យុវជន ប្រមាណជាង៣០នាក់ មកពីសាកលវិទ្យាល័យភូមិន្ទភ្នំពេញ គាំទ្រឲ្យរាជរដ្ឋាភិបាលកម្ពុជាដាក់សារជា រូបភាព និងអក្សរ នៅលើកញ្ចប់បារី ដោយសារតែពួកគេ យល់ឃើញថា បារីធ្វើឲ្យប៉ះពាល់ដល់សុខភាពមនុស្ស និងថវិការរបស់អ្នកជក់។ ការលើកឡើងបែបនេះ ធ្វើឡើងនៅក្នុងសិក្ខាសាលាស្ដីពី «ការអនុវត្ត ការបោះពុម្ព បម្រាមសុខភាព នៅតំបន់អាស៊ាន និងក្នុងពិភពលោក» ដែលរៀបចំដោយ អង្គការចលនាដើម្បីសុខភាពកម្ពុជា នៅមជ្ឃមណ្ឌលសហប្រតិបត្តិការកម្ពុជាកូរ៉េ (CKCC) នៅថ្ងៃទី១៤ ខែ កក្កដា ២០១៥នេះ។
អង្គការ ចលនាដើម្បីសុខភាពកម្ពុជា រៀបចំកម្មវិធីនេះឡើងក្នុងគោលបំណងតែមួយគត់គឺ ដើម្បីកាត់បន្ថយចំនួនអ្នកជក់បារីនៅកម្ពុជាឲ្យឈប់ជក់និងងាកចេញពីគ្រោះថ្នាក់សុខភាព ដោយសារផ្សែងបារី។ ទាក់ទិននឹងបញ្ហានេះ យុវជនមកពីសាកលវិទ្យាល័យ ភូមិន្ទភ្នំពេញ លោក លុក ចំរើន បានឲ្យដឹងថា បច្ចុប្បន្ននេះ មានប្រទេសជាង៧០ នៅលើពិភពលោកហើយដែលមានសារព្រមានជារូបភាព និងអក្សរនៅលើកញ្ចប់បារី ឬក៏ថ្នាំជក់ ក្នុងនោះមានប្រទេសអាស៊ាន៧ ក្នុងចំណោមប្រទេសអាស៊ានទាំង១០។
ដោយឡែកនៅប្រទេសកម្ពុជាវិញ មានតែសារព្រមានជាអក្សរ តែ៣០ភាគរយប៉ុណ្ណោះ នៅលើកញ្ចប់បារី។ ដូចនេះ យុវជន លុក ចំរើន ស្នើឲ្យរដ្ឋាភិបាល ដាក់សារព្រមានជារូបភាព និងអក្សរបន្ថែមទៀត នៅលើកញ្ចប់បារី ដើម្បីឲ្យអ្នកជក់បានដឹងពីកម្រិតនៃផលប៉ះពាល់ដោយសារឥទ្ធិពលនៃផ្សែងបារីនេះ។ ដូចគ្នានេះដែរយុវសិស្ស យឹង ម៉ានី បាននិយាយថា «អ្នកជក់បារីមានបញ្ហាជាច្រើន ដល់សុខភាព ដូចជា ជំងឺមហារីកសួត និងពុកធ្មេញជាដើម។ អ្នកមានកូនធ្វើឲ្យមានប៉ះពាល់ដល់សុខភាពកូនក្នុងផ្ទៃ ជាងនេះទៀត បារីអាចប៉ះពាល់ធ្ងន់ធ្ងរដល់សុខភាពក្រុមគ្រួសារ និងមនុស្សជាទីស្រលាញ់ដែលឋិតនៅក្បែរអ្នកជក់ទៀតផង។ មិនត្រឹមតែប៉ុណ្ណោះ បារីធ្វើឲ្យខាតបង់ថវិការផ្ទាល់ខ្លួន ឬថវិការក្នុងក្រុមគ្រួសារផងដែរ»។
ចំណែក យុវតី លី ឈីវយី និស្សិតអក្សរសាស្រ្ដខ្មែរឆ្នាំទី៣នៃសាកលវិទ្យាល័យ ភូមិន្ទភ្នំពេញបានបញ្ចេញមតិយោបល់ដែរថាកញ្ញាចង់ឲ្យរដ្ឋាភិបាលដាក់សារព្រមានជារូបភាពនៅលើកញ្ចប់បារីជាជាងដាក់សារជាអក្សរឬពាក្យស្លោក។ សារជារូបភាពមានឥទ្ធិពលអាចធ្វើឲ្យអ្នកជក់ឃើញផ្ទាល់នឹងភ្នែកអំពីផលប៉ះពាល់និងមានការភ័យខ្លាចអាចឈប់ជក់បាន។
ទាក់ទងនឹងបញ្ហានេះ លោកមុំ គង់នាយកប្រតិបត្តិអង្គការចលនាដើម្បីសុខភាពកម្ពុជា ក៏បានជុំរុញឲ្យរដ្ឋាភិបាលអនុវត្តទៅលើសារព្រមាន នៅលើកញ្ចប់បារីនេះដែរ ឲ្យដូចទៅនឹងអ្វីដែលមានចែងនៅក្នុងច្បាប់ស្ដីពី ការត្រួតពិនិត្យផលិតផលថ្នាំជក់។ លោកវេជ្ជបណ្ឌិតបន្ថែមថា «សារព្រមានគួរតែរំលេចទាំងរួបភាព និងអក្សរនៅលើកញ្ចប់បារី។ ម្យ៉ាងទៀតអក្សរត្រូវតែជាអក្សរដិតហើយប្រើជាភាសាខ្មែរ និងឆ្លាស់ពណ៌ជាមួយផ្ទៃសំបកខាងក្រោយកញ្ចប់បារី ជាពិសេស សារនេះត្រូវតែផ្លាស់ប្ដូរឲ្យបានទៀងទាត់រៀងរាល់បីឆ្នាំម្ដងផងដែរ…។ ៦ឆ្នាំហើយ យើងមិនដែលបានប្តូរ អីញ្ចឹងវាជាពេលមួយដែលកម្ពុជាយើងត្រូវផ្លាស់ប្តូរសារ»។
សូមបញ្ជាក់ថា ការដាក់សារព្រមានសុខភាពលើកញ្ចប់បារីទទួលបានការគាំទ្រយ៉ាងខ្លាំងពីប្រជាពលរដ្ឋកម្ពុជា រួមទាំងអ្នកកំពុងជក់បារីផងដែរ។ បើតាមស្ថិតិផ្ដល់ដោយវិទ្យាស្ថានជាតិ ស្រាវជ្រាវ នៃក្រសួងផែនការ មានប្រជាពលរដ្ឋកម្ពុជាជាង៩០ភាគរយ ចង់ឃើញមានសារព្រមានសុខភាពជារូបភាពធំៗលើកញ្ចប់បារី។ ការស្រាវជ្រាវមួយទៀតដែលធ្វើឡើងដោយសាកលវិទ្យាល័យភូមិន្ទភ្នំពេញនៅឆ្នាំ២០១៤ ក៏បានបង្ហាញផងដែរថា ប្រជាពលរដ្ឋកម្ពុជាជាង៩០ភាគរយ យល់ថា សារព្រមានសុខភាពជារូបភាពធំៗ មានប្រសិទ្ធភាពបង្ការកុមារ មិនឲ្យចាប់ផ្ដើមជក់បារី និងជំរុញអ្នកជក់ស្រាប់ឲ្យផ្ដាច់បារីបាន៕