ភ្នំពេញ៖នៅក្នុងពិធីអបអរសាទរ ខួប១០៧នៃទិវាអន្តរជាតិនារី ៨មីនានៅឆ្នាំ២០១៨នេះ រាជរដ្ឋាភិបាល បានដាក់ឱ្យ ស្ដាប័នរដ្ឋ និងក្រសួងនានា ត្រូវ ដាក់ប្រធានបទរួមគ្នា និងដូចគ្នា គឺ៖« «ស្ដ្រីរួមគ្នាថែរក្សាសន្ដិភាព ដើម្បីអភិវឌ្ឍន៍ជាតិ»។ ក្រោមប្រធានបទនេះ គេសង្កេតឃើញ មេដឹកនាំស្ថាប័នបាននាំគ្នាចុះធ្វើពិធីនេះ នៅទីតាំងសាធារណៈ ហើយនៅដងវិថីវិញក៏មានការចងបដា លើកឡើងពីប្រធានបទនេះដែរ។ ដោយ ឆ្នាំនេះ ព្រះមហាក្សត្រី ក៏បានផ្ញើសារជូនជនរួមជាតិដើម្បី អបអរសាទរផងដែរ ដោយព្រះអង្គ ជំរុញលើកកម្ពស់តួនាទីស្ត្រីក្នុងសង្គម។
ឆ្លៀតក្នុងឱកាសទិវា«អន្តរជាតិនារី ៨ មិនា»ខួបលើកទី១០៧ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានចេញព្រះរាជសារ រំលឹកអំពីវីរភាពនៃការតស៊ូរបស់នារីនៅទូទាំងសកលលោក ដើម្បីទាមទារលើកកម្ពស់ស្ថានភាព ជីវភាព សិទ្ធិសេរីភាព ឋានៈតួនាទីរបស់ស្ត្រីក្នុងសង្គម។
ក្នុងព្រះរាជសារនេះ អង្គព្រះមហាក្សត្រី បានអំពាវនាវឱ្យមាតាបិតាទាំងអស់ ប្រឹងប្រែងលើកកម្ពស់សីលធម៌ វប្បធម៌អហិង្សានៅក្នុងគ្រួសារតាមរយៈការអប់រំទូន្មានប្រៀនប្រដៅកូនចៅ។ ជាងនេះទៀតព្រះអង្គទទូចឱ្យកូនចៅជាពលរដ្ឋត្រូវជៀសឆ្ងាយពីគ្រឿងញៀន គ្រឿងស្រវឹក ការប្រើហិង្សា ដោយប្រកាន់យកដូវសីលធម៌ល្អ សុជីវធម៌ និងរួមចំណែករក្សាការពារសន្តិភាព សណ្តាប់ធ្នាប់ល្អ ដើម្បីរស់នៅក្នុងសង្គមមួយប្រកបដោយភាពថ្លៃថ្នូរ សម្បូរសប្បាយ និងសុខដុមរម្យជារៀងរហូត។
សម្តេចមហាក្សត្រី សូមគាំទ្រថ្នាក់ដឹកនាំ មន្ត្រីរាជការក្រសួងកិច្ចការនារីនិងគ្រប់ក្រសួងស្ថាប័នផ្នែកឯកជននិងដៃគូអភិវឌ្ឍន៍ ដែលបាននឹងកំពុងខិតខំប្រឹងប្រែងជំរុញលើកកម្ពស់សមភាពយេនឌ័រ ដើម្បីស្ត្រីទទួលបានកិច្ចការពារសិទ្ធិ និងផលប្រយោជន៍តាមរយៈការជំរិញសមាជិកគ្រួសារឱ្យទទួលស្គាល់ និងចាត់ទុកស្ត្រីជាដៃគូដ៏សំខាន់ក្នុងការរួមចំណែកអភិវឌ្ឍន៍ប្រទេសជាតិ។
ជាចុងក្រោយនៃព្រះរាជសាររបស់ព្រះមហាក្សត្រី នរោត្តម មុនិនាថ សីហនុ ព្រះអង្គបានលើកសរសើរពីស្នាដៃនិងកិច្ចខិតខំប្រឹងប្រែងរបស់រាជរដ្ឋាភិបាលសម្តេច ហ៊ុន សែន ដែលដឹកនាំប្រទេសនាំមកនូវសុខសន្តិភាព។
