ភ្នំពេញ៖តាមរយៈសេចក្ដីជូនដំណឹងរបស់អគ្គលេខាធិការដ្ឋានព្រឹទ្ធសភា ចុះនៅថ្ងៃទី ២៥ ខែធ្នូ ឆ្នាំ ២០១៨ ឱ្យដឹងថា ព្រឹទ្ធសភាបានបើកសម័យប្រជុំរបស់ខ្លួនដើម្បីពិនិត្យសេចក្ដីស្នើច្បាប់ស្ដីពី វិសោធនកម្មច្បាប់គណបក្សនយោបាយដែលអាចបើកផ្លូវឱ្យអតីតថ្នាក់ដឹកនាំនៃអតីតគណបក្សសង្រ្គោះជាតិ ដែលតុលាការហាមឃាតិសិទ្ធិធ្វើនយោបាយ ឱ្យមានសិទ្ធិពេញលេញក្នុងការធ្វើនយោបាយឡើងវិញនៅព្រឹកថ្ងៃទី ២៥ធ្នូ ២០១៨នេះ។
តាមសេចក្ដីជូនដំណឹងនេះ សមាជិកព្រឹទ្ធសភា បាន អនុម័តទាំងស្រុង ដោយគ្មានសំឡេងជំទាស់ ក្នុងសំឡេង សរុប នៃសមាជិកចូល រួមប្រជុំគឺ ៥៦រូប។
ក្រៅពីពិនិត្យ និងឱ្យយោបល់លើសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយ ក្នុងសម័យប្រជុំនេះ ព្រឹទ្ធសភា ក៏បានអនុម័ត សេចក្តីព្រាងច្បាប់ស្តីពី បរធនបាលកិច្ច និងកំណត់របៀបវារៈ ក៏ដូចជាកាលបរិច្ចេទ សម្រាប់សម័យប្រជុំលើកទី២ នៃព្រឹទ្ធសភា នីតិកាលទី៤ ផងដែរ។
សេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយនេះ ត្រូវបានចុះហត្ថលេខា ដោយតំណាងរាស្រ្តចំនួន ៨៧រូប ដោយធ្វើវិសោធនកម្មទៅលើមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ។
សេចក្តីព្រាងច្បាប់វិសោធនកម្ម មាត្រា៤៥ ថ្មី(ស្ទួន) មានខ្លឹមចែងថា៖ «បុគ្គលដែលត្រូវតុលាការសម្រេច ហាមឃាត់ការធ្វើសកម្មភាព នយោបាយ មិនអាចបង្កើត គណបក្សនយោបាយ ឬចូលរួមក្នុងគណបក្ស នយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំង គណបក្សណាមួយបានឡើយ។ បុគ្គលដែលបានតុលាការសម្រេចហាមឃាត់ការធ្វើសកម្មភាពនយោបាយនេះ នឹងអាចទទួលបានវិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់កំណត់ ដោយសាលដីការរបស់តុលាការកំពូល ឬក្នុងករណីដែលបុគ្គលនោះ ត្រូវបានផ្តល់នីតិសម្បទាឡើងវិញ ដោយព្រះមហាក្សត្រតាមសំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ»។
បញ្ជាក់ផងដែរថា សេចក្តីស្នើច្បាប់ខាងលើ ត្រូវបានរដ្ឋសភាអនុម័តទាំងស្រុងដោយឥតកែប្រែ កាលពីថ្ងៃទី ១៣ ខែធ្នូ ឆ្នាំ ២០១៨ បន្ទាប់ពីពិនិត្យរួចរាល់ដោយគណៈកម្មការជំនាញ៕
