តំណាងប្រជាពលរដ្ឋមួយចំនួនរស់នៅខេត្ដកោះកុងដែលកំពុងមានជម្លោះ ជាមួយក្រុមហ៊ុនស្ករអំពៅ Sugar industry company limited និងក្រុមហ៊ុនស្ករអំពៅ Koh kong Plantation company limited ថ្លែងថា ប្រសិនជា ក្នុងសប្ដាហ៍នេះអាជ្ញាខេត្ដមិនអាចដោះស្រាយឲ្យក្រុមហ៊ុនព្រមបើកផ្លូវវិញបានទេ ពួកគេនឹងឡើងមកតវ៉ានៅខាងមុខខុទ្ទការល័យសម្ដេចនាយករដ្ឋមន្ដ្រី ។ ប៉ុន្ដែអាជ្ងាធរខេត្ដថ្លែងថា អាជ្ងាធរនឹងព្យាយាមដោះស្រាយបញ្ហាជូនពលរដ្ឋឲ្យបានក្នុងរវាងថ្ងៃនេះនិងថ្ងៃស្អែក ។ រាយការណ៍ដោយ លោក លៀ ស៊ីណា៖
តំណាងប្រជាពលរដ្ឋមានទំនាស់ដីធ្លីស្ថិតក្នុងភូមិ ត្រពាំងកណ្ដោល ស្រុកស្រែអំបិលខេត្ដកោះកុងម្នាក់ អ្នកស្រី ផាវ ញ៉ឺង បានថ្លែងប្រាប់វិទ្យុស្ដ្រីFM102 នៅថ្ងៃ ច័ន្ទ ទី ០៤ កក្កដា នេះថា អ្នកភូមិដែលជាម្ចាស់ចំការ ម្ចាស់ស្រែស្ថិតនៅខាងក្រោយចំការស្ករអំពៅទាំង២គឺ ពេលនេះដំណាំរបស់ពួកគាត់កំពុងតែស្វិតជិតងាប់ និង ជ្រុះផ្លែស្ទើរ អស់ទៅហើយ ។
ដំណាំទាំងនេះមានដូចជា សាម៉ាវ ធុរ៉េន និង ឪឡឹក ដែលកំពុងតែទុំខូច ។ អ្នកស្រីថា ព្រោះមិនមានផ្លូវដើម្បីដឹកដំណាំកសិផល ហើយពលរដ្ឋ ដែលបានខ្ចីបុលធនាគារមកធ្វើចំការ ប្រហែលជាត្រូវលក់ដីចម្កាដើម្បីយកលុយសងធនាគារ វិញបើថ្ងៃនេះ និងថ្ងៃ ស្អែកពលរដ្ឋនៅតែមិនមានផ្លូវដើម្បី ដឹកដំណាំទាំងនោះចេញពីចំការទៅលក់ទេនោះ ។
អ្នកស្រី ផាវ ញ៉ឺង ទទូចសុំឲ្យរាជរដ្ឋាភិបាលមេត្ដាជួយសង្គ្រោះដល់ពលរដ្ឋដែលរងគ្រោះជាង ៣២ គ្រួសារ ដោយសារតែក្រុមហ៊ុនស្ករអំពៅទាំងពីរនេះបាន បិតផ្លូវ ។ អ្នកស្រីបន្ដថាប្រសិនជា អាជ្ញាធរនៅតែមិនអាចអន្ដរាគមន៍ឲ្យក្រុមហ៊ុនបើកផ្លូវវិញទេ អ្នកស្រីនឹងលើកគ្នាមករាជធានីភ្នំពេញដើម្បីសុំអន្ដរាគមន៍ពីនាយករដ្ឋមន្ដ្រី ។
អ្នកស្រី ផាវ ញ៉ឺង៖«ដូច្នេះពួកយើងកំពុងតែប្រមូលផ្ដុំកំលាំងយើង ប្រមូលផ្ដុំទៅមុខអន្ដរក្រសួង មុខខុទ្ធការល័យសម្ដេចនាយករដ្ឋមន្ដ្រីឲ្យលោកជួយ ព្រោះគេរំលោភយកដីរបស់ពួកយើងហើយ ហើយដីដែលនៅសល់បន្ដិចបន្ដួចក្រុមហ៊ុន នៅធ្វើរបងហ៊ុំព័ន្ធយកទៀត » ។
អ្នកស្រី កាន់ នាង ដែលជាម្ចាស់ចំការ ស្ថិតនៅខាងក្រោយដីចំការស្ករអំពៅរបស់ក្រុមហ៊ុន Sugar industry company limited និងក្រុមហ៊ុនស្ករអំពៅ Koh kong Plantation company limited បានឲ្យដឹងថា គ្រួសារអ្នកស្រីប្រសិនជាមិនបានប្រមូល កសិផលដែលមានទាំងធុរ៉េន និង សាម៉ាវនោះដើម្បីលក់ទេ គ្រួសារអ្នកស្រីអាចប្រឈមនឹងលក់ចម្កាដើម្បីសងបំណុលគេ ។