នៅក្នុងទិវាអន្តរជាតិ នារី៨មីនា ខួប១០៧ នៃឆ្នាំ២០១៨នេះ គេសង្កេតឃើញ ស្ថាប័នរដ្ឋនិងរដ្ឋមន្ត្រីមួយចំនួនបានធ្វើពិធីអបអរសាទរ ក្នុងនោះ សម្ដេចនាយករដ្ឋមន្ត្រីហ៊ុនសែន រដ្ឋមន្ត្រីក្រសួងកិច្ចការនារី រដ្ឋមន្ត្រីក្រសួងការពារជាតិ លោកស្រីឧបនាយករដ្ឋមន្ត្រីម៉ែនសំអន និងស្ថាប័នតាមបណ្ដាខេត្តក៏ចូលរួមប្រារព្ធព្រឹត្តិការណ៍នេះ។
ចំពោះ ឆ្នាំ២០១៨នេះ រាជរដ្ឋាភិបាល កម្ពុជាបាន ដាក់ប្រធានបទថា «ស្ដ្រីរួមគ្នាថែរក្សាសន្ដិភាព ដើម្បីអភិវឌ្ឍន៍ជាតិ»។
សារលិខិតរបស់សម្ដេច ហ៊ុន សែន នាយករដ្ឋមន្ដ្រីកម្ពុជានៅថ្ងៃទី០៦ ខែមីនា ឆ្នាំ២០១៨នេះ ដែល ថា្វយព្រះពរ សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ នៅក្នុងឱកាសប្រារព្ធខួបលើកទី១០៧ ទិវាអន្ដរជាតិនារី ៨មីនា ឆ្នាំ២០១៨ ក៏បានដាក់ប្រធានបទ «ស្ដ្រីរួមគ្នាថែរក្សាសន្ដិភាព ដើម្បីអភិវឌ្ឍន៍ជាតិ»នេះដែរ។
សារលិខិតសម្ដេច ហ៊ុន សែន រៀបរាប់ថា៖«តាងនាមសមាជិក សមាជិកានៃរាជរដ្ឋាភិបាលកម្ពុជា ទូលព្រះបង្គំខ្ញុំ និងភរិយា សូមព្រះបរមរាជានុញ្ញាតសម្ដែងថា្វយនូវព្រះសព្វសាធុការពរជ័យ បវរសួស្ដី សិរីមង្គល វិបុលសុខ មហាប្រសើរគ្រប់យ៉ាង ចំពោះសម្ដេចព្រះមហាក្សត្រី ព្រះវររាជមាតាជាតិខ្មែរជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់ ប្រកបដោយព្រះកាយពលមាំមួនខ្លាំងក្លា ព្រះបញ្ញាញាណភ្លឺថា្លត្រចះត្រចង់ ព្រះរាជសុខភាពល្អបរិបូរណ៌ ព្រះជន្មាយុយឺនយូរ ចាកផុតពីព្រះរោគាព្យាធិនានាជាអង្វែងតរៀងទៅ»។
សាររបស់ប្រមុខរាជរដ្ឋាភិបាល ក៏បានសម្ដែងនូវការអរគុណដឹងគុណព្រះមហាក្សត្រីដែលបានគាំទ្រផែនការយុទ្ធសាស្ត្រនារីរតនៈនិងផែនការសកម្មភាពជាតិ ដែលបានចូលរួមយ៉ាងសកម្មក្នុងការធ្វើឱ្យមានសុខសន្តិភាព ការអភិវឌ្ឍលើគ្រប់វិស័យ។
ចំណែកឯលោកស្រី អ៊ឹង កន្ថាផាវី រដ្ឋមន្ដ្រីក្រសួងកិច្ចការនារី មានប្រសាសន៍ក្នុងវិដេអូខ្លី របស់ក្រសួងកាលពីថ្មីៗនេះ ដោយបញ្ជាក់ថា ស្ដ្រីជាចំណែកមួយមិនអាចខ្វះបាន ក្នុងការធ្វើឲ្យសង្គមមានការរីកចម្រើន។
