ភ្នំពេញ ៖ ក្រសួងធនធានទឹក បានប្រកាសឲ្យដឹងថា រាជធានីភ្នំពេញ និងខេត្ដចំនួន ៤ទៀត អាចប្រឈមជំនន់ទឹកភ្លៀងចាប់ពីចុងសប្ដាហ៍នេះ រហូតដល់ដើមសប្ដាហ៍ក្រោយ។ នេះបើតាមសេចក្ដីជូនដំណឹងរបស់ក្រសួងធនធានទឹក ចុះផ្សាយ កាលពីថ្ងៃទី០៥ តុលា។
ក្រសួងធនធានទឹក បានបញ្ជាក់ថា រាជធានីភ្នំពេញ ខេត្ដកណ្ដាល កំពង់ស្ពឺ តាកែវនិងខេត្ដកពត អាចនឹងប្រឈមជំនន់ទឹកភ្លៀង ព្រោះពេលនេះកំពុងរងឥទ្ធិពលទាំងជ្រលងសម្ពាធខ្ពស់ពីទិសខាងជើង និងប្រព័ន្ធសម្ពាធទាប ដែលកំពុងអូសកាត់លើតំបន់ដីសណ្ដរទន្លេមេគង្គ។
តែយ៉ាងណាក្រៅពីរាជធានី និងខេត្ដទាំង ៤ខាងលើ ខេត្ដក្រុង ដទៃៗទៀត នៅទូទាំងប្រទេសកម្ពុជា នឹងមានភ្លៀងធ្លាក់ក្នុងកម្រិត ពីតិចទៅមធ្យម សម្រាប់តំបន់ខ្ពង់រាប ដែលមានដូចជាខេត្ដ ខេត្ដកំពង់ស្ពឺ ព្រះវិហារ ស្ទឹងត្រែង ក្រចេះ រតនគិរី និងខេត្ដមណ្ឌលគិរី។ ចំណែកខេត្ដក្នុងតំបន់ទំនាបកណ្ដាល និងតំបន់មាត់សមុទ្រ ភ្លៀងនឹងធ្លាក់ក្នុងកម្រិតពីមធ្យមទៅច្រើន៕
