបង្កើតគណៈកម្មការហើយមិនអនុវត្តនោះទេ។
លោក ជា មុនី បន្ថែមថា៖ «ខ្ញុំ ឃើញជនពាក់ព័ន្ធ ហើយនិងជនល្មើស ខ្ញុំគិតថា នៅមានសេរីភាពនៅឡើយ។ ចឹង អ្វីដែលខ្ញុំឆ្លើយទៅនឹងសំណួរអ្នកសារព័ត៌មាន ខ្ញុំគ្រាន់ថា រដ្ឋាភិបាលហ្នឹងអសមត្ថភាព។ អសមត្ថភាព ដោយសារតែពួកឃាតករ និងជនដៃដល់ហ្នឹង វាពាក់ព័ន្ធ វាពាក់ព័ន្ធ អាចនិយាយបានថា រដ្ឋាភិបាល នៅក្រោយខ្នងឃាតករហ្នឹងក៏ថាបាន»។
ជុំវិញបញ្ហានេះ វិទ្យុស្ត្រីមិនទាន់អាចសុំការឆ្លើយតបពីអ្នកនាំពាក្យក្រសួងមហាផ្ទៃ ខៀវ សុភ័ក្រ បាននៅឡើយទេនៅថ្ងៃនេះ។ ប៉ុន្តែកាលពីថ្ងៃទី០៤ ខែសីហា ឆ្នាំ ២០១៥ រដ្ឋាភិបាលបានបង្កើតគណៈកម្មការអន្តរក្រសួងពិសេសមួយ ដើម្បីធ្វើការស្រាវជ្រាវលើបញ្ហានេះ។
ទាក់ទងនឹងបញ្ហានេះ តំណាងរាស្ត្រគណបក្សសង្គ្រោះជាតិ និងជាប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភានិងព្រឹទ្ធសភា លោក អេង ឆៃអ៊ាង ដែលបានចូលរួមក្នុងពិធីរំឭកខួបនេះដែរ បានជំរុញឱ្យរដ្ឋាភិបាលពន្លឿនបើកការស៊ើបអង្កេត ឱ្យបានកាន់តែឆាប់ ដើម្បីផ្តល់យុត្តិធម៌ជូន លោក ជា វិជ្ជា។ លោកថា៖ «បើទោះបីជារដ្ឋាភិបាលបច្ចុប្បន្នបានបង្កើតគណៈកម្មការអន្តរក្រសួងមួយដើម្បីស៊ើបអង្កេតលើរឿងនេះយ៉ាងណាក៏ដោយ តែពន្លឺនៃយុត្តិធម៌មិនទាន់លេចចេញជារូបរាងនៅឡើយ»។
ទាក់ទងនឹងបញ្ហានេះ មន្ដ្រីឃ្លាំមើលផ្នែកសិទ្ធិមនុស្សនៃអង្គការលីកាដូ លោក អំ សំអាត យល់ឃើញថា បញ្ហាឃាតកម្មលើលោក ជា វិជ្ជា នេះ គឺជាករណីដែលមាននិទណ្ឌភាពនៅឡើយ។ មន្ត្រីឃ្លាំមើលសិនមនុស្សរូបនេះ ក៏បានជំរុញឱ្យរដ្ឋាភិបាល តាមរយៈក្រសួងមហាផ្ទៃ ត្រូវតែវែកមុខចាប់ជនដៃដល់ឱ្យបាន យកមកដាក់ទោសតាមផ្លូវច្បាប់។
«បាទ នេះយើងឃើញថា មិនត្រឹមត្រឹមតែមិនបានផ្ដល់់យុត្តិធម៌ ឬក៏ស្វែងរកស្រមោលនៃ ជនដែលប្រព្រឹត្ដទេផ្ទុយទៅវិញ យើងឃើញថា បើជាមនុស្សដទៃត្រូវបានរងគ្រោះ ដោយករណីការបាញ់សម្លាប់លោកជាវិជ្ជាជាបន្ដទៅទៀតបាទ។ ចឹង យើង ជាសង្គមស៊ីវិល យើងនៅតែមើលឃើញថា ហាក់បីដូចជា មិនសូវមានការសង្ឃឹមទៅលើគណៈ កម្មការដែលបង្កើតឡើងដោយរដ្ឋាភិបាលក្នុងពេលថ្មីៗនេះ ដើម្បីធ្វើការស៊ើបអង្កេតទៅលើករណីនៃការបាញ់សម្លាប់ លោក ជាវិជ្ជា ក៏ដូចជា លោក រស់
សុវណ្ណារ៉េត និងលោក ហ៊ី វុទ្ធី នោះទេបាទ»។
លើសពីនេះទៀត ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភានិងព្រឹទ្ធសភា លោក អេង ឆៃអ៊ាង អះអាងថា ពាក់ព័ន្ធនឹងបញ្ហានេះ លោកនឹងកោះអញ្ជើញលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ នៅខែមិនា ខាងមុខនេះ ដើម្បីមកសាកសួរពីបញ្ហាប្រព័ន្ធយុត្តិធម៌នៅកម្ពុជា៕
រាយការណ៍បន្ថែមដោយ៖ កញ្ញា ឆេង ណាតា
