នាយករដ្ឋមន្ត្រី ប្រាយុទ្ធចាន់អូចា បានបង្ហើបថា លោកចាប់អារម្មណ៍នឹងជីវិតនយោបាយដែលធ្វើឱ្យអស់មន្ទិលអំពីមហិច្ឆតានយោបាយរបស់លោក ខណៈប្រទេសលោកត្រៀមរៀបចំការបោះឆ្នោតនៅឆ្នាំក្រោយ។
លោក ប្រាយុទ្ធ ចាន់អូចា ជាមេដឹកនាំរដ្ឋប្រហារទំលាក់រដ្ឋាភិបាលស៊ីវិលរបស់គណបក្សភឿថៃកាលពីខែឧសភា ឆ្នាំ២០១៤ បានបញ្ជាក់ថា សេចក្ដីស្រឡាញរបស់លោក គឺដើម្បីប្រទេសដែលធ្វើឱ្យលោកមានហេតុផលនៅពីក្រោយសេចក្ដីសម្រេចរបស់លោកដើម្បីចូលរួមនយោបាយ។
លោក ប្រាយុទ្ធ៖ «ពលរដ្ឋជាច្រើន ចង់អោយខ្ញុំផ្ដល់ចម្លើយ អំពីនយោបាយ។ សម្រាប់ខ្ញុំអាចឆ្លើយបានឥឡូវនេះ ថា ខ្ញុំចាប់អារម្មណ៍រឿងនយោបាយ»។
លោកឧត្តមសេនីយ៍បញ្ចាក់បន្ថែមថានៅខាងមុខនេះ លោកនឹងប្រាប់សាធារជនអំពីសេចក្ដីរបស់លោក។
សម្រាប់ លោក ប្រាយុទ្ធ សូមអោយពលរដ្ឋរង់ចាំបន្តិច ព្រោះលោកកំពុងតែចង់ឃើញប្រតិកម្មពីគណបក្សនយោបាយដែរ។
ក្នុងរយៈពេលចុងក្រោយនេះ ប្រព័ន្ធផ្សព្វផ្សាយជាច្រើននៃប្រទេសថៃបានចុះផ្សាយថា លោកប្រាយុទួ្ធនឹងបង្កើតបក្សនយោបាយមួយ ដើម្បីចូលរួមការបោះឆ្នោត ហើយលោកនឹងនៅតែជាបេក្ខជននាយករដ្ឋមន្ត្រី។ រយៈពេលបួនឆ្នាំហើយ ដែលរដ្ឋាភិបាលថៃស្ថិតនៅក្រោមការដឹកនាំរបស់ឧត្តមសេនីយរូបនេះដែលធ្វើឱ្យមជ្ឈដ្ឋានខ្លះបារម្ភថា រាជាណាចក្រនេះមិនអាចវិលទៅរកប្រព័ន្ធរដ្ខបាលស៊ីវិលបានឡើយ៕