ស្រីម្ចាស់ចំការ បញ្ជាក់ថា បើសិន ថ្ងៃនេះ និងថ្ងៃស្អែកអាចមានផ្លូវដើម្បីដឹកដំណាំកសិផលទាំងនោះ ចេញពីចំការ ប្រហែលជាអាចស្រោចស្រង់បាន ២០ ទៅ ៣០% ប៉ុន្ដែបើលើសថ្ងៃទៅមុខទៀត គឺអស់សង្ឃឹមហើយ ។
អ្នកស្រី កាន់ នាង៖ « ខ្ញុំខាតណាស់មួយឈុតនេះ ខ្ញុំខ្ចីលុយអង្គការដល់ ៥ពាន់ហើយអត់អីមួយរៀល ដោយសារឆ្នាំទៅវា រីងខ្លាំងពេក ៥ពាន់យកមកសង្ឃឹមថារួច ហើយប្រមូលផលសងគេវិញតែ ឥឡូវអស់ហើយខ្ញុំ នៅមួយគ្រាប់ពីគ្រាប់ យកធ្វើអី គេមិនមកយកទេ មួយដើមពីរបីគីឡូហ្នឹង តែបើកផ្លូវបានថ្ងៃនេះ និង ស្អែកអាចប្រមូលបានមួយដើមពីរបីគីឡូអី តែបើផុតទៅលែងហើយ » ។
ជុំវិញរឿងនេះលោក តេង នាវ ប្រធានការិយាល័យផែនការនិងគាំទ្រឃុំសង្កាត់នៃសាលាស្រុកស្រែអំបិល ខេត្ដ កោះកុង មានប្រសាសន៍ថា អាជ្ងាធរបានព្យាយាមទាក់ទងទៅក្រុមហ៊ុន ទាំង២នេះហើយ ដោយរដ្ឋបាលក្រុម ហ៊ុន នេះបានសន្យាថា និង មកជួបអាជ្ងាធរខេត្ដ រួមជាមួយប្រជាពរដ្ឋដើម្បីដោះស្រាយគ្នានៅថ្ងៃចន្ទ ទី ០៤ កក្កដានេះ ប៉ុន្ដែបែរជាមិនឃើញតំណាងក្រុមហ៊ុនមកជួបតាមសន្យាឡើយ ហើយនិយាយថា អ្នកគ្រប់គ្រងទូទៅមានភារៈកិច្ចទៅប្រទេសថៃ ។
ប្រធានការិយាល័យផែនការរូបនេះបន្ដថា លោកជាអាជ្ងាធរខេត្ដនៅពេលលឃើញពលរដ្ឋរងទុក្ខដូចនេះលោកពិតជាលំបាកណាស់ ហើយលោក៏ប្រឹងប្រែងជួយដល់ពលរដ្ឋដែរប៉ុន្ដែភាគីក្រុមហ៊ុន ហាក់បង្ហាញជំហរដូចមិនចង់ចរចារណ៍ដើម្បើបើកផ្លូវសម្រួលដល់ពលរដ្ឋឡើយ ។
លោក តេង នាវ បន្ដថាលោកនឹងបន្តឃ្លាំមើលទៀត ហើយបើ ក្រុមហ៊ុន មិនព្រមបញ្ជូនអ្នកដោះស្រាយមកទេលោក នឹង ផ្ដល់ដំណឹងទៅថ្នាក់លើលោកជាថ្មីដើម្បីសុំអន្ដរាគមន៍នៅថ្ងៃស្អែក ។
លោក តេង នាវ៖ «ខ្ញុំនឹងខំប្រឹងប្រែមួយល្ងាចនេះទៀត ហើយបើការនិយាយរបស់ខ្ញុំវាមិនបានផលអ្វីទេ ខ្ញុំនឹងជួនដំណឹងទៅមេខ្ញុំ ហើយខ្ញុំក៏មិនហាមឃាត់ពួកគាត់ដែរ (ទៅតវ៉ានៅភ្នំពេញ) ព្រោះការប្រមូលផលរបស់ពួកគាត់គឺជារឿងសំខាន់» ។
សូមជម្រាបថា ទំនាស់បិតផ្លូវរវាងក្រុមហ៊ុនស្ករអំពៅ Sugar industry company limited និងក្រុមហ៊ុនស្ករអំពៅ Koh kong Plantation company limited ជាមួយនឹងពលរដ្ឋស្ថិតក្នុង ភូមិ ត្រពាំងកណ្ដោល ស្រុក ស្រែអំបិល ខេត្ដកោះកុង ចាប់តាំងតែពីខែ ឧសភា ឆ្នាំ ២០១៦ ដោយក្រុមហ៊ុន ចោទថា មានសត្វគោ ក្របីរបស់ពលរដ្ឋបានចូលស៊ីដំណាំលើដីរបស់ក្រុមហ៊ុន ៕