លោកស្រីរដ្ឋមន្ត្រី បន្ដថា ដំណើរនៃការផ្ដល់សិទ្ធិអំណាចដល់ស្ដ្រីកម្ពុជា គឺនៅវែងឆ្ងាយទៀត ទោះបីកម្ពុជាកំពុងដើរលើផ្លូវត្រូវ ក៏ដោយក្នុងការធ្វើឲ្យបុរសបានយល់ដឹងកាន់តែច្បាស់អំពីភាពមិនអាចខ្វះបាន នូវការរួមចំណែករបស់ស្ដ្រី ដើម្បីឲ្យសង្គមពោរពេញទៅដោយភាពរុងរឿង សិរីសួស្ដី និងសុភមង្គល។
រីឯ សម្តេច ទៀ បាញ់រដ្ឋមន្ត្រីក្រសួងការពារជាតិ បានទទូចក្នុងពិធីអបអរសាទរ ទិវាអន្តរជាតិនារី៨មីនា កាលពីថ្ងៃម្សិលមិញថា មេបញ្ជាការ គ្រប់កងអង្គភាព ត្រូវចូលរួមលើកកម្ពស់ស្ត្រី រួមគ្នាអភិវឌ្ឍន៍ជាតិ ក្នុងនោះត្រូវយកចិត្តទុកដាក់ ដល់ស្ត្រីនៅក្នុងអង្គភាពរបស់ខ្លួន ដោយត្រូវផ្តល់ឱកាស និងបង្កលក្ខណៈងាយស្រួល ឲ្យនារីបង្កើនសមត្ថភាព ចំណេះដឹងជំនាញលើកទឹកចិត្ត និងត្រូវផ្តល់ឱកាសក្នុងការទទួលឋានន្តរសក្តិតួនាទី សមស្របទៅតាមសមត្ថភាព បទពិសោធន៍ដោយមិនរើសអើងឡើយ។
ដោយឡែកលោកស្រីឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ក្នុងឱកាសប្រារព្ធទីវាអន្តរជាតិនារី៨មីនានេះដែរ ក៏បានណែនាំ កម្មករ-កម្មការិនី និងលោកស្រីមេភូមិ មេឃុំ ចៅសង្កាត់ ក្រុមប្រឹក្សាថា នៅពេលមានជំងឺហើយ ត្រូវចូលសម្រាកព្យាបាល នៅមន្ទីរពេទ្យរដ្ឋ គឺនឹងមិនត្រូវបង់ថវិកាឡើយ។
ក្នុងពិធីអបអរសាទរមិទ្ទិញទិវាអន្តរជាតិនារី៨មីនា ខួបទី១០៧ ក្រោមវិធានបទ “ស្ត្រីរួមគ្នារក្សាសន្តិភាពដើម្បីអភិវឌ្ឍន៍ជាតិ” នារសៀលថ្ងៃទី៥ ខែមីនា ឆ្នាំ២០១៨នេះ នៅអគ្គស្នងការដ្ឋាននគរបាលជាតិអគ្គស្នងការនគរបាលជាតិ ឧត្តមសេនីយ៍ នេត សាវឿន បានស្នើឲ្យនាយកដ្ឋានបុគ្គលិកពិនិត្យលទ្ធភាពស្ត្រីឲ្យធ្វើជាប្រធាននាយកដ្ឋាន អង្គភាព និងស្នងការនគរបាលរាជធានី-ខេត្ត ខណៈដែលអភិបាលខេត្តជាស្ត្រីនៅប្រទេសកម្ពុជា នាពេលបច្ចុប្បន្នបានមានហើយនោះ ។
នាយឧត្តមសេនីយ៍ មានប្រសាសន៍ថា រាជរដ្ឋាភិបាលបានយកចិត្តទុកដាក់យ៉ាងខ្លាំងចំពោះស្ត្រី ហើយរាល់កិច្ចការងារដែលបុរសធ្វើបានស្ត្រីក៏ធ្វើបានដែរនោះ ។នាយឧត្តមសេនីយ៍ បានបន្តថា បច្ចុប្បន្ននេះ នគរបាលជាស្ត្រីបានចូលរួមយ៉ាងសកម្មក្នុងការថែរក្សាសុវត្ថិភាព សុខសន្តិភាព សណ្តាប់ធ្នាប់ ជូនដល់ប្រជាពលរដ្ឋនិងប្រទេសជាតិ ហើយនៅក្នុងអគ្គស្នងការដ្ឋាននគរបាលជាតិ នាពេលបច្ចុប្បន្ននេះ គឺមានស្ត្រីជិតមួយពាន់នាក់ បានកំពុងបម្រើការជានគរបាល៕
