ភ្នំពេញ៖ មរណភាពសម្ដេច សុខ អាន មានឥស្សរជនជាន់ខ្ពស់ជាច្រើនបានផ្ញើសាររំលែកទុក្ខនិងទៅចូលរួមពិធីបុណ្យសព ក្នុងនោះព្រះមហាក្សត្រ ព្រះមហាក្សត្រី ក៏បានផ្ញើព្រះរាជាសារចូលរួមរំលែកមរណទុក្ខផងដែរ។ ក្រៅពីព្រះរាជាសាររំលែកទុក្ខរបស់ព្រះមហាក្សត្រចំពោះមរណភាពសម្ដេច សុខ អាន សម្ដេច ហ៊ុន សែន ក៏ដូចជារដ្ឋមន្ដ្រីក្រសួងមួយចំនួនក៏បានទៅគោរពវិញ្ញាណក្ខន្ធផងដែរ។
សាររំលែកទុក្ខគេអាចរាប់ដំបូងគឺព្រះមហាក្សត្រ និង ព្រះមហាក្សត្រីដែល ខឹ្លមសារមានអត្ថន័យដូចនេះថា ៖«ខ្ញុំសូមសម្ដែងនូវការសោកស្ដាយ និងសូមចូលរួមរំលែកមរណទុក្ខដ៏ក្រៀមក្រំជាមួយលោក ជំទាវ និងក្រុមគ្រួសារ ព្រមទាំងញាតិមិត្ដទាំងអស់នៃសព។»
ព្រះរាជសារបន្ថែមថា មរណភាពរបស់សម្ដេច សុខ អាន នាពេលនេះ គឺជាការបាត់បង់កុលបុត្រដ៏ឆ្នើមនៃប្រទេសជាតិ និងប្រជារាស្ដ្រកម្ពុជា ដែលបានចូលរួមក្នុងការដឹកនាំប្រទេសជាតិ ទទួលបាននូវសន្ដិភាព ស្ថិរភាព ឯកភាពជាតិ និងការអភិវឌ្ឍន៍ជាតិលើគ្រប់វិស័យ។
ចំពោះសម្ដេច ហ៊ុន សែន នាយករដ្ឋមន្ដ្រីកម្ពុជា និងជាប្រធានគណបក្សប្រជាជនកម្ពុជាកាលពីថ្ងៃទី១៦ មីនា ក៏បានទៅចូលរួមគោរពវិញ្ញាណក្ខន្ធសម្ដេច សុខ អាន ដោយផ្ទាល់ផងដែរ។ ដោយឡែកនៅថ្ងៃទី១៧ មីនា នេះលោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ព្រមទាំងថ្នាក់ដឹកនាំមន្ត្រីរាជការ សិល្បករ សិល្បការិនី នៃក្រសួងវប្បធម៌និងវិចិត្រសិល្បៈ ក៏បានចូលរួមរំលែកទុក្ខចំពោះការបាត់បង់សម្ដេច សុខ អាន នាពេលនេះដូចគ្នាដែរ។ ក្រៅពីរដ្ឋមន្ដ្រីក្រសួងវប្បធម៌ ក៏មានមន្ដ្រីជាន់ ខ្ពស់របស់រដ្ឋាភិបាលជាច្រើនរូបផ្សេងទៀត ទៅគោរពវិញ្ញាណក្ខន្ធនៃសព។ មរ ណភាពសម្ដេច សុខ អាន ក្រៅតែពីមន្ដ្រីរដ្ឋាភិបាល អ្នកនយោបាយផ្ញើសាររំលែកទុក្ខហើយ ក៏មានមន្ដ្រីទូតបរទេសប្រចាំកម្ពុជា ផ្ញើសាររំលែកទុក្ខចំពោះក្រុមគ្រួសារលោកផងដែរ។
សម្តេច សុខ អាន បានទទួលមរណភាពនៅមន្ទីពេទ្យនៃទីក្រុងប៉េកាំង ប្រទេសចិន កាលពីល្ងាចថ្ងៃទី១៥ ខែមីនា ឆ្នាំ២០១៧ ក្នុងជន្មាយុ ៦៦ឆ្នាំ ដោយរោគាពាធ។ សម្ដេច សុខ អាន ទទួលមរណភាពរំលងតែពីរថ្ងៃប៉ុណ្ណោះក្រោយពីលោកទទួលបានគោរមងារជា “សម្ដេចវិបុលបញ្ញា សុខ អាន” កាលពីថ្ងៃទី១៣ ខែមីនា ឆ្នាំ២០១៧។ សម្ដេច សុខ អាន កាលនៅមានជីវិត លោកមានតួនាទីជា ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រី។ភរិយារបស់សម្ដេច សុខ អាន គឺលោកស្រី ថេង អាយអាន្នី រហូតមកដល់ពេនេះលោកទាំងពីរមានកូនប្រុសស្រីចំនួន ០៥នាក់។ បច្ចុប្បន្នសពសម្ដេច សុខ អាន ត្រូវតម្កល់នៅផ្ទះរបស់លោកស្ថិតក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។
គណៈកម្មការរៀបចំបុណ្យសពនេះ ដឹកនាំដោយឧបនាយករដ្ឋមន្ត្រី ប៊ិន ឈិន ជាប្រធាន និងសម្តេច ព្រះពោធិវង្ស អំ លឹមហេង ព្រះសង្ឃនាយករងទី២ នៃព្រះរាជាណាកចក្រកម្ពុជា ជាអនុប្រធាន។ កម្មវិធីបុណ្យសពសម្ដេច សុខ អាន ត្រូវចំណាយថវិកា ប្រមាណជាង ៧៥ម៉ឺនដុល្លារ។ តាមសេចក្ដីជូនដំណឹង កម្មវិធីបុណ្យសពសម្ដេច សុខ អាន នឹងត្រូវបង្ហើយនៅថ្ងៃទី១៩ ខែមីនា ឆ្នាំ២០១៧ ដែលត្រូវដង្ហែយកទៅបូជានៅវត្ដបុទមវតី រាជធានីភ្នំពេញ៕
